ಅಪ್ರಾಪ್ತೆಯನ್ನು ವರಿಸಿದವನ ಬಂಧನ

ಕನಕಪುರ: ಅಪ್ರಾಪ್ತೆಯನ್ನು ವರಿಸಿದ ಆರೋಪದಲ್ಲಿ ಯುವಕನನ್ನು ವಶಕ್ಕೆ ಪಡೆದ ಕೋಡಿಹಳ್ಳಿ ಪೊಲೀಸರು, ನ್ಯಾಯಾಂಗ ಬಂಧನಕ್ಕೆ ಒಪ್ಪಿಸಿದ್ದಾರೆ. ಹೊಸದೊಡ್ಡಿ ಗ್ರಾಮದ ನವೀನ್​(24) ಬಂಧಿತ. ಪ್ರಕರಣ ಸಂಬಂಧ ಕೋಡಿಹಳ್ಳಿ ಹೋಬಳಿ ಹೊಸದೊಡ್ಡಿಯ ಐವರ ವಿರುದ್ಧ ಪ್ರಕರಣ ದಾಖಲಾಗಿದೆ.

ಏನಿದು ಪ್ರಕರಣ?: ಹೊಸದೊಡ್ಡಿಯ ನವೀನ್​, 16 ವರ್ಷದ ಬಾಲಕಿಯನ್ನು ಏ.7ರಂದು ತಮಿಳುನಾಡಿದ ಕೃಷ್ಣಗಿರಿಯ ಬಾಳೆಗುಳಿ ಎಂಬಲ್ಲಿ ಮದುವೆಯಾಗಿದ್ದ. ಆದರೀಗ ಬಾಲಕಿ 5 ತಿಂಗಳ ಗರ್ಭಿಣಿಯಾಗಿದ್ದು, ಮಾಹಿತಿ ತಿಳಿದ ಮಹಿಳಾ ಮತ್ತು ಮಕ್ಕಳ ಕಲ್ಯಾಣ ಇಲಾಖೆ ಕೋಡಿಹಳ್ಳಿ ಪೊಲೀಸರಿಗೆ ದೂರು ನೀಡಿದ್ದು, ಈ ಮೇರೆಗೆ ಯುವಕ ಹಾಗೂ ಬಾಲಕಿಯ ತಂದೆ, ತಾಯಿ ಸೇರಿ ಐವರ ವಿರುದ್ಧ ಪೋಕ್ಸೋ ಹಾಗೂ ಬಾಲ್ಯ ವಿವಾಹ ಪ್ರಕರಣ ದಾಖಲಾಗಿದೆ. ವಿವಾಹಕ್ಕೆ ಸಹಕರಿಸಿದ ಹತ್ತಕ್ಕೂ ಹೆಚ್ಚು ಮಂದಿ ವಿರುದ್ಧ ದೂರು ದಾಖಲಾಗಿದ್ದು, ಆರೋಪಿಗಳ ಪತ್ತೆಗೆ ಬಲೆ ಬೀಸಿರುವುದಾಗಿ ಸರ್ಕಲ್​ ಇನ್​ಸ್ಪೆಕ್ಟರ್​ ವಿಕಾಸ್​ ತಿಳಿಸಿದ್ದಾರೆ.