ಈ ನಡುವೆ ಪೌರಾಯುಕ್ತರು ಮುಂದುವರಿದು ಜಿಲ್ಲಾಧಿಕಾರಿಗೆ ಇನ್ನೂ ಕೆಲವು ಸಂಗತಿಗಳನ್ನು ಪತ್ರದಲ್ಲಿ ತಿಳಿಸಿದ್ದಾರೆ. ಮಾಣಿಕ್ಯರಾಜು ಅವರು ಕಚೇರಿ ಕೆಲಸಕ್ಕೆ ಅನಧಿಕೃತ ಗೈರಾಗುವುದಲ್ಲದೆ, ಹಕ್ಕು ವರ್ಗಾವಣೆಗೆ ಸಂಬಂಧಿಸಿದ ಕಡತ ಮತ್ತು ನ್ಯಾಯಾಲಯಕ್ಕೆ ಬೇಕಾದ ಪ್ರಕರಣಗಳ ದಾಖಲೆಯಿರುವ ಅಲ್ಮೇರಾ ಕೀಲಿಯನ್ನು ಕಚೇರಿಗೆ ಒಪ್ಪಿಸಿಲ್ಲ. ಇದರಿಂದಲೂ ಸಾರ್ವಜನಿಕರ ಕೆಲಸಕ್ಕೆ ತೊಡಕಾಗಿತ್ತು. ಆದ್ದರಿಂದ ಮಾಣಿಕ್ಯರಾಜು ಅನುಪಸ್ಥಿತಿಯಲ್ಲಿ ಅಲ್ಮೇರಾ ಕೀ ತೆಗೆಸಿ, ಕಚೇರಿಯಲ್ಲಿರುವ ಮತ್ತೊಬ್ಬ ನೌಕರರಿಗೆ ಪ್ರಭಾರ ಜವಾಬ್ದಾರಿ ವಹಿಸಲಾಗಿದೆ. ಅಲ್ಮೇರಾದಲ್ಲಿರುವ ಕಡತ ಪರಿಶೀಲಿಸಲಾಗಿ ಮಾಣಿಕ್ಯರಾಜು ಅವರು 2022 ಆಗಸ್ಟ್, ಸೆಪ್ಟೆಂಬರ್ನಲ್ಲಿ ತಮ್ಮಿಂದ ಹಕ್ಕು ವರ್ಗವಣೆಗೆ ಆದೇಶಿಸಿರುವ ಕಡತವನ್ನು ವಿಲೇವಾರಿ ಮಾಡದೆ ಬಾಕಿ ಇಟ್ಟುಕೊಂಡಿರುವುದು ತಿಳಿದಿದೆ. ಈ ಕಾರಣಕ್ಕೆ ಸಂಬಂಧಿಸಿದ ಜನರು ನಗರಸಭಾ ಆಡಳಿತದ ವಿರುದ್ಧ ಲೋಕಾಯುಕ್ತ ಕಚೇರಿಗೆ ದೂರು ನೀಡುತ್ತಿದ್ದಾರೆ ಎಂದು ತಿಳಿಸಿದ್ದು, ಅನಿವಾರ್ಯವಾಗಿ ಇವರ ವಿರುದ್ಧ ಶಿಸ್ತು ಕ್ರಮ ಜರುಗಿಸಬೇಕು ಎಂದು ಮನವಿ ಮಾಡಿದ್ದಾರೆ.
