ಬೆಳಗಾವಿಯಲ್ಲೂ ಮಿಯಾಜಾಕಿ ಹವಾ!

ಬೆಳಗಾವಿ: ವಿಶ್ವದಲ್ಲಿಯೇ ಅತ್ಯಂತ ದುಬಾರಿಯಾದ ಜಪಾನ್ ಮೂಲದ ‘ಮಿಯಾಜಾಕಿ’ ತಳಿಯ ಮಾವಿನ ಸಸಿ ಬೆಳಗಾವಿ ನಗರದ ಹ್ಯೂಮ್ ಪಾರ್ಕ್‌ನಲ್ಲಿಯೂ ಲಭ್ಯವಿದೆ.

ನಗರದ ಹ್ಯೂಮ್ ಪಾರ್ಕ್‌ನಲ್ಲಿ ಆ.25ರಿಂದ 27ರವರೆಗೆ ಜರುಗುತ್ತಿರುವ ಸಸ್ಯ ಸಂತೆಯಲ್ಲಿ ಮಾವು, ಪೇರು, ಸೇಬು, ಕಿತ್ತಳೆ, ವಿವಿಧ ಜಾತಿ ಹಣ್ಣುಗಳು, ಅಲಂಕಾರಿಕ ಹೂವುಗಳು ಸೇರಿ ಬರೋಬ್ಬರಿ 1 ಲಕ್ಷ ಸಸಿಗಳನ್ನು ಪ್ರದರ್ಶನಕ್ಕೆ ಈಡಲಾಗಿದೆ. ಇದರಲ್ಲಿ ಮಿಯಾಜಾಕಿ ತಳಿಯ ಎರಡು ಮಾವಿನ ಸಸಿಗಳು ಕೇಂದ್ರ ಬಿಂದುವಾಗಿವೆ.

ಜಪಾನದಲ್ಲಿ ಹೆಚ್ಚಾಗಿ ಬೆಳೆಯುವ ಮಿಯಾಜಾಕಿ ಮಾವಿನ ಹಣ್ಣು ವಿಶ್ವದಲ್ಲೇ ದುಬಾರಿ. ಕಳೆದ ವರ್ಷ ದೇಶದ ವಿವಿಧ ರಾಜ್ಯಗಳಲ್ಲಿ ಈ ಹಣ್ಣು ಒಂದು ಕೆಜಿಗೆ 2.50 ಲಕ್ಷ ರೂ.ಗೆ ಮಾರಾಟವಾಗಿತ್ತು. ಅಲ್ಲದೆ ದೇಶ, ವಿದೇಶಗಳಿಗೆ ಹೋಗಿ ಇದನ್ನು ಖರೀದಿಸಿ ತಂದಿದ್ದರು. ಈ ದುಬಾರಿ ಮಾವಿನ ಸಸಿಗಳನ್ನು ಈಗ ಬೆಳಗಾವಿ ಹ್ಯೂಮ್ ಪಾರ್ಕ್‌ನಲ್ಲಿ ಪ್ರದರ್ಶನಕ್ಕೆ ಈಡಲಾಗಿದೆ. ಈ ಒಂದು ಸಸ್ಯದ ಬೆಲೆ 4,500 ರೂ.ದಿಂದ ಆರಂಭವಾಗುತ್ತದೆ. ಹಾಗಾಗಿ ಇದನ್ನು ವೀಕ್ಷಿಸಲು ಜನರು ಮುಗಿಬಿದ್ದಿದ್ದಾರೆ.

ಅಲ್ಲದೆ, ಉತ್ತಮ ಗುಣಮಟ್ಟದ ಹೂವಿನ ಅಲಂಕಾರಿಕ ಸಸಿಗಳು, ಹಣ್ಣಿನ ಸಸಿಗಳು, ತಾಳೆ ಸಸಿಗಳು, ಅಣಬೆ ಉತ್ಪನ್ನಗಳು, ಜೇನು ಉತ್ಪನ್ನಗಳು, ಬೆಳಗಾವಿಯಲ್ಲಿ ಉತ್ಪಾದಿಸಿದ ವಿವಿಧ ಜೈವಿಕ ಗೊಬ್ಬರ, ರೋಗ ಮತ್ತು ಕೀಟನಾಶಕ ಹಾಗೂ ತೋಟಗಾರಿಕೆ ಕ್ಷೇತ್ರಗಳಲ್ಲಿ ಉತ್ಪಾದಿಸಿದ ಎರೆ ಜಲ, ಎರೆಹುಳು ಗೊಬ್ಬರ ಮಾರಾಟ ಮಾಡುತ್ತಿರುವುದು ವಿಶೇಷ. ಮೊದಲ ದಿನವೇ ಜಿಲ್ಲೆಯ ಹಲವು ಭಾಗಗಳಿಂದ ವಿವಿಧ ಮಾದರಿಯ ಸಸಿ ಖರೀದಿಸಲು ಸಾರ್ವಜನಿಕರು ಆಗಮಿಸಿದ್ದರು. ರೈತರು, ಗ್ರಾಹಕರು ತಮಗೆ ಅವಶ್ಯವಿರುವ ಸಸ್ಯಗಳು ಹಾಗೂ ವಸ್ತುಗಳನ್ನು ಖರೀದಿಸಿ ತೋಟಗಾರಿಕೆ ಉತ್ಪನ್ನಗಳಿಗೆ ಉತ್ತೇಜನ ನೀಡಿದರು.

ಸಂಸದೆ ಮಂಗಲ ಅಂಗಡಿ ಚಾಲನೆ

ಬೆಳಗಾವಿ ನಗರದ ಹ್ಯೂಮ್ ಪಾರ್ಕ್‌ನಲ್ಲಿ ಸಸ್ಯ ಸಂತೆ, ತೋಟಗಾರಿಕೆ ಅಭಿಯಾನ ಮತ್ತು ತಾಳೆ ಬೆಳೆ ಸಸಿ ವಿತರಣಾ ಕಾರ್ಯಕ್ರಮಕ್ಕೆ ಸಂಸದೆ ಮಂಗಲ ಅಂಗಡಿ, ಶಾಸಕ ರಾಜು ಸೇಠ್ ಉದ್ಘಾಟಿಸಿದರು. ಬಳಿಕ ಸಸ್ಯ ಮಾರಾಟ ಮಳಿಗೆಯಲ್ಲಿರುವ ವಿವಿಧ ಹಣ್ಣು ವೀಕ್ಷಣೆ ಮಾಡಿದರು. ಮಹಾಂತೇಶ ಮುರಗೋಡ ಹಾಗೂ ತೋಟಗಾರಿಕೆ ಇಲಾಖೆ ಅಧಿಕಾರಿಗಳು ಇತರರಿದ್ದರು.