ಕಬಳಿಕೆ ಮಾಡಿರುವ ಸರ್ಕಾರಿ ಜಾಗಕ್ಕೆ ಗೌರಿಶಂಕರ್ ಎಂಬುವವರ ಹೆಸರಿಗೆ ಪಾಲಿಕೆಯ ಜೆ.ಪಿ.ನಗರ ಉಪ ವಿಭಾಗದ ಸಹಾಯಕ ಕಂದಾಯ ಅಧಿಕಾರಿಗಳ ಕಚೇರಿಯಿಂದ ಕಾನೂನು ಬಾಹಿರವಾಗಿ ಖಾತಾ ಮಾಡಿಕೊಡಲಾಗಿದೆ. ಸದರಿ ಸಾರಕ್ಕಿ ಗ್ರಾಮದ ಸರ್ವೆ ನಂ. 73ರ ಸರ್ಕಾರಿ ಜಮೀನು ಶಾಕಾಂಬರಿನಗರಕ್ಕೆ (ವಾರ್ಡ್ ಸಂಖ್ಯೆ 179) ಒಳಪಟ್ಟಿದೆ. ಆದರೆ, ಪಾಲಿಕೆಯ ಕಂದಾಯ ವಿಭಾಗದ ಕೆಲ ಅಧಿಕಾರಿಗಳು ಭೂಕಬಳಿಕೆದಾರರೊಂದಿಗೆ ಶಾಮೀಲಾಗಿ ಜೆ.ಪಿ.ನಗರ ವಾರ್ಡ್ (ವಾರ್ಡ್ ಸಂಖ್ಯೆ 177) ವ್ಯಾಪ್ತಿಯ ಸ್ವತ್ತಿನ ಸಂಖ್ಯೆಯೊಂದನ್ನು ಬಳಸಿ ಹೊಸದಾಗಿ ಖಾತಾ ಮಾಡಿ ಅದನ್ನೇ ಮಂಜೂರಾತಿ ಪತ್ರವನ್ನಾಗಿ ನೀಡಲಾಗಿದೆ. ಈ ಬಗ್ಗೆ ದಾಖಲೆ ಬದಲಾಗಿರುವ ವಿಷಯವನ್ನು ನೈಜ ಸ್ವತ್ತಿಗೆ ಹೊಂದಿಕೊಂಡಿರುವ ನವೋದಯ ಬಡಾವಣೆಯ ನಿವಾಸಿಗಳು ಹಲವು ಬಾರಿ ಪಾಲಿಕೆ ಗಮನಕ್ಕೆ ತಂದರೂ ಅಧಿಕಾರಿಗಳು ಸ್ಪಂದಿಸಿಲ್ಲ. ಈಗ ದಾಖಲೆಗಳನ್ನು ಸಂಗ್ರಹಿಸಿ ಸ್ವತ್ತು ಕಬಳಿಕೆ ಆಗಿರುವುದನ್ನು ನಗರ ಜಿಲ್ಲಾಧಿಕಾರಿ ಹಾಗೂ ಪಾಲಿಕೆ ಮುಖ್ಯ ಆಯುಕ್ತರಿಗೆ ದೂರು ನೀಡಲಾಗಿದೆ ಎಂದು ಎನ್.ಆರ್.ರಮೇಶ್ ತಿಳಿಸಿದ್ದಾರೆ.
