ಕರ್ನಾಟಕ ಲೋಕಸೇವಾ ಆಯೋಗದ(ಕೆಪಿಎಸ್ಸಿ) ಸ್ಪರ್ಧಾತ್ಮಕ ಪರೀಕ್ಷೆಗಳಿಂದ ಈ ದರ್ಜೆಯ ಹುದ್ದೆಗಳು ಭತಿರ್ಯಾಗಬೇಕು. ಆದರೆ, ಕೆಲ ಅಧಿಕಾರಿಗಳು ಸಚಿವರು ಮತ್ತು ಶಾಸಕರ ಶಿಫಾರಸು ಪತ್ರದ ಮೇಲೆ ಈ ಇಲಾಖೆಗೆ ವಿಲೀನಗೊಳಿಸಿ ಲಗತ್ತಾದ ಜಾಗಗಳನ್ನು ಪಡೆದುಕೊಂಡು ಭ್ರಷ್ಟಚಾರವೆಸಗಿ ಸರ್ಕಾರದ ಹಣವನ್ನು ಲೂಟಿ ಮಾಡುತ್ತಿದ್ದಾರೆ. ಈವರೆಗೆ ಇಲಾಖೆಯಲ್ಲಿ ಹತ್ತಾರು ಸಿಬ್ಬಂದಿ ಈ ರೀತಿ ನೇಮಕಗೊಂಡಿದ್ದಾರೆ. ಕರ್ನಾಟಕ ನಾಗರಿಕ ಸೇವಾ ನಿಯಮ ಪ್ರಕಾರ ಒಂದು ಇಲಾಖೆಯಲ್ಲಿ ಸಮಾನ ಹುದ್ದೆ ಹೊಂದಿರುವ ನೌಕರರು ಇನ್ನೊಂದು ಇಲಾಖೆಗೆ ಒಂದು ಸಲ ವರ್ಗಾವಣೆಗೆ ಅವಕಾಶವಿದ್ದು, ಆದರೆ, ವಿಲೀನಕ್ಕೆ ಅವಕಾಶವೇ ಇಲ್ಲ. ವಿಶೇಷ ಜ್ಞಾನ, ಪರಿಣಿತಿ, ತಾಂತ್ರಿಕ ಹಾಗೂ ಆಡಳಿತಾತ್ಮಕ ಅನುಭವಗಳಡಿ ನಿಯೋಜನೆಗೆ ಅವಕಾಶವಿದೆ. ಇದನ್ನೇ ದುರ್ಬಳಕೆ ಮಾಡಿಕೊಂಡಿರುವ ಹಲವರು ಕಾಯಂ ಆಗಿ ನೆಲೆಯೂರುತ್ತಿದ್ದಾರೆ ಎಂದು ಹೆಸರೇಳಲಿಚ್ಚಿಸದ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.
