ವರುಣನ ಅಬ್ಬರಕ್ಕೆ ಚಳ್ಳಕೆರೆ ಗಡಗಡ

ಕೊರಲಕುಂಟೆ ತಿಪ್ಪೇಸ್ವಾಮಿ ಚಳ್ಳಕೆರೆ
ತಾಲೂಕಿನಲ್ಲಿ ಮಂಗಳವಾರ ರಾತ್ರಿ ಸುರಿದ ಮಳೆಯ ಅಬ್ಬರದಿಂದ ಅಪಾರ ಪ್ರಮಾಣದ ಹಾನಿ ಸಂಭವಿಸಿದೆ.

ರೈತರ ಜಮೀನುಗಳಿಗೆ ನೀರು ಹರಿದು ಬೆಳೆ ನಷ್ಟವಾಗಿದೆ. ಕೆಲ ಗ್ರಾಮಗಳಲ್ಲಿ ಗುಡಿಸಲು ಮನೆಗಳು ಕುಸಿದು ಬಿದ್ದಿವೆ. ರಹೀಂನಗರ, ಎಸ್‌ಆರ್ ರಸ್ತೆ, ಗಾಂಧಿನಗರ, ಅಂಬೇಡ್ಕರ್ ನಗರ, ಪಾವಗಡ ರಸ್ತೆ, ನಗರಂಗೆರೆ ಗ್ರಾಮಕ್ಕೆ ಹೋಗುವ ರೈಲ್ವೆ ಸೇತುವೆ ಕೆಳಭಾಗ ಕೆರೆಗಳಂತಾಗಿದೆ.

ಕೊರಲಕುಂಟೆ ಗ್ರಾಮದ ಲಕ್ಷ್ಮೀದೇವಿ ಅವರ ಮನೆ ಸೇರಿ, ನಗರದಲ್ಲಿ 23, ಕಸಬಾ ವ್ಯಾಪ್ತಿಯಲ್ಲಿ 20 ಮನೆಗಳು ಬಿದ್ದಿವೆ. ಇನ್ನು ಕೆಲವೆಡೆ ತಗ್ಗು ಪ್ರದೇಶಗಳಿಗೆ ನೀರು ನುಗ್ಗಿದ್ದು ಜನಜೀವನ ಅಸ್ತವ್ಯಸ್ತಗೊಂಡಿದೆ.

ಗಂಜಿಕೇಂದ್ರ: ಚಳ್ಳಕೆರೆ ನಗರದ ವಾರ್ಡ್ 8ರ ರಹೀಂನಗರ ನಿವಾಸಿಗಳಿಗೆ ಮಳೆ ಬಂತೆಂದರೆ ಗಂಜಿಕೇಂದ್ರವೇ ಗತಿ ಅನಿಸುತ್ತದೆ. ರಾತ್ರಿ ಸುರಿದ ಮಳೆಗೆ ಅಜ್ಜನಗುಡಿ ಕೆರೆ ಭಾಗದಿಂದ ಹರಿದು ಬಂದ ನೀರಿನ ರಭಸಕ್ಕೆ ರಹೀಂನಗರ ಬೃಹತ್ ಹಳ್ಳ ತುಂಬಿ ಹರಿದ ಪರಿಣಾಮ ಸಮೀಪದ ತಗ್ಗು ಪ್ರದೇಶದಲ್ಲಿರುವ 50 ಮನೆಗಳು ಜಲಾವೃತಗೊಂಡಿವೆ. ಮನೆಯಲ್ಲಿದ್ದ ಬಟ್ಟೆ, ಧವಸ-ಧಾನ್ಯ, ಪಾತ್ರೆ-ಸಾಮಗ್ರಿಗಳು ಸಂಪೂರ್ಣ ನೀರು ಪಾಲಾಗಿವೆ. ಗುಡಿಸಲು ವಾಸಿಗಳು ಜೀವ ಉಳಿಸಿಕೊಳ್ಳಲು ಪರದಾಡುತ್ತಿದ್ದಾರೆ.

ವೀರದಿಮ್ಮನಹಳ್ಳಿ: ತಾಲೂಕಿನ ವೀರದಿಮ್ಮನಹಳ್ಳಿ ಭಾಗದ ಬೋರಪ್ಪನಹಟ್ಟಿ, ಕರೆಕಲ್ ಕೆರೆ, ಗೊರಲಕಟ್ಟೆಯಿಂದ ರಹೀಂನಗರ ಸಂಪರ್ಕ ಇರುವ ರಸ್ತೆಗಳು ಮಳೆ ನೀರಿನಿಂದ ಸಂಪೂರ್ಣ ಹಾನಿಯಾಗಿದ್ದು, ಸಂಚಾರಕ್ಕೆ ತೊಂದರೆಯಾಗಿದೆ. ಲಕ್ಷ್ಮೀಬಾಯಿ ಗುಂಡನಾಯ್ಕ, ಗೀತಾಬಾಯಿ ನಾಗರಾಜ, ಲಕ್ಷ್ಮೀಬಾಯಿ ಗೋವಿಂದನಾಯ್ಕ, ಲಕ್ಷ್ಮೀಬಾಯಿ ಪ್ರಶಾಂತ, ಚಂದ್ರನಾಯ್ಕ, ರಾಮನಾಯ್ಕ ಎಂಬುವರ ಮನೆಗಳು ಮಳೆಯ ರಭಸಕ್ಕೆ ಕುಸಿದು ಬಿದ್ದಿವೆ.

ಗ್ರಾಮದಲ್ಲಿ ಸರಿಯಾದ ರಸ್ತೆ ಮತ್ತು ಚರಂಡಿ ವ್ಯವಸ್ಥೆ ಇಲ್ಲ ಎಂದು ತಾಲೂಕು ಮತ್ತು ಸ್ಥಳೀಯ ಪಂಚಾಯಿತಿ ಆಡಳಿತಕ್ಕೆ ಹಲವು ಬಾರಿ ಮನವಿ ಸಲ್ಲಿಸಿದ್ದರೂ ಯಾವುದೇ ಪ್ರಯೋಜನವಾಗಿಲ್ಲ. ಮಳೆಗಾಲದಲ್ಲಿ ಅಪಾಯದ ಸ್ಥಿತಿಯಲ್ಲಿ ಗ್ರಾಮಸ್ಥರು ಜೀವ ಉಳಿಸಿಕೊಳ್ಳಲು ಹೋರಾಟ ಮಾಡಬೇಕಿದೆ ಎಂದು ಗ್ರಾಪಂ ಸದಸ್ಯ ಜಗದೀಶನಾಯ್ಕ ಅಳಲು ತೋಡಿಕೊಂಡರು.

ಮಳೆಯ ಪ್ರಮಾಣ: ಬುಧವಾರ ರಾತ್ರಿ ಸುರಿದ ಮಳೆ ಚಳ್ಳಕೆರೆ ನಗರ ವ್ಯಾಪ್ತಿಯಲ್ಲಿ 67.4 ಎಂಎಂ, ಪರಶುರಾಂಪುರ 7.2, ತಳಕು 94.2, ನಾಯಕನಹಟ್ಟಿ 69.2, ದೇವರಮರಿಕುಂಟೆ 39.2 ಎಂಎಂ ಮಳೆಯಾಗಿದೆ.

ಭೇಟಿ: ಜಿಲ್ಲಾಧಿಕಾರಿ ಟಿ.ವೆಂಕಟೇಶ್, ರಹೀಂನಗರ, ಚಳ್ಳಕೆರಮ್ಮನ ದೇವಸ್ಥಾನ ಮುಂಭಾಗದ ಹಳ್ಳ, ಪಾವಗಡ ರಸ್ತೆ ಮಾರ್ಗದಲ್ಲಿ ತುಂಬಿ ಹರಿಯುತ್ತಿದ್ದ ಸ್ಥಳಕ್ಕೆ ಭೇಟಿ ನೀಡಿ ಪರಿಶೀಲಿಸಿದರು. ಸಾರ್ವಜನಿಕರ ಸಮಸ್ಯೆಗಳ ಪಟ್ಟಿ ಮಾಡಿ ಕೂಡಲೇ ಸರ್ಕಾರಕ್ಕೆ ವರದಿ ಸಲ್ಲಿಸುವಂತೆ ತಹಸೀಲ್ದಾರ್ ರೆಹಾನ್ ಪಾಷಾ, ಪೌರಾಯುಕ್ತ ಜಗರೆಡ್ಡಿ ಅವರಿಗೆ ಸೂಚಿಸಿದರು.