ಕೆಎಸ್​ಆರ್​ಟಿಸಿ ಬಸ್ ಸಂಚಾರ ಆರಂಭಕ್ಕೆ ಆಗ್ರಹ

ಚಿಕ್ಕಮಗಳೂರು: ಕೊಳಗಾಮೆ, ಜಾಗರ, ಮೇಲಿನಹುಲುವತ್ತಿ ಸೇರಿದಂತೆ ಹತ್ತಾರು ಗ್ರಾಮಗಳಿಗೆ ಕೆಎಸ್​ಆರ್​ಟಿಸಿ ಬಸ್ ಸಂಚಾರ ಆರಂಭಿಸುವಂತೆ ಒತ್ತಾಯಿಸಿ ಗ್ರಾಮಸ್ಥರು ಅಪರ ಜಿಲ್ಲಾಧಿಕಾರಿ ಡಾ. ಕೆ.ಕುಮಾರ್, ಜಿಪಂ ಸದಸ್ಯೆ ಜಸಂತಾ ಅನಿಲ್​ಕುಮಾರ್ ಅವರಿಗೆ ಮಂಗಳವಾರ ಮನವಿ ಸಲ್ಲಿಸಿದರು.

ಕೊಳಗಾಮೆ, ಕಾರಂಜಿ, ಉಕ್ಕುಡ, ಭುವನಹಳ್ಳಿ, ಮಲಗಾರ್, ಕೆಳಕುಂತಿ, ಮೇಲ್​ಕುಂತಿ, ದೊಡ್ಡಿನ ಕೊಳಗ, ಕಾಲೇನಹಳ್ಳಿ ಸುತ್ತಮುತ್ತಲ ಗ್ರಾಮಗಳಲ್ಲಿ 2800 ಜನಕ್ಕಿಂತಲೂ ಹೆಚ್ಚು ಮಂದಿ ವಾಸಿಸುತ್ತಿದ್ದಾರೆ. ಈ ಹಿಂದೆ ಖಾಸಗಿ ಬಸ್ಸೊಂದು ಕೊಳಗಾಮೆ ಗ್ರಾಮದಿಂದ ಬೆಳಗ್ಗೆ 7.30ಕ್ಕೆ ಹೊರಟು 9.30ಕ್ಕೆ ನಗರ ತಲುಪುತ್ತಿತ್ತು. ಸಂಜೆ 5.30ಕ್ಕೆ ನಗರದಿಂದ ಹೊರಟು 7.30ಕ್ಕೆ ಕೊಳಗಾಮೆ ತಲುಪುತ್ತಿತ್ತು. ಲಾಕ್​ಡೌನ್ ನಂತರ 9.30ಕ್ಕೆ ಕೊಳಗಾಮೆಯಿಂದ ಹೊರಡುತ್ತಿದ್ದು ನಗರದಿಂದ ಮಧ್ಯಾಹ್ನ 2.30ಕ್ಕೆ ಕೊಳಗಾಮೆಗೆ ಹೊರಡುತ್ತಿದೆ. ಇದರಿಂದ ವಿದ್ಯಾರ್ಥಿಗಳು ಶಾಲೆಗೆ ತೆರಳಲು, ಗ್ರಾಮಸ್ಥರು ಕೋರ್ಟು ಕಚೇರಿ ಹಾಗೂ ಇನ್ನಿತರೆ ಕೆಲಸಕ್ಕೆ ನಗರಕ್ಕೆ ತೆರಳಲು ತೊಂದರೆಯಾಗುತ್ತಿದೆ. ಹಾಗಾಗಿ ಕೆಎಸ್​ಆರ್​ಟಿಸಿ ಬಸ್ ಆರಂಭಿಸಿ ಹಿಂದಿನ ಸಮಯದಂತೆ ಸಂಚಾರ ಮುಂದುವರಿಸಿ ವಿದ್ಯಾರ್ಥಿಗಳಿಗೆ ಗ್ರಾಮಸ್ಥರಿಗೆ ಅನುಕೂಲ ಕಲ್ಪಿಸುವಂತೆ ಒತ್ತಾಯಿಸಿದರು.