ಗಣತಿದಾರರಿಗೆ ಹೊಸ 'ನಮೂನೆ' ಫಜೀತಿ!!

ಪ್ರತ್ಯೇಕವಾಗಿ ಅಂಕಿ-ಅಂಶ ನೀಡಲು ಸೂಚನೆ

ಸರ್ಕಾರದ ಆದೇಶಕ್ಕೆ ಶಿಕ್ಷಕರ ಅಸಮಾಧಾನ

ಪ್ರಶಾಂತ ಭಾಗ್ವತ ಉಡುಪಿ

ಜಿಲ್ಲೆಯಲ್ಲಿ ಸಾಮಾಜಿಕ ಮತ್ತು ಶೈಕ್ಷಣಿಕ ಸಮೀಕ್ಷಾ ಕಾರ್ಯದಲ್ಲಿ ತೊಡಗಿರುವ ಗಣತಿದಾರ ಶಿಕ್ಷಕರಿಗೆ ಹೊಸ ತಲೆಬಿಸಿ ಶುರುವಾಗಿದೆ. ಇನ್ನೆರಡು ದಿನಗಳಲ್ಲಿ (ಅ.18) ಸಮೀಕ್ಷೆ ಕಾರ್ಯ ಮುಕ್ತಾಯಗೊಳ್ಳಲಿದ್ದು, ಜನರ ಹಲವು ಅಂಕಿ-ಅಂಶಗಳನ್ನು ದೃಢೀಕರಣ ನಮೂನೆಯಲ್ಲಿ ನೀಡುವಂತೆ ಸರ್ಕಾರ ಸೂಚಿಸಿದೆ.

ಈಗಾಗಲೇ ಗಣತಿ ಕಾರ್ಯದಿಂದ ಬಸವಳಿದ ಶಿಕ್ಷಕರಿಗೆ ಈ ಹೊಸ ಸೂಚನೆಯಿಂದ ಅಸಮಾಧಾನ ಉಂಟಾಗಿದೆ. ಗಣತಿ ಕಾಲದಲ್ಲಿಯೇ ಈ ಮಾಹಿತಿ ಸಂಗ್ರಹಿಸುವಂತೆ ತಿಳಿಸದೆ ಗಣತಿ ಮುಗಿಯುವ ಸಂದರ್ಭದಲ್ಲಿ ಕೇಳುವುದು ಎಷ್ಟು ಸರಿ ಎನ್ನುವುದು ರಾಜ್ಯ ಪ್ರಾಥಮಿಕ ಶಾಲಾ ಶಿಕ್ಷಕರ ಸಂಘದ ಪ್ರಶ್ನೆಯಾಗಿದೆ.

ಸರ್ಕಾರ ಸೂಚಿಸಿದ್ದೇನು?

ಪಡಿತರ ಚೀಟಿ ಆಧಾರದಲ್ಲಿ ಸಮೀಕ್ಷೆ ಮಾಡಿದ ಮನೆಗಳ ಸಂಖ್ಯೆ, ಆಧಾರ್​ ಆಧಾರಿತ ಗಣತಿ ಮನೆಗಳ ಸಂಖ್ಯೆ, ಮಾಹಿತಿ ನೀಡದವರ ಸಂಖ್ಯೆ, ಸಮೀಕ್ಷೆಗೆ ಒಳಪಡದವರ ಸಂಖ್ಯೆ, ಮೃತರಾದವರ ಮಾಹಿತಿ, ಹೊರದೇಶದಲ್ಲಿ ವಾಸಿಸುವರ ಸಂಖ್ಯೆ, ಚಿಕ್ಕ ಮಕ್ಕಳ ಸಂಖ್ಯೆ ಹೀಗೆ ಹಲವಾರು ಅಂಕಿ-ಅಂಶಗಳನ್ನು ಪ್ರತ್ಯೇಕ ನಮೂನೆಗಳಲ್ಲಿ ದೃಢೀಕರಣ ನೀಡುವಂತೆ ಗಣತಿದಾರರಿಗೆ ಸರ್ಕಾರ ಸೂಚಿಸಿದೆ.

ಶಿಕ್ಷಕರು ಹೇಳುವುದೇನು?

ಸಮೀಕ್ಷೆ ಕಾರ್ಯ ಸರ್ಕಾರದ ಕೆಲಸವಾಗಿದ್ದರಿಂದ ಎಷ್ಟೇ ತೊಡಕು ಇದ್ದರೂ ನಿಭಾಯಿಸಿದ್ದೇವೆ. ಸಮೀಕ್ಷೆಗೆ ಸಂಬಂಧಿಸಿದಂತೆ ಆ್ಯಪ್​ನ ಸಮಸ್ಯೆ ಇದ್ದರೂ ಯುಎಚ್​ಐಡಿ ಮ್ಯಾಪ್​ ಮೂಲಕ ಕುಟುಂಬಗಳ ಗುರುತಿಸಿದ್ದೇವೆ. ಮನೆಗಳ ಪಟ್ಟಿ ನೀಡಿಲ್ಲ. ನ್ಯಾವಿಗೇಷನ್​ ಸರಿಯಾಗಿ ಕೊಟ್ಟಿಲ್ಲ. ಸರಿಯಾಗಿ ಬ್ಲಾಕ್​ ಹಂಚಿಕೆಯನ್ನೂ ಮಾಡಿಲ್ಲ. ಇಂತಹ ಅನೇಕ ಸಮಸ್ಯೆ ನಡುವೆಯೂ ಜಿಲ್ಲೆಯ ಎಲ್ಲ ಶಿಕ್ಷಕ ಗಣತಿದಾರರು ಸಮೀಕ್ಷೆ ಮಾಡಿದ್ದಾರೆ. 2-3 ಬಾರಿ ಕುಟುಂಬಗಳನ್ನು ಭೇಟಿಯಾಗಿ, ಗಂಟೆಗಟ್ಟಲೆ ಪ್ರಯಾಸಪಟ್ಟು, ಅತ್ಯಂತ ಜಾಗರೂಕತೆಯಿಂದ ಗಣಕೀಕರಣ ಮಾಡಿದ್ದೇವೆ. ಈಗ ಪ್ರತ್ಯೇಕವಾಗಿ ಮಾಹಿತಿ ಕೊಡಿ ಎನ್ನುವುದು ಸರಿಯೇ ಎಂದು ಪ್ರಶ್ನಿಸಿದ್ದಾರೆ.

ಶೈಕ್ಷಣಿಕ ಸಿದ್ಧತೆಗೂ ತೊಡಕು