ನಾಗುರಿ ದುರ್ಘಟನೆಯಲ್ಲಿ ಮಡಿದ ಮಕ್ಕಳಿಗೆ ಕಣ್ಣೀರ ವಿದಾಯ

ಈ ದುರಂತದಲ್ಲಿ ಬಿಹಾರ ಮೂಲದ ಲಾಲ್‌ಬಾಬು ಅವರ ನಾಲ್ವರು ಪುತ್ರಿಯರ ಪೈಕಿ ಅನಾಮಿಕ ಚೌರಾಸಿಯ (8), ತನು (4)

ಮತ್ತು ಉಡುಪಿ ಮೂಲದ ಶಾಂತಾ (35) ಮಣ್ಣಿನಡಿ ಸಿಲುಕಿ ಮೃತಪಟ್ಟಿದ್ದರು. ಈ ಪೈಕಿ ಶಾಂತಾ ಅವರ ಮೃತದೇಹವನ್ನು ಅವರ ಕುಟುಂಬಸ್ಥರು ಊರಿಗೆ ಕೊಂಡೊಯ್ದು ಅಂತ್ಯ ಸಂಸ್ಕಾರ ನಡೆಸಿದ್ದಾರೆ.

ಕಂದಮ್ಮಗಳ ನೋಡಿ ಕಣ್ಣೀರಾದ ಜನ: ಮಕ್ಕಳಿಬ್ಬರ ಮೃತದೇಹಗಳನ್ನು ದುರ್ಘಟನೆ ನಡೆದಲ್ಲಿಗೆ, ಅವರ ಬಾಡಿಗೆ ಮನೆಗೆ ತಂದು ಅಂತಿಮ ದರ್ಶನಕ್ಕೆ ಇಡಲಾಗಿತ್ತು. ಈ ಸಂದರ್ಭ ಕಪಿತಾನಿಯೋ ಶಾಲಾ ಆಡಳಿತ ಮಂಡಳಿ, ಶಿಕ್ಷಕರು, ನಾಗುರಿ ಪರಿಸರದ ನೂರಾರು ಮಂದಿ ಆಗಮಿಸಿ, ಕಣ್ಣೀರು ಹರಿಸಿದರು. ಬಹಳಷ್ಟು ಮಂದಿ ಭಾವುಕರಾಗಿ ಇಂತಹ ಘಟನೆ ಎಲ್ಲೂ ನಡೆಯದಿರಲಿ ಎಂದು ಮೃತ ಮಕ್ಕಳ ಆತ್ಮಕ್ಕೆ ಶಾಂತಿ ಸಿಗಲಿ ಎಂದು ಪ್ರಾರ್ಥಿಸಿದರು.

ಈ ಮಕ್ಕಳು ಕಂಕನಾಡಿ ಪೊಲೀಸರಿಗೆ ಆತ್ಮೀಯರಾಗಿದ್ದರು. ಆಗಾಗ ಠಾಣೆಗೆ ಹೋಗುತ್ತಿದ್ದ ಅವರು ಅಲ್ಲಿಯೇ ಪೊಲೀಸರ ಜತೆ ಮಾತನಾಡಿಕೊಂಡು ಆಟವಾಡುತ್ತಿದ್ದರು. ಹಾಗಾಗಿ ಪೊಲೀಸರು ಕೂಡಾ ಅಂತಿಮ ನಮನ ಸಲ್ಲಿಸಿ, ಭಾವುಕರಾದರು. ತಮ್ಮ ಕಣ್ಣೆದುರೇ ಬೆಳೆಯುತ್ತಿದ್ದ ಮಕ್ಕಳ ಮೃತದೇಹ ಕಂಡು ನಾಗುರಿ ಜನತೆ ಶೋಕ ಸಾಗರದಲ್ಲಿ ಮರುಗಿದೆ.

ಈ ಮಕ್ಕಳಿಬ್ಬರ ಪೋಷಕರು ಬಿಹಾರ ಮೂಲದವರಾದರೂ ಕಳೆದ 20 ವರ್ಷಗಳ ಹಿಂದೆ ಮಂಗಳೂರಿಗೆ ಆಗಮಿಸಿ ಇಲ್ಲಿಯೇ ಕಾರ್ಮಿಕರಾಗಿ ದುಡಿಯುತ್ತಿದ್ದಾರೆ. ಈ ದುರಂತದಲ್ಲಿ ತಮ್ಮ ಇಬ್ಬರು ಮಕ್ಕಳನ್ನು ಕಳೆದುಕೊಂಡು ದುಃಖ ಸಾಗರದಲ್ಲಿ ಮುಳುಗಿದ್ದಾರೆ.

ಶೀಘ್ರ ಮನೆ ತೆರವು: ತಡೆಗೋಡೆ ಬಿದ್ದು ಅರ್ಧದಷ್ಟು ಕುಸಿತವಾಗಿರುವ ಹಳೇ ಮನೆಯನ್ನು ನಾಲ್ಕೈದು ದಿನಗಳಲ್ಲಿ ತೆರವು ಮಾಡಲಾಗುವುದು. ಮನೆಯಲ್ಲಿ ಸದ್ಯ ವಾಸವಿದ್ದವರು ವಸ್ತುಗಳು ಇದ್ದು, ಅದನ್ನು ಸಾಗಾಟ ಮಾಡಿದ ಬಳಿಕ ಮನೆ ನೆಲಸಮಗೊಳಿಸಲಾಗುವುದು. ಮಹಾನಗರ ಪಾಲಿಕೆ ಈ ನಿಟ್ಟಿನಲ್ಲಿ ಕ್ರಮ ವಹಿಸಲಿದೆ. ದುರ್ಘಟನೆ ನಡೆದ ಮನೆಯಲ್ಲಿ ವಾಸವಿದ್ದವರಿಗೆ ಪುರಭವನದಲ್ಲಿ ಕಾಳಜಿ ಕೇಂದ್ರ ತೆರೆಯಲಾಗಿದೆ. ಆದರೆ ಅವರು ಪರ್ಯಾಯ ವ್ಯವಸ್ಥೆ ಮಾಡಿಕೊಂಡ ಕಾರಣ ಅವರ ಇಚ್ಛೆಯಂತೆ ಬಿಡಲಾಗಿದೆ. ಅವಶ್ಯ ಇದ್ದರೆ ಪೂರಕ ವ್ಯವಸ್ಥೆ ಕಲ್ಪಿಸಲಾಗುವುದು ಎಂದು ತಹಶೀಲ್ದಾರ್ ರಮೇಶ್ ಬಾಬು ತಿಳಿಸಿದ್ದಾರೆ.

ಪೊಲೀಸ್ ತನಿಖೆ: ತಡೆಗೋಡೆ ನಿರ್ಮಾಣ ಮಾಡಿದವರ ವಿರುದ್ಧ ಕಂಕನಾಡಿ ನಗರ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ. ತಡೆಗೋಡೆ ನಿರ್ಮಾಣ ಸಂದರ್ಭ ಕಳಪೆ ಕಾಮಗಾರಿ ನಡೆಸಿದ ಪರಿಣಾಮ ಕುಸಿತ ಆಗಿದೆಯೇ? ಎನ್ನುವ ಬಗ್ಗೆ ಪೊಲೀಸರು ತಜ್ಞರ ಸಲಹೆ ಕೇಳಿದ್ದಾರೆ. ತಜ್ಞರು ಪರಿಶೀಲನೆ ನಡೆಸಿ ವರದಿ ನೀಡಲಿದ್ದಾರೆ. ಈ ಆಧಾರದಲ್ಲಿ ಪೊಲೀಸ್ ಕ್ರಮ ಆಗಲಿದೆ ಎಂದು ಪೊಲೀಸ್ ಅಧಿಕಾರಿಗಳು ತಿಳಿಸಿದ್ದಾರೆ.

ಎಚ್ಚರ ವಹಿಸಲು ನೋಟಿಸ್ ಜಾರಿ: ದಕ್ಷಿಣ ಕನ್ನಡ ಜಿಲ್ಲೆಯಲ್ಲಿ ಜುಲೈ ತಿಂಗಳಿನಲ್ಲಿ ಮಳೆ ಬಿರುಸಾಗುವ ಸಾಧ್ಯತೆ ಇದೆ. ಈ ಹಿನ್ನೆಲೆಯಲ್ಲಿ ಬಹಳಷ್ಟು ಕಡೆ ಎತ್ತರ ಪ್ರದೇಶಗಳಲ್ಲಿ ಹಾಗೂ ತಗ್ಗು ಪ್ರದೇಶಗಳಲ್ಲಿ ಅಪಾಯಕಾರಿ ಸ್ಥಳಗಳಲ್ಲಿ ವಾಸ ಮಾಡುವ ಕುಟುಂಬಗಳು ಬಹಳಷ್ಟಿದೆ. ಪ್ರತೀ ವರ್ಷವೂ ಮನೆ ಮೇಲೆ ಬರೆ, ತಡೆಗೋಡೆ, ಆವರಣಗೋಡೆ ಕುಸಿತ ಪ್ರಕರಣಗಳು ಮರುಕಳಿಸುತ್ತಲೇ ಇವೆ. ಇಂತಹ ಅಪಾಯಕಾರಿ ಸ್ಥಳಗಳ ನಿವಾಸಿಗಳು ಮನೆ ತೆರವುಗೊಳಿಸಿ ಸುರಕ್ಷತಾ ಸ್ಥಳಗಳಿಗೆ ತೆರಳಬೇಕು. ಅಪಾಯಕಾರಿ ಸ್ಥಳಗಳಲ್ಲಿ ಸೂಕ್ತ ಕ್ರಮ ವಹಿಸಲು ವಿಪತ್ತು ನಿರ್ವಹಣೆಯಡಿ ಜಿಲ್ಲಾಡಳಿತ ನೋಟಿಸ್ ಜಾರಿ ಮಾಡಲಾಗುತ್ತಿದೆ. ತಮ್ಮ ಕುಟುಂಬದ ಜೀವ ರಕ್ಷಣೆ ಹಿತದೃಷ್ಟಿಯಿಂದ ಇಂತಹ ಅಪಾಯಕಾರಿ ಸ್ಥಳಗಳಲ್ಲಿ ವಾಸ ಮಾಡುತ್ತಿರುವವರು ಸ್ವ ಇಚ್ಛೆಯಿಂದ ಮುಂಜಾಗ್ರತಾ ಕ್ರಮ ವಹಿಸುವುದು ಅವಶ್ಯವಾಗಿದೆ.

ಗಾಯಾಳುಗಳು ಚೇತರಿಕೆ: ಘಟನೆಯಿಂದ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿರುವ ಮೃತಪಟ್ಟ ಮಕ್ಕಳ ಸಹೋದರಿಯರಾದ ಅಲ್ಕಾ (14) ಹಾಗೂ ಅನುಷ್ಕಾ (11) ಹಾಗೂ ಮೃತ ಶಾಂತಾ ಅವರ ಪತಿ ಬಾಲಕೃಷ್ಣ ಅವರು ಚೇತರಿಸಿಕೊಳ್ಳುತ್ತಿದ್ದಾರೆ. ಅನುಷ್ಕಾಳ ಕಾಲುಗಳಿಗೆ ತಡೆಗೋಡೆಯಲ್ಲಿದ್ದ ಕೆಂಪು ಕಲ್ಲುಗಳು ಬಿದ್ದು ಗಂಭೀರ ಸ್ವರೂಪದ ಗಾಯಗಳಾಗಿವೆ. ಬಾಲಕೃಷ್ಣ ಅವರ ಎದೆ ಹಾಗೂ ತಲೆಯ ಭಾಗಕ್ಕೆ ಗಾಯವಾಗಿದೆ. ಅವರಿಗೆ ಚಿಕಿತ್ಸೆ ಮುಂದುವರಿದಿದೆ ಎಂದು ಆಸ್ಪತ್ರೆ ಮೂಲಗಳು ತಿಳಿಸಿವೆ.

ವರದಿ ಕೇಳಿದ ಡಿಸಿ: ದುರ್ಘಟನೆಗೆ ಸಂಬಂಧಿಸಿ ಅಧ್ಯಯನ ನಡೆಸಿ ತಾಂತ್ರಿಕ ವರದಿ ನೀಡುವಂತೆ ಮಹಾನಗರ ಪಾಲಿಕೆ ಆಯುಕ್ತರಿಗೆ ಜಿಲ್ಲಾಧಿಕಾರಿ ದರ್ಶನ್ ಎಚ್.ವಿ. ಸೂಚನೆ ನೀಡಿದ್ದಾರೆ.