ಆನೇಕಲ್​ನಲ್ಲಿ ಚುರುಕುಗೊಂಡ ರಾಗಿ ಬಿತ್ತನೆ

ನವೀನ್​ಚಂದ್ರ ಶೆಟ್ಟಿ ಆನೇಕಲ್​

ಮುಂಗಾರು ಮಳೆ ತಡವಾಗಿ ಆರಂಭವಾದರೂ ರಾಗಿಯ ಕಣಜ ಆನೇಕಲ್​ನಲ್ಲಿ 7300 ಹೆಕ್ಟರ್​ನಲ್ಲಿ ರಾಗಿ ಬಿತ್ತನೆ ಮಾಡಲು ಬಿತ್ತನೆ ಬೀಜ ವಿತರಿಸಲಾಗಿದೆ. ಕರ್ನಾಟಕ ಗೃಹ ಮಂಡಳಿ ಕರ್ನಾಟಕ ಕೈಗಾರಿಕಾ ಅಭಿವೃದ್ಧಿ ಮಂಡಳಿ ಮತ್ತು ವಿಪ್ರೋ ಕಂಪನಿಗಳ ಸಾವಿರಾರು ಎಕರೆ ಭೂ ಸ್ವಾಧಿನದ ನಡುವೆಯೂ ಈ ಬಾರಿ ಮುಂಗಾರು ಹಂಗಾಮಿನ ಬಿತ್ತನೆ ಚುರುಕುಗೊಂಡಿದ್ದು, ಆನೇಕಲ್​ ರಾಗಿಯ ಖ್ಯಾತಿ ಉಳಿಸಿಕೊಂಡಿದೆ.

ಈ ಬಾರಿ ಪೂರ್ವ ಮುಂಗಾರು ಮಳೆ ತಡವಾಗಿ ಆರಂಭವಾಯಿತಾದರೂ ಆಗಸ್ಟ್​ ಆರಂಭದಿಂದ ಸೆಪ್ಟೆಂಬರ್​ ಮೊದಲ ವಾರದೊಳಗೆ ಬಿತ್ತನೆ ಕಾರ್ಯ ಮೊದಲ ಹಂತದಲ್ಲಿ ನಿರೀೆಗೂ ಮೀರಿ ಹೆಚ್ಚಾಗಿದೆ.

ಆನೇಕಲ್​ ಭಾಗದಲ್ಲಿ ವಾಡಿಕೆಗಿಂತ ಹೆಚ್ಚಾಗಿಯೇ ಈ ಬಾರಿ ಮಳೆಯಾಗಿದೆ. ಇದರಿಂದ ಊರ ಜಾತ್ರೆ, ಪರಿಷೆ ಪ್ರವಾಸದ ಗುಂಗಿನಿಂದ ಹೊರ ಬಂದ ರೈತರು ಹೊಲಗದ್ದೆಗಳಲ್ಲಿ ತೊಡಗಿಸಿಕೊಂಡಿದ್ದಾರೆ. ಆನೇಕಲ್​ ಭಾಗದ ಜಿಗಣಿ, ಅತ್ತಿಬೆಲೆ, ಕಸಬಾ ಮತ್ತು ಸರ್ಜಾಪುರ ಹೋಬಳಿಗಳಲ್ಲಿ 382 ಹೆಕ್ಟರ್​ ಪ್ರದೇಶದಲ್ಲಿ ನೀರಾವರಿ ಆಶ್ರಿತ ತೋಟಗಾರಿಕೆ ಭೂಮಿ ಇದ್ದು, ಮಳೆಯಾಶ್ರಿತ 5220 ಹೆಕ್ಟೇರ್​ ಭೂಮಿ ಇದೆ. 7300 ಹೇಕ್ಟರ್​ ರಾಗಿ ಕೃಷಿ: ಆನೇಕಲ್​ನಲ್ಲಿ 7300 ಹೇಕ್ಟರ್​ ಭೂಮಿಯಲ್ಲಿ ರಾಗಿಯನ್ನು ಪ್ರಧಾನವಾಗಿ ಶೇ.84 ಬೆಳೆಯಲಾಗುತ್ತದೆ, ಅದರಲ್ಲಿ ಶೇ.14 ದ್ವಿದಳ ಧಾನ್ಯ, ಸೂರ್ಯಕಾಂತಿ, ಹುಚ್ಚೆಳ್ಳು, ಎಳ್ಳು ಹರಳು ಮತ್ತು ಜೋಳ ಅಗತ್ಯಕ್ಕೆ ತಕ್ಕಂತೆ ಮಿಶ್ರಬಳಿಯಾಗಿ ರೈತರು ಬೆಳೆಯುತ್ತಾರೆ. ಪೂರ್ವ ಮುಂಗಾರು: 2024ರಲ್ಲಿ ವಾಡಿಕೆ ಮಳೆ ಮೇ ತಿಂಗಳಲ್ಲಿ 129.3 ಮಿಲಿ ಮೀಟರ್​, ಹಂಗಾಮಿನಲ್ಲಿ ಜೂನ್​ ಹಾಗೂ ಜುಲೈ ತಿಂಗಳಲ್ಲಿ 173.09 ಮಿಲಿ ಮೀಟರ್​ ಮಳೆಯಾಗಿತ್ತು, ಈ ಬಾರಿ 2024&25ರ ಅವಧಿಯಲ್ಲಿ ಪೂರ್ವ ಮುಂಗಾರು ಮೇ ವರೆಗೆ 326.4 ಮಿಲಿ ಮೀಟರ್​ ಮಳೆಯಾಗಿದ್ದು, ಮುಂಗಾರು ಜೂನ್​, ಜುಲೈನಲ್ಲಿ 493.3 ಮಿಲಿಮೀಟರ್​ ಮಳೆಯಾಗುವ ಮೂಲಕ ರಾಗಿ ಕೃಷಿಗೆ ಸಹಕಾರಿಯಾಗಿದೆ.

ಬಿತ್ತನೆ ಬೀಜಗಳ ವಿತರಣೆ : ರಾಗಿ ತಳಿಗಳಾದ ಎಂ.ಆರ್​ 1, ಜಿಪಿಯು 28, ಎಂ.ಆರ್​ 6,ಎಂ.ಎಲ್​ 365, ಬೀಜಗಳನ್ನು ಸಂಗ್ರಹಿಸಿ ಇಡಲಾಗಿದೆ. ಆನೇಕಲ್​ ಕೃಷಿ ಇಲಾಖೆ ವತಿಯಿಂದ ಕಳೆದ ಬಾರಿ ಬಿತ್ತನೆ ಬೀಜ ವಿತರಣೆಗೆ ಹೋಲಿಸಿದರೆ ಈ ವರ್ಷ ಮುಂಗಾರು ಹಂಗಾಮ ಅರ್ಧಕ್ಕಿಂತ ಹೆಚ್ಚು ವಿತರಣೆಯಾಗಿರುವುದನ್ನು ಗುರುತಿಸಬಹುದು. 2024ರಲ್ಲಿ ರಾಗಿ, ತೊಗರಿ, ಶೇಂಗಾ, ಮುಸುಕಿನ ಜೋಳ, ಅಲಸಂದೆ ಮತ್ತು ಅವರೆ ಜತೆಗೆ ಇತರ ಧಾನ್ಯಗಳು ಸೇರಿ ಸರಬರಾಜು 130 ಕ್ವಿಂಟಾಲ್​ ಇದ್ದು, 101.60 ಕ್ವಿಂಟಾಲ್​ ಇಡಿ ವರ್ಷಕ್ಕೆ ವಿತರಣೆಯಾಗಿತ್ತು. ಬೀಜ ನಿಗಮವು ಒಂದು ಹೆಕ್ಟೇರ್​ ಪ್ರದೇಶಕ್ಕೆ 25 ಕಿಲೋ ಬೀಜವನ್ನು ನಿಗದಿಪಡಿಸಿದ್ದು, ಒಟ್ಟು ಲಭ್ಯತೆಯಲ್ಲಿ ಸರ್ಕಾರ ಶೇ.30 ಪೂರೈಕೆ ಮಾಡಲಿದೆ ಎಂದು ಕೃಷಿ ಇಲಾಖೆ ಅಧಿಕಾರಿಗಳು ತಿಳಿಸಿದ್ದಾರೆ.

ರಸ ಗೊಬ್ಬರ ಲಭ್ಯತೆ : ಯೂರಿಯಾ 252 ಮೆಟ್ರಿಕ್​ ಟನ್​, ಡಿ.ಎ.ಪಿ 103.05, ಎಂಒಪಿ 22.75 ಮೆಟ್ರಿಕ್​ ಟನ್​, ಕಾಂಪ್ಲೆಕ್ಸ್​ 427. 74 ಮೆಟ್ರಿಕ್​ ಟನ್​, ಎಸ್​, ಎಸ್​ ಪಿ 35.5 ಮೆಟ್ರಿಕ್​ ಟನ್​ ಲಭ್ಯವಿದೆ. 6900 ಹೆಕ್ಟೇರ್​ನಲ್ಲಿ 5,800 ಹೆಕ್ಟೇರ್​ ರಾಗಿ ಬೆಳೆಯುವುದರಿಂದ ಜುಲೈ ಅಂತ್ಯಕ್ಕೆ ಶೇ.64 ಬಿತ್ತನೆಯಾಗಿದೆ, ಆಗಸ್ಟ್​ ಅಂತ್ಯಕ್ಕೆ, ಸೆಪ್ಟೆಂಬರ್​ ಮೊದಲ ಭಾಗದಲ್ಲಿ ಬಿತ್ತನೆಯಾಗಲಿದೆ. ಹೆಕ್ಟೇರ್​ಗೆ 28 ಕ್ವಿಂಟಾಲ್​ ರಾಗಿ ಬೆಳೆಯಲಾಗುತ್ತದೆ. ಈ ಬಾರಿ ಮುಂಗಾರು ಬಿತ್ತನೆಗೆ ಎರಡೇ ತಿಂಗಳಲ್ಲಿ 123.60 ಕ್ವಿಂಟಾಲ್​ ಬೀಜ ವಿತರಣೆಯಾಗಿದೆ ಎಂದು ಕೃಷಿ ಇಲಾಖೆ ಅಧಿಕಾರಿ ಧನಂಜಯ ವಿಜಯವಾಣಿಗೆ ತಿಳಿಸಿದ್ದಾರೆ.