ಎಪಿಎಂಸಿ ಮಾರುಕಟ್ಟೆಯ ಮಂಡಿಗಳಿಗೆ ನುಗ್ಗಿದ ಮಳೆ ನೀರು

ಶ್ರೀನಿವಾಸಪುರ: ಸೋಮವಾರ ಸಂಜೆ ಸುರಿದ ಧಾರಾಕಾರ ಮಳೆಯಿಂದ ನೀರು ಎಪಿಎಂಸಿ ಮಾರುಕಟ್ಟೆ ಮಂಡಿಗಳಿಗೆ ನುಗ್ಗಿ ರೈತರು ತಂದಿದ್ದ ಮಾವಿನ ಕಾಯಿಗಳು ನೀರಿನಲ್ಲಿ ಕೊಚ್ಚಿ ಹೋಗಿವೆ.

ಷರತ್ತುಗಳ ಅನ್ವಯ ಮಾರುಕಟ್ಟೆ ಪ್ರಾರಂಭವಾಗಿ ಕರೊನಾ ಭೀತಿಯಿಂದಲೇ ವಹಿವಾಟು ನಡೆಯುತ್ತಿತ್ತು. ಆದರೆ ಸೋಮವಾರ ಸುರಿದ ಮಳೆಯಿಂದ ನೀರು ಹರಿದು ಹೊರ ಹೋಗಲು ಇರುವ ಚರಂಡಿ ಮುಚ್ಚಿರುವುದರಿಂದ ಮಂಡಿಯೊಳಗೆ ನೀರು ನುಗ್ಗಿ ಮಾವಿನಕಾಯಿ ರಾಶಿಗಳು ಮುಳುಗಿವೆ.

ಎಪಿಎಂಸಿ ಮಾರುಕಟ್ಟೆ ಹಿಂಭಾಗ ಅರಣ್ಯ ಇರುವುದರಿಂದ ಅರಣ್ಯದಿಂದ ಬರುವ ನೀರು ಮಾರುಕಟ್ಟೆ ಪಕ್ಕದಲ್ಲಿರುವ ರಾಜುಕಾಲುವೆಯಿಂದ ಹರಿದುಹೋಗಬೇಕಿತ್ತು. ಮಾರುಕಟ್ಟೆಗೆ ಹೊಂದಿಕೊಂಡಿರುವ ಖಾಸಗಿ ಮಾರುಕಟ್ಟೆಗೆ ಹೋಗಿಬರಲು ಚರಂಡಿ ಮುಚ್ಚಿರುವುದರಿಂದ ಅರಣ್ಯದ ನೀರು ಎಪಿಎಂಸಿ ಮಂಡಿಯೊಳಗೆ ನುಗ್ಗಿದೆ. ಮಾವಿನ ಕಾಯಿ ರಾಶಿಗಳಿಗೆ ನೀರು ನುಗ್ಗಿದ ಕಾರಣ ವ್ಯಾಪಾರಸ್ಥರು ಕಾಯಿ ಖರೀದಿಸಲು ಮುಂದಾಗದೆ ರೈತರು ನಷ್ಟ ಅನುಭವಿಸುವಂತಾಯಿತು.