ಬೀದರ್​ನಲ್ಲಿ ಫೆಬ್ರವರಿ 7ರಿಂದ ಮೂರು ದಿನ ರಾಜ್ಯ ಮಟ್ಟದ ಪಶುಮೇಳ

ಬೆಂಗಳೂರು: ಬೀದರ್​ನಲ್ಲಿ ಫೆಬ್ರವರಿ 7ರಿಂದ ಮೂರು ದಿನ ನಡೆಯಲಿರುವ ರಾಜ್ಯ ಮಟ್ಟದ ಪಶುಮೇಳವನ್ನು ಯಶಸ್ವಿಗೊಳಿಸುವ ಕುರಿತಂತೆ ಪಶು ಸಂಗೋಪನಾ ಇಲಾಖೆ ಯೋಜನೆ ರೂಪಿಸಿದೆ.

ಬೆಂಗಳೂರಿನಲ್ಲಿ ಸೋಮವಾರ ಅಧಿಕಾರಿಗಳ ಸಭೆ ನಡೆಸಿದ ಪಶು ಸಂಗೋಪನಾ ಸಚಿವ ಪ್ರಭು ಚವ್ಹಾಣ್, ಮೇಳದಲ್ಲಿ ಯಾವುದೇ ಲೋಪವಾಗದಂತೆ ಎಚ್ಚರಿಕೆ ತೆಗೆದುಕೊಳ್ಳಬೇಕು ಎಂದು ಕಟ್ಟುನಿಟ್ಟಿನ ಸೂಚನೆ ನೀಡಿದರು. ಪಶುಮೇಳ ಇದೇ ಮೊದಲ ಬಾರಿಗೆ ನಡೆಯುತ್ತಿದೆ. ಸಿಎಂ ಬಿ.ಎಸ್.ಯಡಿಯೂರಪ್ಪ ಮೇಳ ಉದ್ಘಾಟಿಸುತ್ತಿದ್ದಾರೆ.

ಹಾಗಾಗಿ ಮೇಳವನ್ನು ದೊಡ್ಡ ಮಟ್ಟದಲ್ಲಿ ಆಯೋಜಿಸಬೇಕು. ಎಲ್ಲ ರೀತಿಯ ಜಾನುವಾರು ಅಲ್ಲಿ ಇರಬೇಕು. ಆ ರೀತಿಯ ವ್ಯವಸ್ಥೆ ಮಾಡಬೇಕೆಂದು ಹೇಳಿದರು. ಮೇಳಕ್ಕೆ ರಾಸುಗಳನ್ನು ಕರೆತರುವವರಿಗೆ ಊಟ, ವಸತಿ ವ್ಯವಸ್ಥೆ, ರಾಸುಗಳಿಗೆ ನೀರು, ನೆರಳು ಮತ್ತು ಮೇವಿನ ವ್ಯವಸ್ಥೆ ಮಾಡಬೇಕು. ಮೇಳ ಆಕರ್ಷಣೆಗೊಳ್ಳಲು ಮನರಂಜನೆ ಕಾರ್ಯಕ್ರಮ ಹಾಗೂ ರೈತರಿಗೆ ಮಾಹಿತಿ ನೀಡಲು ವಿಚಾರ ಗೋಷ್ಠಿ ನಡೆಸುವ ಸಲುವಾಗಿ ತಜ್ಞರನ್ನು ಆಹ್ವಾನಿಸಬೇಕು ಎಂದು ತಿಳಿಸಿದರು.

ದೊಡ್ಡ ಮಟ್ಟದಲ್ಲಿ ಇದೇ ಮೊದಲ ಬಾರಿಗೆ ಬೀದರ್​ನಲ್ಲಿ ಕಾರ್ಯಕ್ರಮ ನಡೆಯಲಿದ್ದು, ಯಾವುದೇ ಅಚಾತುರ್ಯ ನಡೆಯದಂತೆ ಅಧಿಕಾರಿಗಳಿಗೆ ಎಚ್ಚರವಹಿಸಲು ಸೂಚಿಸಿದರು. ಎಲ್ಲ ಅಧಿಕಾರಿಗಳು ಫೆ.1ರಿಂದಲೇ ಬೀದರ್​ನಲ್ಲಿ ಹಾಜರಿದ್ದು ಮೇಳದ ಎಲ್ಲ ಸಿದ್ಧತೆ ನೋಡಿಕೊಳ್ಳಬೇಕು.

ಆಯಾ ಸಮಿತಿಗಳ ಜವಾಬ್ದಾರಿಯನ್ನು ಹೊತ್ತ ಅಧಿಕಾರಿಗಳು ಸಮರ್ಪಕವಾಗಿ ಕಾರ್ಯ ನಿರ್ವಹಿಸಬೇಕು ಎಂದರು. ಸಭೆಯಲ್ಲಿ ಪಶುಸಂಗೋಪನಾ ಇಲಾಖೆ ಕಾರ್ಯದರ್ಶಿ ಎ. ಬಿ ಇಬ್ರಾಹಿಂ, ಬೀದರ್​ನ ಕರ್ನಾಟಕ ಪಶುವೈದ್ಯಕೀಯ ಪಶು ಹಾಗೂ ಮೀನುಗಾರಿಕೆ ವಿಜ್ಞಾನಗಳ ವಿಶ್ವವಿದ್ಯಾಲಯದ ಕುಲಪತಿ ಡಾ. ಎಚ್.ಡಿ. ನಾರಾಯಣಸ್ವಾಮಿ, ಇಲಾಖೆ ಆಯುಕ್ತರಾದ ನಟೇಶ್, ಜಾನುವಾರು ಸಂಪನ್ಮೂಲದ ಅಪರ ನಿರ್ದೇಶಕ ಮಂಜುನಾಥ ಪಾಳೇಗಾರ್ ಇತರರಿದ್ದರು.