ಕಾರವಾರ: ನನ್ನ ಹುಟ್ಟಿನ ಬಗ್ಗೆಯೂ ಬಿಜೆಪಿಗರು ಚರ್ಚೆ ಮಾಡುತ್ತಿದ್ದಾರೆ. ಹೌದು, ನಾನು ಹುಟ್ಟಿದ್ದು ಮುಂಬೈನಲ್ಲೇ. ಬೇಕಿದ್ದರೆ ಜನ್ಮ ದಾಖಲೆಯನ್ನೂ ಕೊಡುವೆ. ಇದೇ ಧರ್ಮ, ಜಾತಿಯಲ್ಲೇ ಹುಟ್ಟಬೇಕೆಂಬುದು ನಮ್ಮ ಕೈಯಲ್ಲಿ ಇರೋದಿಲ್ಲ; ಅದು ತಾಯಿಯಿಂದ ನಮಗೆ ಬರುವಂಥದ್ದು. ಆದರೆ ನನ್ನ ಕರ್ಮಭೂಮಿ, ಕೆಲಸ ಮಾಡುತ್ತಿರುವುದು ಕರ್ನಾಟಕದಲ್ಲಿ. ಈ ರಾಜ್ಯದ ಅನ್ನ ತಿಂದಿದ್ದೇನೆ, ನೀರು ಕುಡಿದಿದ್ದೇನೆ. ಆ ಋಣ ತೀರಿಸಲು ಸಮಾಜಸೇವೆಗೆ ಬಂದಿದ್ದೇನೆ. ಸಾವು ಕೂಡ ನನ್ನ ಕೈಯಲ್ಲಿಲ್ಲ, ಎಲ್ಲಿ ಸಾಯುತ್ತೇನೆಂದೂ ಗೊತ್ತಿಲ್ಲ. ಹುಟ್ಟು- ಸಾವುಗಳ ನಡುವೆ ಜನರಿಗಾಗಿ ಏನಾದರೂ ಮಾಡಬೇಕೆನ್ನುವುದಷ್ಟೇ ನನಗಿರುವುದು ಎಂದು 'ಡಾ.ಅಂಜಲಿ ನಿಂಬಾಳ್ಕರ್ ಮಹಾರಾಷ್ಟ್ರದವರು' ಎಂಬ ಬಿಜೆಪಿಗರ ಟೀಕೆಗೆ ಡಾ.ಅಂಜಲಿ ತಿರುಗೇಟು ನೀಡಿದರು.
