ಸ್ವಾತಂತ್ರೃ ಪೂರ್ವದಲ್ಲಿ ಬ್ರಿಟಿಷರು ವ್ಯಾಪಾರ ವಹಿವಾಟುಗಳಿಗೆ ಈ ಬಂದರನ್ನು ಅವಲಂಭಿಸಿದ ಐತಿಹ್ಯಗಳಿವೆ. 1970ರಲ್ಲಿ ನದಿ, ಸಾಗರ ಸಂಗಮದ ಈ ಪ್ರದೇಶದಲ್ಲಿ ಸರ್ಕಾರ ಬಂದರು ನಿರ್ಮಾಣ ಮಾಡಿತ್ತು. ನಿರ್ವಹಣೆ ಕೊರತೆಯಿಂದ ಬಂದರು, ಮಂಜುಗಡ್ಡೆ ಸ್ಥಾವರ, ಬಲೆ ನೇಯುವ ಕಟ್ಟಡ ಹಾಗೂ ಇತರ ವ್ಯವಸ್ಥೆ ಶಿಥಿಲಗೊಂಡಿತ್ತು. ಹತ್ತು ವರ್ಷ ಹಿಂದೆ ಬ್ರೇಕ್ವಾಟರ್ ನಿರ್ಮಾಣಕ್ಕೆ ಸುಮಾರು 9 ಕೋಟಿ ರೂ. ಅನುದಾನ ಹೊರತುಪಡಿಸಿದರೆ ಇತರ ಅನುದಾನ ಬಂದಿಲ್ಲ. ಔಟ್ಡೋರ್ ಬಂದರು, ಬ್ರೇಕ್ವಾಟರ್ ವಿಸ್ತರಣೆ, ಪಾತಿ ದೋಣಿಗಳ ನಿಲುಗಡೆ ಕೇಂದ್ರ ಆಗ್ರಹಿಸಿ ಮನವಿ ಸಲ್ಲಿಸಲಾಗಿತ್ತು. ಈ ಬಂದರು ಅಭಿವೃದ್ಧಿಗೆ ಸರ್ಕಾರ ಅಪರೂಪಕ್ಕೊಮ್ಮೆ ಒಂದಿಷ್ಟು ಅನುದಾನ ಬಿಡುಗಡೆ ಮಾಡಿದರೂ ನಿರೀಕ್ಷಿತ ಪ್ರಗತಿ ಕಂಡಿಲ್ಲ. ಹೀಗಾಗಿ ಮೀನುಗಾರಿಕೆಗೆ ಅತ್ಯುತ್ತಮ ಅವಕಾಶ ಇರುವ ಅಳ್ವೆಗದ್ದೆ ಬಂದರು ಹಲವು ಸಮಸ್ಯೆಗಳಿಂದ ಮೀನುಗಾರರು ತೊಂದರೆ ಅನುಭವಿಸುವಂತಾಗಿದೆ.
