ಶಾಲೆಗಳಿಗೆ ಶಿಕ್ಷಕಿಯರೇ ಹಿಜಾಬ್​ ಧರಿಸಿ ಬಂದ್ರು! ಮಂಡ್ಯ, ಕಲಬುರಗಿ, ರಾಯಚೂರು, ವಿಜಯಪುರದಲ್ಲಿ ಘಟನೆ

ಬೆಂಗಳೂರು: ಶಾಲಾ-ಕಾಲೇಜುಗಳ ತರಗತಿಯೊಳಗೆ ಹಿಜಾಬ್​, ಕೇಸರಿ ಶಾಲುಗಳನ್ನು ಧರಿಸುವಂತಿಲ್ಲ ಎಂದು ಹೈಕೋರ್ಟ್‌ ಪೂರ್ಣಪೀಠ ಮಧ್ಯಂತರ ಆದೇಶ ನೀಡಿದ್ದರೂ ಇಂದು(ಸೋಮವಾರ) ರಾಜ್ಯದ ಕೆಲವೆಡೆ ಮುಸ್ಲಿಂ ಶಿಕ್ಷಕಿಯರೇ ಹಿಜಾಬ್​ ಧರಿಸಿ ಶಾಲೆಗೆ ಬಂದ ಘಟನೆ ಸಂಭವಿಸಿದೆ.

ಬೆಂಗಳೂರು ಗ್ರಾಮಾಂತರ ಜಿಲ್ಲೆ ದೇವನಹಳ್ಳಿ ತಾಲೂಕಿನ ವಿಜಯಪುರ ಪಟ್ಟಣ‌ದ ಶಾಲೆಯೊಂದರಲ್ಲಿ ವಿದ್ಯಾರ್ಥಿನಿಯರು ಹಿಜಾಬ್ ಇಲ್ಲದೆ ಬಂದರೆ, ಶಿಕ್ಷಕಿಯೊಬ್ಬರು ಹಿಜಾಬ್ ಧರಿಸಿ‌ ಬಂದು ಒಡಾಟ ನಡೆಸಿ ಕೆಲ ಕಾಲ ಗೊಂದಲದ ವಾತಾವರಣ ಸೃಷ್ಟಿಸಿದ್ದರು. ಹೈಕೋರ್ಟ್​ನ ಮಧ್ಯಂತರ ಆದೇಶವಿದೆ, ಶಾಲೆಯೊಳಗೆ ಹಿಜಾಬ್​ ಹಾಕಬೇಡಿ ಎಂದು ಶಾಲೆಯ ಮುಖ್ಯಶಿಕ್ಷಕರು ಹೇಳಿದರೂ ಆ ಶಿಕ್ಷಕಿ ಕೇಳಲಿಲ್ಲ. ಹಿಜಾಬ್ ತೆಗೆಯದ ಹಿನ್ನೆಲೆ ಶಿಕ್ಷಕಿಯನ್ನ ರಜೆ ಮೇಲೆ ಆಡಳಿತ ಮಂಡಳಿ ಮನೆಗೆ ಕಳಿಸಿತು.

ಮಂಡ್ಯ ನಗರದ ರೋಟರಿ ವಿದ್ಯಾಸಂಸ್ಥೆಗೆ ಬುರ್ಕಾ ಹಾಕಿಕೊಂಡು ಬಂದ ಶಿಕ್ಷಕಿಯನ್ನು ಶಾಲಾ ಆಡಳಿತ ಮಂಡಳಿ ಗೇಟ್‌ನಲ್ಲೇ ತಡೆಯಿತು. ಹೈಕೋರ್ಟ್​ ಮಧ್ಯಂತರ ಆದೇಶದ ಅನುಸಾರ ಬುರ್ಕಾ ತೆಗೆದು ಶಾಲೆ ಒಳಹೋಗುವಂತೆ ಸೂಚಿಸಿದರು. ಬಳಿಕ ಆ ಶಿಕ್ಷಕಿ ಗೇಟ್‌ನಲ್ಲೇ ಬುರ್ಕಾ ತೆಗೆದು ಒಳಹೋದರು.

ಕಲಬುರಗಿಯಲ್ಲೂ ಶಾಲಾ ಶಿಕ್ಷಕಿಯರು ಹಿಜಾಬ್ ಧರಿಸಿಕೊಂಡೇ ಬಂದು ಸ್ಟಾಫ್​​ ರೂಂನಲ್ಲಿ ಕುಳಿತಿದ್ದ ದೃಶ್ಯ ಕಂಡು ಬಂತು. ರಾಯಚೂರು ನಗರದ ಪೋರ್ಟ್ ಪ್ರೌಢಶಾಲೆಗೆ ಹಿಜಾಬ್​ ಧರಿಸಿ ಬಂದ ವಿದ್ಯಾರ್ಥಿನಿಯರು ತರಗತಿಯಲ್ಲಿ ಹಿಜಾಬ್​ ತೆಗೆದು ಕುಳಿತರು. ಆದರೆ, ಶಿಕ್ಷಕಿ ಮಾತ್ರ ಹಿಜಾಬ್, ಬುರ್ಕಾ ಧರಿಸಿಯೇ ಪಾಠ ಮಾಡಿದರು.

https://www.vijayavani.net/a-highcourt-dismisses-karnataka-govt-order-banning-online-betting/

https://www.vijayavani.net/a-shivamogga-hospital-nurse-ganavi-gowda-donated-organ/