ಕೋರ್ಟ್​ ಆದೇಶವಿದ್ದರೂ ಈತ ಪುರಸಭೆ ಸದಸ್ಯನಲ್ಲ!

ವಿಜಯವಾಣಿ ಸುದ್ದಿಜಾಲ ಕುಣಿಗಲ್​
ಪುರಸಭೆಯ 7ನೇ ವಾರ್ಡ್​ನ ಅನ್ಸರ್​ ಪಾಷಾ ಪುರಸಭೆ ಸದಸ್ಯ ಎಂದು ಹೈಕೋರ್ಟ್​ ಆದೇಶ ನೀಡಿದೆ. ಸರ್ಕಾರವೂ ಗೆಜೆಟ್​ ನೋಟಿಪಿಕೇಷನ್​ ಮಾಡಿದ್ದರೂ ರಾಜಕೀಯ ಒತ್ತಡಕ್ಕೆ ಮಣಿದು ಅಧಿಕಾರಿಗಳು ಆದೇಶ ಅನುಷ್ಠಾನ ಮಾಡಲು ಮೀನಮೇಷ ಎಣಿಸುತ್ತಿದ್ದಾರೆ ಎಂದು ತಾಲೂಕು ಜೆಡಿಎಸ್​ ಅಧ್ಯಕ್ಷ ಬಿ.ಎನ್​.ಜಗದೀಶ್​ ಆರೋಪಿಸಿದರು.

7ನೇ ವಾರ್ಡ್​ನ ಸದಸ್ಯರಾಗಿದ್ದ ಸಮೀವುಲ್ಲಾ ಸುಳ್ಳು ದಾಖಲಾತಿ ನೀಡಿ ಚುನಾವಣೆಯಲ್ಲಿ ಆಯ್ಕೆಯಾಗಿರುವ ಕುರಿತು ಜೆಡಿಎಸ್​ನ ಸಮೀಪ ಸ್ವರ್ಧಿ ಅನ್ಸರ್​ ಪಾಷಾ ನ್ಯಾಯಾಲಯದ ಮೊರೆ ಹೋಗಿದ್ದರು. ವಾದ&ಪ್ರತಿವಾದ ಆಲಿಸಿದ ನ್ಯಾಯಾಲಯ ಅನ್ಸರ್​ ಪಾಷಾ ಪುರಸಭೆ ಸದಸ್ಯರೆಂದು ಆದೇಶ ನೀಡಿದೆ. ಆದರೂ ಅಧಿಕಾರಿಗಳು ನ್ಯಾಯಾಲಯದ ಆದೇಶದಂತೆ ಸದಸ್ಯರೆಂದು ಘೋಷಣೆ ಮಾಡಿಲ್ಲ ಎಂದು ಪಟ್ಟಣದ ಜೆಡಿಎಸ್​ ಕಚೇರಿಯಲ್ಲಿ ಸುದ್ದಿಗೋಷ್ಠಿಯಲ್ಲಿ ದೂರಿದರು. ಇದರ ನಡುವೆ ಸಮೀವುಲ್ಲಾ ಹೈಕೋರ್ಟ್​ ಮೇಲ್ಮನವಿ ಹಾಕಿದ್ದರು. ಅಲ್ಲಿಯೂ ಅನ್ಸರ್​ ಪಾಷಾ ಅವರೇ ಸದಸ್ಯರೆಂದು ಕೋರ್ಟ್​ ಆದೇಶ ನೀಡಿದೆ.

ಸರ್ಕಾರವೂ ಗೆಜೆಟ್​ ನೋಟಿಪಿಕೇಷನ್​ ಮಾಡಿದೆ. ಈ ಆದೇಶ ಆಗಿ ಒಂದು ತಿಂಗಳು ಕಳೆದರೂ ಅನ್ಸರ್​ ಪಾಷಾ ಅವರನ್ನು ಸದಸ್ಯರೆಂದು ಅಧಿಕಾರಿಗಳು ಘೋಷಣೆ ಮಾಡಿಲ್ಲ ಎಂದು ಆರೋಪಿಸಿದರು. ಅಧಿಕಾರಿಗಳ ಈ ವರ್ತನೆಗೆ ಶಾಸಕ ಡಾ.ರಂಗನಾಥ್​ ಕಾರಣ. ತಾಲೂಕಿನ ಸರ್ಕಾರಿ ಕಚೇರಿಗಳು ಕಾಂಗ್ರೆಸ್​ ಕಚೇರಿಗಳಾಗಿವೆ ಎಂದು ಆರೋಪಿಸಿದರು.
ಪುರಸಭೆ ಸದಸ್ಯರಾದ ಶ್ರೀನಿವಾಸ್​, ಅನ್ಸರ್​ ಪಾಷಾ, ಮಾಜಿ ಸದಸ್ಯ ಇ.ಮಂಜು, ಮಾಜಿ ಅಧ್ಯಕ್ಷ ಕೆ.ಎಲ್​.ಹರೀಶ್​, ಮುಖಂಡರಾದ ರಂಗಸ್ವಾಮಿ, ನಾಗರಾಜು, ಮಂಜಣ್ಣ, ಜಗದೀಶ್​, ವಕ್ತಾರ ತರೀಕೆರೆ ಪ್ರಕಾಶ್​ ಇದ್ದರು.