ಅಂತರ ಬೆಳೆ ಪದ್ಧತಿ: ಮಳೆಗಾಲದಲ್ಲಿ ಭತ್ತ ಬೆಳೆಯುವ ಪಾಂಡುರಂಗ, ಅದೇ ಭೂಮಿಯಲ್ಲಿ ರಾಗಿ, ತೊಗರಿ, ಅಲಸಂದೆ, ಉದ್ದು ಇತ್ಯಾದಿಗಳನ್ನು ಪ್ರಮುಖ ಬೆಳೆಯಾಗಿ ಬೆಳೆಯುತ್ತಾರೆ. ಇದರ ಜತೆಗೆ ತರಕಾರಿ ಬೆಳೆಗಳಾದ ಬೆಂಡೆ, ಬದನೆ, ಬೀನ್ಸ್, ಟೊಮ್ಯಾಟೋ, ಮೆಣಸಿನಕಾಯಿ, ಅರಿಶಿನವನ್ನೂ ಸಮೃದ್ಧವಾಗಿ ಬೆಳೆಯುತ್ತಾರೆ. ಈಗ 3 ಎಕರೆ ಪ್ರದೇಶದಲ್ಲಿ ಮೆಣಸಿನ ಕಾಯಿ ಗಿಡ ಹಾಕಲಾಗಿದೆ. ಎರಡೂವರೆ ಎಕರೆ ಪ್ರದೇಶದಲ್ಲಿ ಕಬ್ಬನ್ನೂ ಬೆಳೆದು ಚುಂಚನಕಟ್ಟೆ ಸಕ್ಕರೆ ಕಾರ್ಖಾನೆಗೆ ಪೂರೈಸುತ್ತಿದ್ದಾರೆ. ಈ ಬಾರಿ ಬಣ್ಣಾರಿ ಅಮ್ಮನ್ ಕಾರ್ಖಾನೆಗೆ ಕಬ್ಬು ಪೂರೈಸಲಿದ್ದಾರೆ. ಉಳಿದ ಬೆಳೆಗಳನ್ನು ಹೆಬ್ಬಾಳು ಮಾರುಕಟ್ಟೆಯಲ್ಲಿಯೇ ಮಾರಾಟ ಮಾಡುತ್ತಾರೆ. ತೀರಾ ಅನಿವಾರ್ಯವಾದಲ್ಲಿ ಮಾತ್ರ ಕೆ.ಆರ್.ನಗರ ಪಟ್ಟಣಕ್ಕೆ ತೆಗೆದುಕೊಂಡು ಹೋಗುತ್ತಾರೆ. 2 ಎಕರೆಯಲ್ಲಿ ಪಾಂಡುರಂಗ ಅವರು ತೆಂಗಿನ ತೋಟ ಮಾಡಿದ್ದಾರೆ. ಜಮೀನಿನ ಬದುಗಳ ಮೇಲೆ ದಾಳಿಂಬೆ, ಸೀಬೆ, ಮಾವು, ಸಪೋಟಾ, ಹುಣಸೆ, ಬೇವು, ತೇಗದ ಮರಗಳನ್ನು ಬೆಳೆಸಿದ್ದಾರೆ. ಇದರೊಂದಿಗೆ ಹಸುಗಳ ಮೇವಿಗಾಗಿ ನೇಪಿಯಾರ್, ಕೆಂಪುಕಡ್ಡಿ ಹುಲ್ಲು, ಗಿನಿ ಹುಲ್ಲು, ಕುದುರೆ ಮಸಾಲೆ, ಮೇವಿನ ಜೋಳ, ಅಲಸಂದೆ ಬೆಳೆಯುತ್ತಿದ್ದಾರೆ. ಇದರಿಂದ ಹಸುಗಳು ಗುಣಮಟ್ಟದ ಹಾಲು ಕೊಡುತ್ತವೆ.
