ನಟಿ ಅನು ಪೂವಮ್ಮಗೆ ಕಿರಿಕಿರಿ ತಂದ ಪತಿಯ ನಕಲಿ ಇನ್‌ಸ್ಟಾ ಖಾತೆ!

ಬೆಂಗಳೂರು: ಸ್ಯಾಂಡಲ್‌ವುಡ್ ಹಾಗೂ ಕಿರುತೆರೆ ನಟಿ ಅನು ಪೂವಮ್ಮಗೆ ಅವರ ಪತಿಯ ನಕಲಿ ಇನ್‌ಸ್ಟ್ಟಾಗ್ರಾಂ ಖಾತೆಯಿಂದ ಕಿರಿಕಿರಿಯಾಗುತ್ತಿದೆ. ಈ ವಿಷಯವನ್ನು ಅವರೇ ತಮ್ಮ ಇನ್‌ಸ್ಟಾಗ್ರಾಂ ಖಾತೆಯಲ್ಲಿ ತಿಳಿಸಿ ಬೇಸರ ವ್ಯಕ್ತಪಡಿಸಿದ್ದಾರೆ.

ಪೂವಮ್ಮ ಅವರ ಪತಿ ಎನ್.ಸಿ. ಅಯ್ಯಪ್ಪ ಅವರು ಕ್ರಿಕೆಟ್‌ಪಟು. ಜತೆಗೆ ಕನ್ನಡ ಬಿಗ್‌ಬಾಸ್ -3ರ ಸೀಸನ್‌ನಲ್ಲಿ ಭಾಗವಹಿಸಿದ್ದವರು. ಅವರು ಕೂಡ ಅನು ಅವರಷ್ಟೇ ಫ್ಯಾನ್ ಫಾಲೋಯಿಂಗ್ ಹೊಂದಿರುವವರು. ಆದರೆ ಇತ್ತೀಚೆಗೆ ಅನು ಅವರಿಗೆ ಫೋನ್ ಮಾಡುತ್ತಿದ್ದ ಕೆಲವು ಪರಿಚಿತರು ‘‘ನಿಮ್ಮ ಪತಿ ಇನ್‌ಸ್ಟಾಗ್ರಾಂನಿಂದ ಏನೇನೋ ಮೆಸೇಜ್ ಕಳಿಸುತ್ತಿದ್ದಾರೆ’’ ಎಂದು ದೂರು ಹೇಳಿದ್ದರು.

ಇದನ್ನೂ ಓದಿರಿ ಬೆಂಗಳೂರಿನಲ್ಲಿ ಕೋವಿಡ್​ ಸೋಂಕನ್ನೇ ಮಣಿಸಿದ 100 ವರ್ಷದ ಅಜ್ಜಿ!

ಅದರಿಂದ ಬೇಸರಗೊಂಡ ಅನು ಪೂವಮ್ಮ ಚೆಕ್ ಮಾಡಿದರೆ, ಅದು ಅವರ ಪತಿಯ ಇನ್‌ಸ್ಟಾ ಖಾತೆಯಾಗಿರಲಿಲ್ಲ. ಬದಲಿಗೆ ಬೇರೆ ಯಾರೋ ಅಪರಿಚಿತರು ಅಯ್ಯಪ್ಪ ಅವರ ಹೆಸರಿನಲ್ಲಿ ತೆರೆದ ಖಾತೆ ಅದಾಗಿತ್ತು. ಕೂಡಲೇ ಆ ನಕಲಿ ಖಾತೆಯ ಸ್ಕ್ರೀನ್‌ಶಾಟ್ ತೆಗೆದ ಅನು ಪೂವಮ್ಮ ತಮ್ಮ ಇನ್‌ಸ್ಟಾ ಖಾತೆಯಲ್ಲಿ ಹಾಕಿದ್ದಾರೆ. ‘‘ನನ್ನ ಪತಿಯ ಹೆಸರಿನಲ್ಲಿ ಯಾರೋ ಇನ್‌ಸ್ಟಾ ಖಾತೆ ತೆರೆದು ನನ್ನ ಸ್ನೇಹಿತೆಯರಿಗೆ, ಪರಿಚಿತರಿಗೆ ಏನೇನೋ ಮೆಸೇಜ್ ಕಳಿಸುತ್ತಿದ್ದಾರೆ. ಈ ಖಾತೆಯಿಂದ ಯಾರಿಗಾದರೂ ಮೆಸೇಜ್ ಬಂದರೆ ನಿಜವೆಂದು ಪರಿಗಣಿಸಬೇಡಿ. ಆ ಖಾತೆಯನ್ನು ಬ್ಲಾಕ್ ಮಾಡಿ’’ ಎಂದು ಮನವಿ ಮಾಡಿದ್ದಾರೆ.

ಹಲವು ವರ್ಷಗಳಿಂದ ಪರಸ್ಪರ ಪ್ರೀತಿಸುತ್ತಿದ್ದ ಅನು ಪೂವಮ್ಮ ಮತ್ತು ಎನ್.ಸಿ. ಅಯ್ಯಪ್ಪ 2018ರಲ್ಲಿ ಮದುವೆಯಾಗಿದ್ದಾರೆ. ಹಲವು ಕನ್ನಡ ಚಲನಚಿತ್ರಗಳಲ್ಲಿ ನಟಿಸಿರುವ ಅನು, ಮುದ್ದುಲಕ್ಷ್ಮಿ ಧಾರಾವಾಹಿಯಲ್ಲಿ ನೆಗೆಟಿವ್ ರೋಲ್‌ನಲ್ಲಿ ಕಾಣಿಸಿಕೊಂಡಿದ್ದರು. ಬಳಿಕ ವೈಯಕ್ತಿಕ ಕಾರಣಗಳಿಗಾಗಿ ಆ ಧಾರಾವಾಹಿಯಿಂದ ಹಿಂದೆ ಸರಿದರು. ‘ಅಗ್ನಿಸಾಕ್ಷಿ’ಯಲ್ಲಿ ಒಂದು ಪಾತ್ರ ಮಾಡಿದ್ದ ಅವರು ಈಗ ‘ನಂದಿನಿ-2’ರಲ್ಲಿ ದೇವಸೇನಾ ಪಾತ್ರ ನಿರ್ವಹಿಸುತ್ತಿದ್ದಾರೆ.

https://www.vijayavani.net/cheating-by-husband-to-wife-the-womans-struggle-for-justice/