ಕೋಲಾರ : ಕೋಲಾರ ತಾಲೂಕಿನ ಬಂಗಾರಪೇಟೆ ರಸ್ತೆಯ ದಿಂಬ ಚಾಮನಹಳ್ಳಿ ಗೇಟ್ ಬಳಿ ವನ್ಯಜಿವಿಗಳ ಅಂಗಾಂಗಗಳನ್ನು ಅಕ್ರಮವಾಗಿ ಮಾರಾಟ ಮಾಡಲು ಸಾಗಣೆ ಮಾಡುತ್ತಿದ್ದವನನ್ನು ಕೋಲಾರ ಗ್ರಾಮಾಂತರ ಪೊಲೀಸರು ಬಂಧಿಸಿದ್ದು, ವಿವಿಧ ಪ್ರಾಣಿಗಳ ಅಂಗಾಂಗ ವಶಪಡಿಸಿಕೊಂಡಿಸಿದ್ದಾರೆ.
ಬಂಗಾರಪೇಟೆ ನಿವಾಸಿ ಕಿಶೋರ್ ಕುಮಾರ್(45) ಬಂಧಿತ. ಮಾರಾಟ ಮಾಡಲು ವನ್ಯಜಿವಿ ಅಂಗಾಂಗಗಳನ್ನು ಇಟ್ಟುಕೊಂಡಿರುವ ಮಾಹಿತಿ ಮೇರೆಗೆ ಪೋಲಿಸರು ದಾಳಿ ನಡೆಸಿದ್ದರು. ಈ ವೇಳೆ ಜಿಂಕೆಯ 2 ಕೊಂಬುಗಳು ಮತ್ತು ಚುಕ್ಕೆ ಜಿಂಕೆಯ ಚರ್ಮ ಪತ್ತೆಯಾಗಿವೆ. ಕಿಶೋರ್ ಕುಮಾರ್ನನ್ನು ವಿಚಾರಣೆಗೆ ಒಳಪಡಿಸಿದಾಗ, ಬಂಗಾರಪೇಟೆಯ ಮನೆಯಲ್ಲಿಯೂ ಹಲವು ವನ್ಯಜಿವಿಗಳ ಅಂಗಾಂಗಗಳನ್ನು ಸಂಗ್ರಹಿಸಿಟ್ಟಿರುವುದು ಬೆಳಕಿಗೆ ಬಂದಿದೆ. ಬಳಿಕ ಆರೋಪಿಯನ್ನು ಮನೆಗೆ ಕರೆದೊಯ್ದಾಗ ಚುಕ್ಕೆ ಜಿಂಕೆಯ 3 ಚರ್ಮಗಳು, 4 ಕಡಲು ಶಂಕುಗಳು, ಹುಲಿಯ ಚರ್ಮದಂತೆ ಬಣ್ಣ ಬಳಿದಿರುವ ಕಾಡುಬೆಕ್ಕಿನ 1 ಚರ್ಮ, 2 ನರಿ ಚರ್ಮಗಳು, 2 ಚಿರತೆ ಹಲ್ಲುಗಳು, 4 ಕಾಡು ಹಂದಿಯ ಹಲ್ಲುಗಳು ಸಿಕ್ಕಿವೆ. ಈ ಸಂಬಂಧ ಕೋಲಾರ ಗ್ರಾಮಾಂತರ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.
ಕೋಲಾರ ಗ್ರಾಮಾಂತರ ಪೊಲೀಸ್ ಠಾಣೆ ಪಿಐ ಕಾಂತರಾಜು ಹಾಗೂ ಸಿಬ್ಬಂದಿ ಕಾರ್ಯಾಚರಣೆಗೆ ಎಸ್ಪಿ ಬಿ.ನಿಖಿಲ್ ಮೆಚ್ಚುಗೆ ವ್ಯಕ್ತಪಡಿಸಿದರು.
