ಅಸ್ತ್ರ ಗ್ರೂಪ್‌ನಿಂದ ಕೋಟ್ಯಂತರ ರೂ. ವಂಚನೆ ಆರೋಪ

ಮಾಲೀಕ ಲಂಚುಲಾಲ್ ತಿಂಗಳಿಗೊಂದು ಐಷಾರಾಮಿ ಪ್ಲಾೃಟ್‌ಗಳು, ಕಾರುಗಳು, ಚಿನ್ನಾಭರಣ ಸೇರಿದಂತೆ ದುಬಾರಿ ಬಹುಮಾನಗಳ ಆಸೆ ತೋರಿಸಿ ಅಸ್ತ್ರ ಲಕ್ಕಿ ಸ್ಕೀಮ್ ಮಾಡಿ ಏಜೆಂಟರ ಮೂಲಕ ಸಾವಿರಾರು ಮಂದಿಯಿಂದ ಪ್ರತಿ ತಿಂಗಳು ಹಣ ಕಟ್ಟಿಸಿಕೊಂಡು, ಬಳಿಕ ನಿಗದಿತ ಸಮಯಕ್ಕೆ ಹಿಂತಿರುಗಿಸದೆ ಕೋಟ್ಯಂತರ ರೂ. ವಂಚನೆ ಮಾಡಿದ್ದಾರೆ ಎಂದು ಗ್ರಾಹಕರು ಆರೋಪಿಸಿದ್ದಾರೆ.

ತುಳು ಸಿನಿಮಾದ ಸೆಲೆಬ್ರಿಟಿಗಳನ್ನು ಬಳಸಿ ೇಸ್‌ಬುಕ್, ಇನ್‌ಸ್ಟಾಗ್ರಾಂ, ಯೂಟ್ಯೂಬ್ ಖಾತೆಗಳ ಮೂಲಕ ಪ್ರಚಾರ ಮಾಡಿ ಸುಲಭದಲ್ಲಿ ಸ್ಕೀಮ್‌ಗೆ ಗ್ರಾಹಕರನ್ನು ಬಲೆಗೆ ಬೀಳಿಸಲಾಗಿತ್ತು. ಸ್ಕೀಮ್‌ವೊಂದಕ್ಕೆ ತಿಂಗಳ ಕಂತು 1ಸಾವಿರ ರೂ. ನಿಗದಿಪಡಿಸಲಾಗಿದ್ದು, 12ಕಂತುಗಳನ್ನು ಕಟ್ಟಬೇಕಿತ್ತು. ಸಂಗ್ರಹವಾದ ಮೊತ್ತದಲ್ಲಿ ಪ್ರತಿ ತಿಂಗಳು ್ಲ್ಯಾಟ್, ಕಾರು, ಬೈಕ್, ಚಿನ್ನ, ನಗದು ಸೇರಿದಂತೆ 50ಲಕ್ಷಕ್ಕೂ ಅಧಿಕ ಮೊತ್ತ ಬಹುಮಾನಕ್ಕೆ ಇಡಬೇಕಿತ್ತು. ಈಗ ಸ್ಕೀಮ್‌ಗಳ 12 ಕಂತು ಅವಧಿ ಮುಗಿದು, ನಿಯಮ ಪ್ರಕಾರ ಸ್ಕೀಮ್‌ನ ಮೊತ್ತಕ್ಕೆ 1ಅಥವಾ 2ಸಾವಿರ ರೂ. ಸೇರಿಸಿ ಹಣ ವಾಪಾಸ್ ನೀಡಬೇಕು. ಕೆಲವೊಂದು ಸ್ಕೀಂನಲ್ಲಿ ಅಷ್ಟೇ ಪ್ರಮಾಣದ ಚಿನ್ನ ವಾಪಾಸ್ ನೀಡುವುದೆಂದು ಭರವಸೆ ನೀಡಲಾಗಿತ್ತು. ಸ್ಕೀಮ್‌ಗಳ ಅವಧಿ ಮುಗಿದು 4-5 ತಿಂಗಳು ಕಳೆದರೂ ಇನ್ನೂ ಹಣ ವಾಪಾಸ್ ನೀಡಿಲ್ಲ.

ಪ್ರತಿ ಸ್ಕೀಮ್ ಮುಗಿಯುವಾಗ ಡ್ರಾ ವಿಜೇತರಾಗದ ಎಲ್ಲರಿಗೂ ಹಣ ಹಿಂತಿರುಗಿಸಬೇಕಿದ್ದರೂ, ಏಜೆಂಟರು ಅವರೆಲ್ಲರನ್ನೂ ಮುಂದಿನ ಸ್ಕೀಮ್‌ಗೆ ಸೇರಿಸಿ ಹಣ ಕಟ್ಟುವಂತೆ ಮಾಡುತ್ತಿದ್ದರು. ಇದೀಗ ಮೂರು ಸೀಸನ್‌ನಲ್ಲಿ ಹಣ ಕಟ್ಟಿದರೂ, ಒಂದು ಬಾರಿಯೂ ಹಣ ಸಿಗದವರು ನಿರಂತರವಾಗಿ ಕಂಪೆನಿಯ ಕಚೇರಿಗೆ ಬಂದು ಏಜೆಂಟರ ಹಾಗೂ ಸಿಬ್ಬಂದಿ ಬಳಿ ಹಣ ಕೇಳುತ್ತಿದ್ದಾರೆ.

ಬಣ್ಣದ ಮಾತುಗಳಿಂದ ಗ್ರಾಹಕರನ್ನು ನಂಬಿಸಿ ಪ್ರತಿ ತಿಂಗಳು ಹಣ ಕಟ್ಟುವಂತೆ ಮಾಡಿದ್ದ ಏಜೆಂಟರೂ ಈಗ ಉತ್ತರ ನೀಡುವಲ್ಲಿ ವಿಫಲರಾಗಿದ್ದಾರೆ. ಕಳೆದ ಎಪ್ರಿಲ್‌ನಿಂದಲೇ ವ್ಯವಹಾರದಲ್ಲಿ ವ್ಯತ್ಯಾಸವಾಗಿರುವುದು ಕೆಲವು ಏಜೆಂಟರ ಗಮನಕ್ಕೆ ಬಂದಿತ್ತು. ಈ ಸಂದರ್ಭ ಬ್ಯಾಂಕ್ ಖಾತೆ ಪ್ರೀಜ್ ಆಗಿದ್ದು, ಶೀಘ್ರದಲ್ಲೇ ಸರಿಯಾಗಲಿದೆ ಎಂದು ಲಂಚುಲಾಲ್ ನಂಬಿಸಿದ್ದರು. ಜೋರು ಮಾಡುತ್ತಿದ್ದ ಏಜೆಂಟರಿಗೆ ಒಂದಷ್ಟು ಹಣ ಲಭಿಸಿದೆ ಎನ್ನುವ ಮಾಹಿತಿ ಲಭ್ಯವಾಗಿದೆ. ಈ ಬಗ್ಗೆ ಯಾರು ಕೂಡಾ ಪೊಲೀಸ್ ದೂರು ನೀಡಿದ ಬಗ್ಗೆ ವಿವರ ಲಭ್ಯವಾಗಿಲ್ಲ. ಸದ್ಯ ಮೂರು ದಿನಗಳಿಂದ ಮಾಲೀಕ ಲಂಚುಲಾಲ್ ಹಾಗೂ ಆತನ ಆಪ್ತರು ಸದ್ಯ ಯಾರಿಗೂ ಸಂಪರ್ಕಕ್ಕೆ ಸಿಗದೆ ತಪ್ಪಿಸಿಕೊಂಡಿದ್ದಾರೆ ಎಂದು ಹೇಳಲಾಗುತ್ತಿದೆ.

ಸ್ಕೀಮ್‌ಗಳ ಬಗ್ಗೆ ಸಾರ್ವಜನಿಕರು ಎಚ್ಚರ ವಹಿಸುವಂತೆ ಪೊಲೀಸರು ವರ್ಷದ ಹಿಂದೆಯೇ ಎಚ್ಚರಿಕೆ ನೀಡಿದ್ದರು. ಮಾಧ್ಯಮಗಳಲ್ಲೂ ಈ ಬಗ್ಗೆ ವರದಿ ಪ್ರಸಾರವಾಗಿತ್ತು. ಆದರೆ ಜನ ಇದಕ್ಕೆ ಕ್ಯಾರೆನ್ನದೆ ನಂಬಿಕೆ ಇಟ್ಟು ಸ್ಕೀಮ್‌ಗೆ ಹಣ ಕಟ್ಟಿದರು. ಈಗ ಹಣ ಕಳೆದುಕೊಂಡು ಓಡಾಡುತ್ತಿದ್ದಾರೆ.