ಅಪಘಾತಕ್ಕೆ ಕಾದಿದೆ ವಿದ್ಯುತ್​ ಕಂಬ

 ಶ್ರೀನಿವಾಸಪುರ: ತಾಲೂಕಿನ ಅಡ್ಡಗಲ್​ ಗ್ರಾಮದಿಂದ ಕೂರಿಗೇಪಲ್ಲಿ ಗ್ರಾಮಕ್ಕೆ ಸಂಪರ್ಕ ಕಲ್ಪಿಸುವ ಮುಖ್ಯರಸ್ತೆಯ ತಿರುವಿನಲ್ಲಿ ವಿದ್ಯುತ್​ ಕಂಬವೊಂದನ್ನು ಅವೈಜ್ಞಾನಿಕವಾಗಿ ಹಾಕಿದ್ದು, ವಾಹನ ಸವಾರರಿಗೆ ತಿರುವಿನಲ್ಲಿನ ಕಂಬ ಕಾಣಿಸದೆ ಅದೆಷ್ಟೊ ಚಾಲಕರು ಕೈದಲೆಳೆ ಅಂತರದಿಂದ ಅಪಘಾತದಿಂದ ತಪ್ಪಿಸಿಕೊಂಡಿದ್ದಾರೆ. ಇದರ ಮಧ್ಯೆ ಇತ್ತೀಚೆ ಕಾರೊಂದು ಕಂಬಕ್ಕೆ ಡಿಕ್ಕಿಯಾಗಿ ಪಕ್ಕದ ಹೊಲದಲ್ಲಿ ನಿಂತಿದ್ದು, ದೊಡ್ಡ ದುರಂತ ತಪ್ಪಿದೆ.

24 ಗಂಟೆಯೂ ವಿದ್ಯುತ್​ ಸರಬರಾಜು ಇರುವ ಈ ಲೈನ್​ನ ಕಂಬವು ಒಂದು ವೇಳೆ ರಸ್ತೆಗೆ ಬಿದ್ದಿದ್ದರೆ ವಿದ್ಯುತ್​ ತಾಗಿ ದೊಡ್ಡ ಅನಾಹುತ ನಡೆದೇ ಹೋಗುತ್ತಿತ್ತು ಎಂದು ಪ್ರತ್ಯಕ್ಷದರ್ಶಿಗಳು ಚಿತ್ರಣ ವಿವರಿಸಿದ್ದಾರೆ.

ಸಾರ್ವಜನಿಕರು ಹಲವು ಬಾರಿ ಬೆಸ್ಕಾಂ ಅಧಿಕಾರಿಗಳಿಗೆ ಕರೆ ಮಾಡಿ ಮಾಹಿತಿ ನೀಡಿದರೂ ಸಹ ಇಂದು&ನಾಳೆ ಎಂದೇ ಕಾಲ ನೂಕುತ್ತಾ ಬರುತ್ತಿದ್ದು, ಕಳೆದ 2ತಿಂಗಳಿಂದಲೂ ಕಂಬದ ಜಾಗ ಬದಲಾಯಿಸಿಲ್ಲ.

ಮಳೆ ಬೀಳುವ ಸಂದರ್ಭದಲ್ಲಿ ಬಹುತೇಕ ಗ್ರಾಮಗಳಲ್ಲಿ ವಿದ್ಯುತ್​ ಸಂಪರ್ಕವೂ ಸಹ ಕಡಿತವಾಗುತ್ತದೆ. ವಿದ್ಯುತ್​ ತಂತಿಗಳ ಮೇಲೆ ಹಾಗೂ ತಂತಿಗಳ ಕೆಳಗಡೆ ಮರಗಳು ಬೆಳೆದಿದ್ದರೂ ಸಹ ತೆರವುಗೊಳಿಸದೆ ಬೆಸ್ಕಾಂ ಅಧಿಕಾರಿಗಳು ನಿರ್ಲಕ್ಷ್ಯ  ತೋರಿದ್ದಾರೆ. ಈಗಲಾದರೂ ಸಂಬಂಧಪಟ್ಟ ಮೇಲಾಧಿಕಾರಿಗಳು ಇತ್ತ ಗಮನಹರಿಸಿ ಸಮಸ್ಯೆ ಬಗೆಹರಿಸುವ ಮೂಲಕ ಮುಂದಾಗುವ ಸಾವು&ನೋವುಗಳನ್ನು ತಡೆಯಬೇಕು ಎಂದು ಸ್ಥಳಿಯರು ಮತ್ತು ವಾಹನ ಸವಾರರು ಆಗ್ರಹಿಸಿದ್ದಾರೆ.