ಆನೇಕಲ್: ನಟ ಪುನೀತ್ ರಾಜ್ಕುಮಾರ್ ಅವರ ನಿಧನ ಕರುನಾಡಲ್ಲಿ ಕಣ್ಣೀರ ಕೋಡಿಯನ್ನೇ ಹರಿಸಿದೆ. ನಮ್ಮೆಲ್ಲರ ಪ್ರೀತಿಯ ಅಪ್ಪು ಮಣ್ಣಲ್ಲಿ ಲೀನವಾದರೂ ಅಭಿಮಾನಿಗಳ ದುಃಖ ಮಾತ್ರ ಕೊಂಚವೂ ಕಡಿಮೆ ಆಗಿಲ್ಲ. ಪುನೀತ್ರ ಅಂತ್ಯಸಂಸ್ಕಾರ ನಡೆಯುವ ಮುನ್ನವೇ ಐವರು ಅಭಿಮಾನಿಗಳು ದುರಂತ ಅಂತ್ಯಕಂಡಿದ್ದರು. ಈ ವಿಚಾರ ತಿಳಿದು ತುಂಬಾ ನೊಂದುಕೊಂಡ ಶಿವರಾಜ್ಕುಮಾರ್ ಅವರು, ಅಪ್ಪುವಿನ ಅಂತ್ಯಸಂಸ್ಕಾರ ಮುಗಿಯುತ್ತಿದ್ದಂತೆ, 'ಅಭಿಮಾನಿಗಳೇ ದಯವಿಟ್ಟು ದುಡುಕಬೇಡಿ. ಅಪ್ಪು ಇಂತಹದ್ದನ್ನು ಎಂದೂ ಬಯಸಲ್ಲ' ಎಂದು ಕೈಮುಗಿದು ಮನವಿ ಮಾಡಿಕೊಂಡಿದ್ದರು. ಇಷ್ಟೆಲ್ಲ ಬೆಳವಣಿಗೆ ಬಳಿಕ ಆನೇಕಲ್ನಲ್ಲಿ ಅಭಿಮಾನಿಯೊಬ್ಬ 'ಪುನೀತ್ರಂತೆ ನನ್ನ ಕಣ್ಣುಗಳನ್ನು ದಾನ ಮಾಡಿ' ಎಂದು ಸಾವಿಗೆ ಶರಣಾಗಿದ್ದಾನೆ.
