ಎರಡೂವರೆ ದಶಕಗಳಲ್ಲಿ ಪಕ್ಷದ ನಾಯಕರಲ್ಲಿನ ಸಮನ್ವಯ ಕೊರತೆ, ಅಭ್ಯರ್ಥಿ ಆಯ್ಕೆ ಗೊಂದಲ, ಮೈತ್ರಿ ಕಾರಣದಿಂದ ಕಾಂಗ್ರೆಸ್ ಲೋಕ ಅಖಾಡದಲ್ಲಿ ಪಡೆದುಕೊಂಡಿದ್ದಕ್ಕಿಂತ ಕಳೆದುಕೊಂಡಿದ್ದೇ ಹೆಚ್ಚು. ವಿಧಾನಸಭೆ ಚುನಾವಣೆಯಲ್ಲಿ ಉತ್ತಮ ಸಾಧನೆ ಮಾಡಿ, ರಾಜ್ಯದಲ್ಲಿ ಸರ್ಕಾರ ರಚನೆಯಾದರೂ ಲೋಕಸಭಾ ಚುನಾವಣೆಯಲ್ಲಿ ಎಡವಿದ್ದು ಈಗ ಇತಿಹಾಸ.
ಸಮಾಜವಾದದ ಹೋರಾಟದ ಕರ್ಮಭೂಮಿಯಾಗಿದ್ದ ಶಿವಮೊಗ್ಗ ಜಿಲ್ಲೆಯಲ್ಲಿ ಬಳಿಕ ಕಾಂಗ್ರೆಸ್ ಬೇರು ಆಳವಾಯಿತು. ಆದರೆ ಪಕ್ಷಾಂತರಿಗಳ ಹೊಡೆತ, ನಾಯಕರ ತಪ್ಪು ನಿರ್ಧಾರಗಳು ಪಕ್ಷವನ್ನು ಬಸವಳಿಯುವಂತೆ ಮಾಡಿದವು. ಈಗಿನ ಚುನಾವಣೆ ಕಾಂಗ್ರೆಸ್ಗೆ ಅತ್ಯಂತ ಮಹತ್ವದ್ದೆನಿಸಿದೆ.
ಜಿಲ್ಲಾ ಉಸ್ತುವಾರಿ ಸಚಿವರ ಸಹೋದರಿಯೇ ಈ ಬಾರಿ ಪಕ್ಷದ ಅಭ್ಯರ್ಥಿ. ಜಿಲ್ಲೆಯ ಮೂವರು ಶಾಸಕರು ರಾಜ್ಯ ಸರ್ಕಾರದ ನಿಗಮ-ಮಂಡಳಿಯಲ್ಲಿ ಸೇರಿ ಕ್ಯಾಬಿನೆಟ್ ದರ್ಜೆಯ ಸ್ಥಾನಮಾನ ಪಡೆದಿದ್ದಾರೆ. ಹೀಗಾಗಿ ಕಾಂಗ್ರೆಸ್ ಪಾಲಿಗೆ ಇದು ಅತ್ಯಂತ ಪ್ರತಿಷ್ಠೆಯ, ಒಂದರ್ಥದಲ್ಲಿ ಪಕ್ಷದ ಭವಿಷ್ಯವನ್ನು ನಿರ್ಧರಿಸುವ ಚುನಾವಣೆಯೂ ಹೌದು.
ಬಿ.ಎಸ್.ಯಡಿಯೂರಪ್ಪ ಕುಟುಂಬದ ವಿರುದ್ಧ ಲೋಕಸಭಾ ಅಖಾಡದಲ್ಲಿ ನಾಲ್ಕು ಬಾರಿ ಸೋಲಿನ ಕಹಿ ಉಂಡಿರುವ ಬಂಗಾರಪ್ಪ ಕುಟುಂಬಕ್ಕೆ ಇದು ಮಹತ್ವದ ಸಂದರ್ಭ. ಜಿಲ್ಲಾ ಉಸ್ತುವಾರಿ ಸಚಿವ ಮಧು ಬಂಗಾರಪ್ಪ ಪಟ್ಟುಹಿಡಿದು ಸಹೋದರಿಗೆ ಟಿಕೆಟ್ ತಂದಿದ್ದಾರೆ. ಅವರನ್ನು ಗೆಲುವಿನ ದಡ ಸೇರಿಸುವ ದೊಡ್ಡ ಹೊಣೆಗಾರಿಕೆ ಹೆಗಲೇರಿದೆ.
ಒಳಜಗಳವೂ ಮಾರಕ: ಕಾಂಗ್ರೆಸ್ನಲ್ಲಿ ಟಿಕೆಟ್ ಘೋಷಣೆ ಬಳಿಕ ಅಸಮಾಧಾನ ಸ್ಫೋಟಗೊಳ್ಳುವ ಸಂದರ್ಭವೇ ಹೆಚ್ಚು. 2014ರಲ್ಲಿ ಮಂಜುನಾಥ ಭಂಡಾರಿ ಅವರನ್ನು ಪಕ್ಷದ ಅಭ್ಯರ್ಥಿ ಎಂದು ಘೋಷಿಸಿದ ಬಳಿಕ ಅಂದು ಕಾಂಗ್ರೆಸ್ನಲ್ಲಿದ್ದ ಕುಮಾರ್ ಬಂಗಾರಪ್ಪ ಬಹಿರಂಗವಾಗಿ ಅಸಮಾಧಾನ ಹೊರಹಾಕಿದ್ದರು. ಆರಂಭದಲ್ಲಿ ಪ್ರಚಾರ ಕಣದಿಂದಲೇ ದೂರ ಉಳಿದಿದ್ದರು. ಅವರ ಮನವೊಲಿಸಲು ಅಂದು ಕೇಂದ್ರ ಮಾಜಿ ಸಚಿವ ಎಸ್.ಎಂ.ಕೃಷ್ಣ ಅವರೇ ತೀರ್ಥಹಳ್ಳಿಗೆ ಬರಬೇಕಾಯಿತು. ಇದರ ಪರಿಣಾಮವಾಗಿ ಅಂದು ಕಾಂಗ್ರೆಸ್ ದೊಡ್ಡ ಅಂತರದ ಸೋಲನುಭವಿಸಿತು.
ಕುಗ್ಗಿಹೋಗಿದ್ದ ಕೈ ಪಡೆ: ಒಂದೇ ದಶಕದಲ್ಲಿ ಎರಡು ಪಕ್ಷ ಕಟ್ಟಿದ್ದು, ಮೂರು ಪಕ್ಷಗಳಿಗೆ ವಲಸೆ ಹೋದ ಬಂಗಾರಪ್ಪ, ಮಧ್ಯೆ ಮಧ್ಯೆ ಕಾಂಗ್ರೆಸ್ಗೂ ಬಂದು ಹೋದರು. 1996ರಲ್ಲಿ ತಾವೇ ಹುಟ್ಟುಹಾಕಿದ ಕರ್ನಾಟಕ ಕಾಂಗ್ರೆಸ್ ಪಕ್ಷದಿಂದ ಕಣಕ್ಕಿಳಿದಿದ್ದ ಬಂಗಾರಪ್ಪ ಲೋಕಸಭೆ ಚುನಾವಣೆಯಲ್ಲಿ ಗೆಲುವು ಸಾಧಿಸಿದರು. ಆ ಚುನಾವಣೆಯಲ್ಲಿ ಕಾಂಗ್ರೆಸ್ ಅಭ್ಯರ್ಥಿ ಕೆ.ಜಿ.ಶಿವಪ್ಪ ನಾಲ್ಕನೇ ಸ್ಥಾನಕ್ಕೆ ಕುಸಿದರು. 1998ರಲ್ಲಿ ನಡೆದ ಲೋಕ ಚುನಾವಣೆಯಲ್ಲಿ ತಮ್ಮದೇ ಆದ ಕರ್ನಾಟಕ ವಿಕಾಸ ಪಾರ್ಟಿಯಿಂದ ಸ್ಪರ್ಧಿಸಿದ ಬಂಗಾರಪ್ಪ, ಬಿಜೆಪಿ ಅಭ್ಯರ್ಥಿ ಆಯನೂರು ಮಂಜುನಾಥ್ ವಿರುದ್ಧ ಪರಾಭವಗೊಂಡರು. 1999ಕ್ಕೆ ಮತ್ತೆ ಕಾಂಗ್ರೆಸ್ಗೆ ಮರಳಿದ ಬಂಗಾರಪ್ಪ ಅದೇ ವರ್ಷ ನಡೆದ ಚುನಾವಣೆಯಲ್ಲಿ ಗೆಲುವು ಸಾಧಿಸಿದರು. 2004ರ ವೇಳೆಗೆ ಮತ್ತೆ ಪಕ್ಷಾಂತರ ಮಾಡಿದ ಬಂಗಾರಪ್ಪ ಬಿಜೆಪಿಯಿಂದ ಸ್ಪರ್ಧಿಸಿ ಗೆಲುವು ಕಂಡರು. 2005ರಲ್ಲಿ ಸಮಾಜವಾದಿ ಪಕ್ಷದ ಅಭ್ಯರ್ಥಿಯಾಗಿ ಲೋಕಸಭೆ ಪ್ರವೇಶಿಸಿದರು. 2009ರ ಲೋಕಸಭೆ ಚುನಾವಣೆ ಹೊಸ್ತಿಲಲ್ಲಿ ಕಾಂಗ್ರೆಸ್ಗೆ ಮರಳಿ ಮತ್ತೆ ಸ್ಪರ್ಧಿಸಿ ಸೋಲುಂಡರು.
ಆಯನೂರು ಹೊಡೆತ: ಬಿಜೆಪಿ ತೊರೆದು ವಿಜಯ ಮಲ್ಯ ನೇತೃತ್ವದಲ್ಲಿ ಜನತಾ ಪಕ್ಷ ಸೇರಿದ್ದ ಆಯನೂರು ಮಂಜುನಾಥ್ 2004ರ ಲೋಕಸಭೆ ಚುನಾವಣೆ ಸಂದರ್ಭದಲ್ಲಿ ಕಾಂಗ್ರೆಸ್ಗೆ ಸೇರ್ಪಡೆಯಾದರು. ಅವರಿಗೆ ಟಿಕೆಟ್ ಕೂಡ ಸಿಕ್ಕಿತು. ಗೆಲುವು ಸಿಗಲಿಲ್ಲ. 2005ರಲ್ಲಿ ನಡೆದ ಉಪಚುನಾವಣೆಯಲ್ಲೂ ಮತ್ತೆ ಆಯನೂರು ಕಾಂಗ್ರೆಸ್ ಅಭ್ಯರ್ಥಿಯಾದರು. ಆದರೆ ಈ ಚುನಾವಣೆಯಲ್ಲಿ ಮತ್ತೆ ಬಂಗಾರಪ್ಪ ಗೆದ್ದರು. ಕಾಂಗ್ರೆಸ್ ತೊರೆದ ಆಯನೂರು ಮಂಜುನಾಥ್ ಮಾತೃಪಕ್ಷಕ್ಕೆ ಮರಳಿದರು. ಈಗ 20 ವರ್ಷದ ಬಳಿಕ ಮತ್ತೆ ಆಯನೂರು ಕಾಂಗ್ರೆಸ್ ತೆಕ್ಕೆಯಲ್ಲಿದ್ದಾರೆ.
ಕೈಕೊಟ್ಟ ಮೈತ್ರಿ: ರಾಜ್ಯದಲ್ಲಿ 2018ರಲ್ಲಿ ಜೆಡಿಎಸ್-ಕಾಂಗ್ರೆಸ್ ಮೈತ್ರಿ ಸರ್ಕಾರ ಅಸ್ತಿತ್ವದಲ್ಲಿತ್ತು. 2018ರಲ್ಲಿ ನಡೆದ ಲೋಕಸಭೆ ಉಪಚುನಾವಣೆಯಲ್ಲಿ ಜೆಡಿಎಸ್ ಅಭ್ಯರ್ಥಿಯಾಗಿದ್ದ ಮಧು ಬಂಗಾರಪ್ಪ ಅವರಿಗೆ ಕಾಂಗ್ರೆಸ್ ಬೆಂಬಲ ನೀಡಿತ್ತು. 2019ರ ಲೋಕಸಭೆ ಚುನಾವಣೆಯಲ್ಲೂ ಇದು ಪುನರಾವರ್ತನೆಯಾಯಿತು. ಕಾಂಗ್ರೆಸ್ ಪಾಲಿಗೆ ಮೈತ್ರಿಯೂ ಫಲ ನೀಡಲಿಲ್ಲ. ಹೀಗಾಗಿ ಈ ಬಾರಿ ಗೆಲುವು ಸಾಧಿಸುವುದು ಕಾಂಗ್ರೆಸ್ಗೆ ಅನಿವಾರ್ಯವಾಗಿದೆ.
