ಹೂ, ತರಕಾರಿಗಳ ಬೆಲೆ ಗಗನಕ್ಕೇರಿದೆ. ಆದಾಗ್ಯೂ ಜನರು ಖರೀದಿಯಲ್ಲಿ ಹಿಂದೆ ಬೀಳಲಿಲ್ಲ. ಒಂದು ಮೊಳ ಸೇವಂತಿಗೆ ಹೂವು 100 ರೂ., ಬಣ್ಣದ ಸೇವಂತಿಗೆ 85 ರೂ., ಗುಲಾಬಿ ಕೆ.ಜಿ.ಗೆ 300 ರೂ., ಮಲ್ಲಿಗೆ ಮೀಟರ್ಗೆ 45 ರೂ., ಕನಕಾಂಬರ ಮೀಟರ್ಗೆ 250ರಿಂದ 280 ರೂ., ತಾವರೆ ಹೂ ಒಂದಕ್ಕೆ 25 ರೂ., ದಾಳಿಂಬೆ ಕೆ.ಜಿ. 125 ರೂ., ಸೇಬು 150 ರೂ., ಮೂಸಂಬಿ 55 ರೂ., ದ್ರಾಕ್ಷಿ 100 ರಿಂದ 150 ರೂ., ಸೀತಾಫಲ 80 ರೂ., ಬಾಳೆಹಣ್ಣು 40 ರಿಂದ 90 ರೂ., ಜೋಡಿ ಬಾಳೆಕಂದು 20 ರೂ.ಗೆ ಮಾರಾಟ ಮಾಡಲಾಯಿತು.
ಗೌರಿ ಮತ್ತು ಗಣೇಶನ ವಿಗ್ರಹ ಖರೀದಿ ಮತ್ತು ಮಾರಾಟ ಪ್ರಕ್ರಿಯೆ ಬಿರುಸಿನಿಂದ ನಡೆಯಿತು. ಪರಿಸರ ಸ್ನೇಹಿ ಮಣ್ಣಿನ ಗಣೇಶ ವಿಗ್ರಹ ಖರೀದಿಗೆ ಹೆಚ್ಚಿನ ಸಂಖ್ಯೆಯ ಗ್ರಾಹಕರು ಒಲವು ತೋರಿಸಿದ್ದು, ಕೆಲವೆಡೆ ಪಿಒಪಿ ಮೂರ್ತಿ ಖರೀದಿಯೂ ಕಂಡುಬಂತು.
ನಗರದ ಪ್ರಮುಖ ಗಣೇಶ ದೇವಸ್ಥಾನಗಳಲ್ಲೂ ವಿಶೇಷ ತಯಾರಿ ಮಾಡಿಕೊಂಡು, ವಿದ್ಯುತ್ ದೀಪಾಲಂಕಾರ ಮಾಡಲಾಗಿದೆ. ಮುಜರಾಯಿ ಇಲಾಖೆಯ ಅರಮನೆ ಉತ್ತರ, ಪಶ್ಚಿಮ ಬಾಗಿಲಿನ ವಿನಾಯಕ ದೇವಸ್ಥಾನ, ಮಹಾರಾಜ ಸಂಸ್ಕೃತ ಕಾಲೇಜು ಆವರಣ, ಅಗ್ರಹಾರದ ದೇವೀರಮ್ಮಣ್ಣಿ ಗಣಪತಿ ದೇವಸ್ಥಾನ, ನೂರೊಂದು ದೇವಸ್ಥಾನ, ಆರ್ಎಂಸಿ ಬಳಿಯ ಪಂಚಮುಖಿ ದೇವಸ್ಥಾನ, ಕೆ.ಆರ್.ಪೊಲೀಸ್ ಠಾಣೆ ಪಕ್ಕದ ಗಣಪತಿ ದೇವಸ್ಥಾನ, ವಿನಾಯಕ ನಗರದ ಗಣಪತಿ ದೇವಸ್ಥಾನ ಸೇರಿದಂತೆ ಇನ್ನಿತರ ವಿನಾಯಕ ದೇವಸ್ಥಾನದಲ್ಲಿ ವಿಶೇಷ ತಯಾರಿ ಮಾಡಿಕೊಳ್ಳಲಾಗಿದೆ.
