ಮಾ.6ರಂದು ಶೀರೂರು ಮಠದಲ್ಲಿ ಅಕ್ಕಿ ಮುಹೂರ್ತ...

ಭಾವಿ ಪರ್ಯಾಯ ವೇದವರ್ಧನ ಶ್ರೀ ಮಾಹಿತಿ

ಅನ್ನದಾನಕ್ಕೆ ಕೈಜೋಡಿಸುವಂತೆ ಸದ್ಭಕ್ತರಿಗೆ ಕರೆ

ವಿಜಯವಾಣಿ ಸುದ್ದಿಜಾಲ ಉಡುಪಿ

ಉಡುಪಿ ಶ್ರೀಕೃಷ್ಣನ ಮುಂದಿನ ಪರ್ಯಾಯ ಸೇವೆಯು ಅಷ್ಟ ಮಠಗಳಲ್ಲೊಂದಾದ ಶೀರೂರು ಮಠಕ್ಕೆ ಒದಗಿಬಂದಿದ್ದು, ನಮ್ಮ ಪ್ರಥಮ ಪರ್ಯಾದಲ್ಲಿ ಅನ್ನದಾನಕ್ಕೆ ಪ್ರಥಮಾದ್ಯತೆ ನೀಡಲಾಗಿದೆ. ತನ್ನಿಮಿತ್ತ ಮಾ.6ರಂದು ಬೆಳಗ್ಗೆ 11:10ಕ್ಕೆ ಸಲ್ಲುವ ವೃಷಭ ಲಗ್ನದಲ್ಲಿ ಶ್ರೀಮಠದಲ್ಲಿ ಅಕ್ಕಿ ಮುಹೂರ್ತ ನಡೆಯಲಿದೆ ಎಂದು ಶೀರೂರು ಮಠಾಧೀಶ ವೇದವರ್ಧನ ತೀರ್ಥ ಶ್ರೀಪಾದರು ಮಾಹಿತಿ ನೀಡಿದರು.

ಎಲ್ಲ ಮಠಾಧೀಶರ ಉಪಸ್ಥಿತಿ

ಶೀರೂರು ಮಠದ ದಿವಾನ ಉದಯಕುಮಾರ ಸರಳತ್ತಾಯ ಮಾತನಾಡಿ, ಈಗಾಗಲೇ ಕಳೆದ ಡಿಸೆಂಬರ್​ ತಿಂಗಳಲ್ಲಿ ಶೀರೂರು ಪರ್ಯಾಯದ ಪ್ರಥಮ ಕಾರ್ಯವಾಗಿ ಬಾಳೆ ಮುಹೂರ್ತ ನಡೆದಿದೆ. ಎಲ್ಲ ಮುಹೂರ್ತಗಳಿಗಿಂತಲೂ ಅಕ್ಕಿ ಮುಹೂರ್ತ ಅತ್ಯಂತ ಮಹತ್ವದ ಕಾರ್ಯವಾಗಿದೆ. ಮಾ.6ರಂದು ಬೆಳಗ್ಗೆ 6 ಗಂಟೆಗೆ ಎಲ್ಲ ಮಠಗಳಿಗೆ ತೆರಳಿ ಶ್ರೀಗಳಿಗೆ ಆಹ್ವಾನ ನಡೆಯಲಿದೆ. ಎಲ್ಲ ಶ್ರೀಗಳು ತಮ್ಮ ಪಟ್ಟದ ದೇವರುಗಳೊಂದಿಗೆ ಶೀರೂರು ಮಠಕ್ಕೆ ಆಗಮಿಸಿ ಪೂಜೆ ನೆರವೇರಿಸಲಿದ್ದಾರೆ. ಬೆಳಗ್ಗೆ 9 ಗಂಟೆಗೆ ಶೀರೂರು ಮಠದ ಪಟ್ಟದ ದೇವರಾದ ವಿಠ್ಠಲ ದೇವರಿಗೆ ಪೂಜೆ, ಪ್ರಾರ್ಥನೆ ನಡೆಯಲಿದೆ ಎಂದರು.

ಅಕ್ಕಿ ಮುಡಿಯೊಂದಿಗೆ ಮೆರವಣಿಗೆ

ಬೆಳಗ್ಗೆ 9:30ಕ್ಕೆ ಶೀರೂರು ಮಠದಿಂದ ಮೆರವಣಿಗೆ ಹೊರಟು ರಥಬೀದಿಯಲ್ಲಿರುವ ಚಂದ್ರಮೌಳೇಶ್ವರ, ಅನಂತೇಶ್ವರ ದೇಗುಲ, ಶ್ರೀಕೃಷ್ಣ ಮಠ, ಮುಖ್ಯಪ್ರಾಣ ಹಾಗೂ ಗರುಡ ದೇವರಿಗೆ ಪ್ರದಕ್ಷಿಣಾಕಾರವಾಗಿ ಪ್ರಾರ್ಥನೆ ನಡೆಯಲಿದೆ. ನಂತರ ಸಂಸ್ಕೃತ ಕಾಲೇಜಿನ ಬಳಿ ಸಂಗ್ರಹಿಸಿರುವ ಅಕ್ಕಿ ಮುಡಿಯನ್ನು ಸ್ವರ್ಣ ಪಲ್ಲಕಿಯಲ್ಲಿಟ್ಟು ಮತ್ತೆ ಮೆರವಣಿಗೆ ಮೂಲಕ ಶ್ರೀಮಠಕ್ಕೆ ಆಗಮಿಸಿ 11:10ಕ್ಕೆ ಅಕ್ಕಿ ಮುಹೂರ್ತ ನಡೆಯಲಿದೆ ಎಂದು ತಿಳಿಸಿದರು.

ಆಮಂತ್ರಣ ಪತ್ರಿಕೆ ಬಿಡುಗಡೆ