ನಾಗರಹೊಳೆಯಲ್ಲಿ 2 ಹುಲಿಮರಿ ಕಳೇಬರ ಪತ್ತೆ: ಬಲಿಷ್ಠ ವ್ಯಾಘ್ರನ ದಾಳಿಗೆ ಬಲಿಯಾಗಿರುವ ಶಂಕೆ

ಎಚ್​.ಡಿ.ಕೋಟೆ: ನಾಗರಹೊಳೆ ರಾಷ್ಟ್ರೀಯ ಉದ್ಯಾನವನದ ಡಿ.ಬಿ.ಕುಪ್ಪೆ ಅರಣ್ಯ ವಲಯದ ಸುಳಿಬಳ್ಳೆ ಗಸ್ತಿನಲ್ಲಿ ಎರಡು ಹುಲಿ ಮರಿಗಳ ಕಳೇಬರ ಪತ್ತೆಯಾಗಿವೆ.

ಅಂದಾಜು 8-9 ತಿಂಗಳ ಪ್ರಾಯದ ಹುಲಿ ಮರಿಗಳಾಗಿದ್ದು, ಒಂದು ಹೆಣ್ಣು ಹುಲಿಯಾದರೆ, ಇನ್ನೊಂದು ಹುಲಿ ಮರಿಯ ಲಿಂಗ ಪತ್ತೆಯಾಗಿಲ್ಲ. ಲಿಂಗ ಪತ್ತೆ ಪರೀಕ್ಷೆಗಾಗಿ ಮಾದರಿಯನ್ನು ವಿಧಿ ವಿಜ್ಞಾನ ಪ್ರಯೋಗಾಲಯಕ್ಕೆ ಕಳುಹಿಸಲಾಗಿದೆ ಎಂದು ಅರಣ್ಯ ಅಧಿಕಾರಿಗಳು ತಿಳಿಸಿದ್ದಾರೆ.

ಮಂಗಳವಾರ ಬೆಳಗ್ಗೆ ಅರಣ್ಯ ಇಲಾಖೆ ಅಧಿಕಾರಿಗಳು ಹಾಗೂ ಸಿಬ್ಬಂದಿ ಸುಳಿಬಳ್ಳೆ ಗಸ್ತಿನಲ್ಲಿ ಹುಲಿ ಗಣತಿ ಮಾಡುವ ಸಂದರ್ಭದಲ್ಲಿ ಕಾಡು ಪ್ರಾಣಿಯ ಮೃತದೇಹದ ಗಬ್ಬುವಾಸನೆ ಬಂದಿದೆ. ವಾಸನೆ ಜಾಡು ಹಿಡಿದು ಸ್ಥಳಕ್ಕೆ ಹೋಗಿ ನೋಡಿದಾಗ ಹುಲಿ ಮರಿ ಸತ್ತಿರುವುದು ಕಂಡುಬಂದಿದೆ.

ನಂತರ ಅರಣ್ಯ ಇಲಾಖೆ ಅಧಿಕಾರಿಗಳು ಮೂರು ಸಾಕಾನೆಗಳ ಮೂಲಕ ಕೂಂಬಿಂಗ್​ ನಡೆಸಿದಾಗ ಮತ್ತೊಂದು ಹುಲಿ ಮರಿ ಸತ್ತಿರುವುದು ಪತ್ತೆಯಾಯಿತು. ಎರಡೂ ಹುಲಿಗಳ ಕಳೇಬರಗಳನ್ನು ಅರಣ್ಯ ಇಲಾಖೆ ಪಶುವೈದ್ಯ ಡಾ.ಪ್ರಸನ್ನ ಬಿ.ಬಿ. ಹಾಗೂ ಕಂಚಮಳ್ಳಿ ಪಶುವೈದ್ಯಾಧಿಕಾರಿ ಡಾ.ರಮೇಶ್​ ಮರಣೋತ್ತರ ಪರೀಕ್ಷೆ ನಡೆಸಿದರು. ನಂತರ ಮೃತದೇಹಗಳನ್ನು ಅದೇ ಸ್ಥಳದಲ್ಲಿ ಸುಡಲಾಯಿತು.

ಸೋಮವಾರ ರಾತ್ರಿ ಬಲಿಷ್ಠ ಹುಲಿಯೊಂದು ಎರಡು ಮರಿಗಳ ಮೇಲೆ ದಾಳಿ ನಡೆಸಿ ಬಲಿ ಪಡೆದಿರಬಹುದೆಂದು ಎಸಿಎಫ್​ ಎಸ್​.ಪಿ.ಮಹದೇವು ತಿಳಿಸಿದ್ದಾರೆ.

https://www.vijayavani.net/a-cm-bommai-said-no-birthday-celebration/

https://www.vijayavani.net/a-karavara-traffic-police-station-asi-abdul-khadar-sheikh-death/