ಸಂತೃಪ್ತ ಜೀವನಕ್ಕೆ ಅಡ್ಡಿಯಾದ ಬಡಾವಣೆ!

ಆನೇಕಲ್​ : ಹೆನ್ನಾಗರ ಗ್ರಾಮ ಪಂಚಾಯಿತಿ ವ್ಯಾಪ್ತಿಯ ಎರಡು ಖಾಸಗಿ ಬಡಾವಣೆಗಳಲ್ಲಿ ಅನುಮತಿ ಪಡೆಯದೆ ಕೂಲಿ ಕಾರ್ಮಿಕರಿಗಾಗಿ ನಿರ್ಮಿಸಿರುವ ಶೆಡ್​ಗಳಲ್ಲಿ ಕೊಳಚೆ ಹಾಗೂ ಕಸದ ರಾಶಿ ತುಂಬಿದ್ದು, ಕಾರ್ಮಿಕರೂ ಸೇರಿ ಬಡಾವಣೆ ಜನ ಹಾಗೂ ಕಾರ್ಮಿಕರು ನೆಮ್ಮದಿ ಕಳೆದುಕೊಂಡಿದ್ದಾರೆ. 2000ಕ್ಕೂ ಹೆಚ್ಚು ಕಾರ್ಮಿಕರಿಗಾಗಿ ಶೆಡ್​ಗಳನ್ನು ನಿರ್ಮಾಣ ಮಾಡಿಕೊಡಲಾಗಿದೆ. ಆದರೆ, ಶೌಚಗೃಹ ಸೇರಿ ಯಾವುದೇ ಮೂಲಸೌಕರ್ಯ ಕಲ್ಪಿಸಿಲ್ಲ, ಶೌಚಗೃಹದಲ್ಲಿ ಬಳಸಿದ ನೀರು ಸಹ ಹೊರ ಹೋಗಲು ವ್ಯವಸ್ಥೆ ಮಾಡದ ಕಾರಣ ಶೆಡ್​ಗಳು ಗಬ್ಬು ನಾರುತ್ತಿವೆ. ಬಡಾವಣೆಗಳಲ್ಲಿ 500ಕ್ಕೂ ಹೆಚ್ಚು ಶೆಡ್​, ಮನೆಗಳಿದ್ದು, ಮೂರು ಸಾವಿರಕ್ಕೂ ಹೆಚ್ಚು ಜನ ವಾಸ ಇದ್ದಾರೆ. ಶೆಡ್​ಗಳಿಂದ ಹೊರ ಬರುತ್ತಿರುವ ಕೊಳಚೆ ನೀರಿನ ದುರ್ವಾಸನೆಗೆ ಜನ ಮನೆಯಿಂದ ಹೊರಬರಲು ಸಾಧ್ಯವಾಗದ ಸ್ಥಿತಿ ಇದೆ.

ಸರ್ವೇ ನಂಬರ್​ 77/6ರಲ್ಲಿ ಸುಮಾರು ಎರಡು ಎಕರೆಗೂ ಹೆಚ್ಚು ಖಾಲಿಯಿದ್ದ ಜಾಗದಲ್ಲಿ ಶೆಡ್​ಗಳನ್ನು ನಿರ್ಮಾಣ ಮಾಡಲು ಜಮೀನು ಮಾಲೀಕರು ಅವಕಾಶ ಕೊಟ್ಟಿದ್ದು, ಕೆಲವು ಬಡಾವಣೆ ನಿರ್ಮಾಣ ಮಾಡುತ್ತಿರುವ ಕಂಪನಿಗಳು ಇಲ್ಲಿ ಕಾರ್ಮಿಕರಿಗೆ ಇರಲು ವ್ಯವಸ್ಥೆ ಕಲ್ಪಿಸಿವೆ. ಆದರೆ, ಹಂದಿಗೂಡಿನಂತೆ ಇರುವ ಈ ಶೆಡ್​ಗಳಲ್ಲಿ ಸ್ವಲ್ಪ ಯಾಮಾರಿದರೆ ಕಾರ್ಮಿಕರು ಹಾಗೂ ಕಾರ್ಮಿಕರ ಮಕ್ಕಳು ಸಾಂಕ್ರಾಮಿಕ ರೋಗಕ್ಕೆ ತುತ್ತಾಗುವುದು ಗ್ಯಾರಂಟಿಯಾಗಿದೆ.

ಕೊಳಚೆ ನೀರಿನಲ್ಲಿ ಕಾರ್ಮಿಕರ ಮಕ್ಕಳು : ಸಾವಿರಾರು ಜನ ಕಾರ್ಮಿಕರು ವಾಸ ಇರುವ ಶೆಡ್​ಗಳಲ್ಲಿ ಕಾನೂನು ಗಾಳಿಗೆ ತೂರಿ ಪಂಚಾಯಿತಿಯಿಂದಲೂ ಅನುಮತಿ ಪಡೆಯದೆ ಅಕ್ರಮವಾಗಿ ವಾಸಕ್ಕೆ ಯೋಗ್ಯ ಇಲ್ಲದ ಜಾಗದಲ್ಲಿ ಕಬ್ಬಿಣದ ಶೆಡ್​ ನಿರ್ಮಾಣ ಮಾಡಲಾಗಿದೆ. ಕುಡಿಯಲು ಯೋಗ್ಯವಲ್ಲದ ನೀರು ಹಾಗೂ ಸ್ವಚ್ಛತೆ ಇಲ್ಲದ ಜಾಗದಲ್ಲಿ ಕಾರ್ಮಿಕರು ಹಾಗೂ ಅವರ ಮಕ್ಕಳು ವಾಸ ಮಾಡುತ್ತಿದ್ದು, ಆರೋಗ್ಯ ಇಲಾಖೆ, ಕಂದಾಯ ಇಲಾಖೆ, ಕಾರ್ಮಿಕ ಇಲಾಖೆ ಹಾಗೂ ಪಂಚಾತಿ ಅಧಿಕಾರಿಗಳು ಎಚ್ಚೆತ್ತುಕೊಳ್ಳಬೇಕಿದೆ.