ಅಗ್ನಿಪಥ ಯೋಜನೆ ವಿರುದ್ಧ ಬೆಂಗಳೂರಲ್ಲಿ ಯುವ ಕಾಂಗ್ರೆಸ್​ನಿಂದ ಬೃಹತ್​ ಪ್ರತಿಭಟನೆ

ಬೆಂಗಳೂರು: ಅಗ್ನಿಪಥ ಯೋಜನೆ ವಿರೋಧಿಸಿ ರಾಜ್ಯ ಯುವ ಕಾಂಗ್ರೆಸ್​ ವತಿಯಿಂದ ಬೆಂಗಳೂರಲ್ಲಿ ಶುಕ್ರವಾರ ಬೃಹತ್ ಪ್ರತಿಭಟನೆ ನಡೆಯುತ್ತಿದ್ದು, ರಾಜಭವನ ಚಲೋಗೆ ಹೊರಟಿದ್ದವರನ್ನ ಮಾರ್ಗದಲ್ಲೇ ಪೊಲೀಸರು ತಡೆದಿದ್ದಾರೆ.

ಯೂತ್ ಕಾಂಗ್ರೆಸ್ ಅಧ್ಯಕ್ಷ ಮಹಮ್ಮದ್ ನಲಪಾಡ್ ನೇತೃತ್ವದಲ್ಲಿ 'ಯುವ ಆಕ್ರೋಶ' ಎಂಬ ಹೆಸರಿನಲ್ಲಿ ಕಾಂಗ್ರೆಸ್ ಭವನದಿಂದ ರಾಜಭವನದವರೆಗೆ ಬೃಹತ್ ಪ್ರತಿಭಟನಾ ಹಮ್ಮಿಕೊಳ್ಳಲಾಗಿದೆ. ಸಾವಿರಾರು ಕಾರ್ಯಕರ್ತರು ಪಾಲ್ಗೊಂಡಿದ್ದು, ರೇಸ್ ಕೋರ್ಸ್ ರಸ್ತೆಯ ಕಾಂಗ್ರೆಸ್ ಭವನದ ಬಳಿ ಪೊಲೀಸ್​ ಬಂದೋಬಸ್ತ್​ ಇದೆ. ಯುವ ಕಾಂಗ್ರೆಸ್‌ನ ರಾಷ್ಟ್ರೀಯ ಅಧ್ಯಕ್ಷ ಬಿ.ವಿ.ಶ್ರೀನಿವಾಸ್, ಜಂಟಿ ಕಾರ್ಯದರ್ಶಿ ಕೃಷ್ಣ ಅಲ್ಲಾವರ್ ಸೇರಿದಂತೆ ಹಲವು ನಾಯಕರು ಉಪಸ್ಥಿತರಿದ್ದಾರೆ.

ಅಗ್ನಿಪಥ ಯೋಜನೆಯಿಂದ ನಮ್ಮ ಸೈನ್ಯವನ್ನು ಕಾಂಟ್ರಾಕ್ಟ್ ಬೇಸ್ ಮಾಡಲು ಹೊರಟಿದ್ದಾರೆ. ನಮ್ಮ ಯುವಕರನ್ನು ಬೀದಿಪಾಲು ಮಾಡಲು ಹೊರಟ್ಟಿದ್ದಾರೆ. ಈ ಯೋಜನೆಯನ್ನು ಹಿಂಪಡೆಯುವವರೆಗೂ ನಮ್ಮ ಹೋರಾಟ ನಿಲ್ಲಲ್ಲ. ಅಗ್ನಿಪಥ ಯೋಜನೆ ಏಕೆ ಬೇಕು? ಇದು ಮುಗಿದ ಮೇಲೆ ಯುವಕರು ಏನು ಮಾಡಬೇಕು? ಕೋವಿಡ್​ ಪರಿಣಾಮ 2 ಕೋಟಿ ಜನರ ಉದ್ಯೋಗ ಹೋಗಿದೆ ಎಂದು ಕಿಡಿಕಾರಿದ ನಲಪಾಡ್​, ಪೊಲೀಸರು ಲಾಠಿ ಬೀಸಿದರೂ ಪರವಾಗಿಲ್ಲ, ನಾವು ರಾಜಭವನಕ್ಕೆ ರ್ಯಾಲಿ ಹೋಗ್ತೀವಿ ಎಂದರು.

ಯೂತ್ ಕಾಂಗ್ರೆಸ್ ಉಪಾಧ್ಯಕ್ಷ ಮಂಜುನಾಥ್ ಮಾತನಾಡಿ, ತಾಯಿಯನ್ನ ಹೇಗೆ ಪ್ರೀತಿ ಮಾಡಬೇಕು ಅನ್ನೋದನ್ನು ಇವರಿಂದ ಕಲಿಯಬೇಕಾ? 15 ಕ್ಯಾಮರಾಗಳ ಜೊತೆ ಪ್ರಧಾನಿ ನರೇಂದ್ರ ಮೋದಿ ತಾಯಿಯ ಬಳಿಗೆ ಹೋಗ್ತಾರೆ. ಚಾರ್ಲಿ ಸಿನಿಮಾ ನೋಡಿ ಸಿಎಂ ಕಣ್ಣೀರು ಹಾಕುತ್ತಾರೆ. ಯುವಕರು ಬೀದಿಗೆ ಬಿದ್ದಾಗ ಕಣ್ಣೀರು ಹಾಕಲ್ಲ. ಮುಸ್ಲಿಂ ವ್ಯಾಪಾರಿಯ ಕಲ್ಲಂಗಡಿ ಹಣ್ಣನ್ನು ನಾಶ ಮಾಡಿದಾಗ ಕಣ್ಣೀರು ಹಾಕಲ್ಲ. ಬಿಜೆಪಿಯವರಿಗೆ ಅಧಿವೇಶನದಲ್ಲಿ ಹೇಗೆ ನಡೆದುಕೊಳ್ಳಬೇಕು ಎಂಬುದು ಗೊತ್ತಿಲ್ಲ. ಬಿಜೆಪಿಯವರು ಶನಿವಾರ ಅಥವಾ ಭಾನುವಾರ ಹೋಗಿ ನಮ್ಮ ಸಿಎಲ್​ಪಿ ನಾಯಕ ಹಾಗೂ ಕೆಪಿಸಿಸಿ ಅಧ್ಯಕ್ಷ ಡಿ.ಕೆ. ಶಿವಕುಮಾರ್​ರ ಬಳಿ ತರಬೇತಿ ಪಡೆದುಕೊಳ್ಳಲಿ ಎಂದು ಲೇವಡಿ ಮಾಡಿದರು.

ಬಿ.ವಿ.ಶ್ರೀನಿವಾಸ್ ಮಾತನಾಡಿ, ಭಾರತೀಯ ಸೈನ್ಯದ ಶಕ್ತಿ ಇಡೀ ವಿಶ್ವಕ್ಕೆ ಗೊತ್ತಿದೆ. ಆದರೀಗ ದೇಶದ ಯುವಕರನ್ನ ಬರ್ಬಾದ್ ಮಾಡಲು ಬಿಜೆಪಿ ಹೊರಟಿದೆ. ಅಗ್ನಿಪಥ ಯೋಜನೆ ವಿರುದ್ಧ ದೇಶಾದ್ಯಂತ ಪ್ರತಿಭಟನೆ ನಡೆಯುತ್ತಿದೆ. ಇದರ ಗಮನ ಬೇರೆಡೆ ಸೆಳೆಯಲು ರಾಹುಲ್ ಗಾಂಧಿ ಅವರ ಮೇಲೆ ಇ.ಡಿ. ಅಸ್ತ್ರ ಪ್ರಯೋಗಿಸಿದ್ದಾರೆ ಎಂದು ಕಿಡಿಕಾರಿದರು.

https://www.vijayavani.net/a-idol-of-lord-krishna-in-throat-of-a-person/

https://www.vijayavani.net/a-illicit-relationship-wedding-love-missing-police-case-forest/

https://www.vijayavani.net/a-husband-missing-case-soraba/

https://www.vijayavani.net/a-belgaum-reena-and-childrens-death-case-praveen-bhat-acquitted/