ಜನದಟ್ಟಣೆ ಉಳ್ಳ ಈ ಕ್ಷೇತ್ರದಲ್ಲಿ ನಾಗರಿಕ ಸೌಲಭ್ಯಗಳ ಕೊರತೆ ಸಾಕಷ್ಟಿದೆ. ಕುಡಿಯುವ ನೀರು, ರಸ್ತೆ, ಬೀದಿ ದೀಪ, ಚರಂಡಿ, ಒಳಚರಂಡಿ ವ್ಯವಸ್ಥೆ ಸಮರ್ಪಕವಾಗಿಲ್ಲ. ಪಾರ್ಕ್, ಆಟದ ಮೈದಾನ, ಗ್ರಂಥಾಲಯ, ಆಸ್ಪತ್ರೆಗಳ ಕೊರತೆ ಸಾಕಷ್ಟಿದೆ. ಒತ್ತೊತ್ತಾಗಿ ಮನೆಗಳು ನಿರ್ಮಾಣವಾಗಿರುವ ಕಾರಣ ರಸ್ತೆಗಳು ಗಲ್ಲಿಗಳಂತೆ. ಕ್ಷೇತ್ರದೊಳಗೆ ಹಾದುಹೋಗಿರುವ ಮಳೆನೀರುಗಾಲುವೆ ದುರ್ವಾಸನೆ ಬೀರುವುದಲ್ಲದೆ ಸೊಳ್ಳೆ ಉತ್ಪತ್ತಿ ಕೇಂದ್ರಗಳಾಗಿ ಮಾರ್ಪಟ್ಟಿವೆ. ಒಂದರರ್ಥದಲ್ಲಿ ರಾಜಕಾಲುವೆಗಳನ್ನು ಇಲ್ಲಿನವರು ‘ಡಸ್ಟ್ಬಿನ್’ಗಳಾಗಿ ಮಾರ್ಪಡಿಸಿಕೊಂಡಿದ್ದಾರೆ. ಈ ಕಾಲುವೆಗಳಿಗೆ ತಡೆಗೋಡೆಗೆ ಮನೆಗಳನ್ನು ಕಟ್ಟಿಕೊಂಡಿರುವ ಜನರು ಕಸವನ್ನು ಅಲ್ಲಿಯೇ ಬಿಸಾಡುವುದರಿಂದ ಹೂಳು ತುಂಬಿ ತುಳುಕುತ್ತಿದೆ. ಚರಂಡಿಗಳಲ್ಲಿ ಹೂಳು ತೆಗೆಯದ ಕಾರಣ ಮಳೆ ಬಂದಲ್ಲಿ ಕೊಳಚೆನೀರು ರಸ್ತೆಯಲ್ಲೇ ಹರಿಯುತ್ತಿರುತ್ತದೆ. ಎಲ್ಲೆಡೆ ನೈರ್ಮಲ್ಯದ್ದೇ ಬೃಹದಾಕಾರವಾಗಿ ಕಾಣಿಸುತ್ತದೆ. ಈ ಸಮಸ್ಯೆಗಳಿಗೆ ಶಾಶ್ವತ ಪರಿಹಾರ ಒದಗಿಸುವಂತೆ ಶಾಸಕ, ಕಾರ್ಪೊರೇಟರ್ ಹಾಗೂ ಸರ್ಕಾರಿ ಅಧಿಕಾರಿಗಳಿಗೆ ಮನವಿ ಮಾಡುತ್ತಲೇ ಬಂದಿದ್ದವರೂ, ಈವರೆಗೂ ಪರಿಹಾರ ಸೂಚಿಸಿಲ್ಲ ಎಂದು ಕ್ಷೇತ್ರದ ಜನತೆ ಆಕ್ರೋಶ ವ್ಯಕ್ತಪಡಿಸಿದ್ದಾರೆ.
