ಕಿರುವಾರ ಎಸ್.ಸುದರ್ಶನ್ ಕೋಲಾರ
ತಾಲೂಕಿನ ವಕ್ಕಲೇರಿ ಸಮೀಪವಿರುವ ನವೋದಯ ವಸತಿ ಶಾಲೆಯು ನರೇಗಾ ಸ್ಪರ್ಶದಿಂದ ಹೊಸ ರೂಪ ಪಡೆದುಕೊಂಡಿದೆ.
ನರೇಗಾ ಯೋಜನೆಯಡಿ ಒಟ್ಟು 31 ಲಕ್ಷ ರೂ. ವೆಚ್ಚದಲ್ಲಿ 10ಕ್ಕೂ ಹೆಚ್ಚು ಕಾಮಗಾರಿಗಳನ್ನು ಕೈಗೆತ್ತಿಕೊಳ್ಳಲಾಗಿದೆ. ಶಾಲೆಯು ಗ್ರಾಮದ ಹೊರವಲಯದಲ್ಲಿದ್ದು, ಕ್ರೀಡಾಂಗಣ, ಕಾಲುವೆ, ಸಿಸಿ ರಸ್ತೆ ನಿರ್ಮಾಣ, ಪೌಷ್ಟಿಕ ತೋಟ, ಅರಣ್ಯೀಕರಣ, ಚರಂಡಿ ಹೀಗೆ ಹಲವು ಅಭಿವೃದ್ಧಿ ಕಾಮಗಾರಿಗಳನ್ನು ಕೈಗೆತ್ತಿಕೊಳ್ಳಲಾಗಿದೆ. ಶೌಚಗೃಹ, ಇಂಗುಗುಂಡಿ, ಸಿಸಿ ರಸ್ತೆ, ಚರಂಡಿ, ಬದು ನಿಮಾರ್ಣ, ಸಣ್ಣ ಕೃಷಿ ಹೊಂಡ ನಿಮಾರ್ಣ, ಬಾಸ್ಕೆಟ್ ಬಾಲ್, ುಟ್ಬಾಲ್ ಕೋರ್ಟ್ ನಿರ್ಮಿಸುವುದು ಯೋಜನೆಯ ಉದ್ದೇಶವಾಗಿದೆ. ಕಾಮಗಾರಿಗಳನ್ನು ಅನುಷ್ಠಾನಗೊಳಿಸಲು ಶಾಲೆಯನ್ನು ಆಯ್ಕೆ ಮಾಡಿಕೊಂಡಿರುವ ಪಂಚಾಯಿತಿ ಅಧಿಕಾರಿಗಳು ಆದ್ಯತೆ ಮೇರೆಗೆ ಕೆಲಸಗಳನ್ನು ಆರಂಭಿಸಿದ್ದಾರೆ. ಕೆಲ ಅಭಿವೃದ್ಧಿ ಕೆಲಸಗಳು ಈಗಾಗಲೇ ಪೂರ್ಣಗೊಂಡಿವೆ.
ಯೋಜನೆಯಡಿ 5,113 ಮಾನವ ದಿನ ಸೃಜಿಸಿ ಕಾರ್ಮಿಕರಿಗೆ 15 ಲಕ್ಷ ರೂ. ವೆಚ್ಚ ಮಾಡಲಾಗಿದೆ. ಶಾಲಾ ಆವರಣದಲ್ಲಿ ಖೋಖೋ, ಕಬಡ್ಡಿ, ಬಾಸ್ಕೆಟ್ ಬಾಲ್ ಕೋರ್ಟ್ ನಿರ್ಮಾಣ ಪ್ರಗತಿಯಲ್ಲಿದೆ. ಅರಣ್ಯೀಕರಣದಡಿ ಸಾವಿರಕ್ಕೂ ಹೆಚ್ಚು ಗಿಡಗಳನ್ನು ನಾಟಿ ಮಾಡಲಾಗಿದೆ. ಪೌಷ್ಟಿಕ ತೋಟದಲ್ಲಿ ತರಕಾರಿ, ಹಣ್ಣು ಬೆಳೆಗಳನ್ನು ನಾಟಿ ಮಾಡಲಾಗಿದೆ. ಈ ಮೂಲಕ ಮಕ್ಕಳ ಕಲಿಕೆಗೆ ಪೂರಕ ವಾತಾವರಣ ನಿರ್ಮಿಸಲಾಗಿದೆೆ. ಆವರಣದಲ್ಲಿ ಶಾಲಾ ಕೊಠಡಿಗಳು, ಭೋಜನಾ ಶಾಲೆ, ಬಾಲಕ ಮತ್ತು ಬಾಲಕರಿಯರ ವಸತಿ ಗೃಹಗಳು, ಬೋಧಕ ಮತ್ತು ಬೋಧಕೇತರ ವಸತಿ ಗೃಹಗಳಿವೆ.
ಓಡಾಡಲು ಸಮರ್ಪಕ ರಸ್ತೆ ಇರಲಿಲ್ಲವಾದ್ಧರಿಂದ ಸಿಸಿ ರಸ್ತೆ ನಿರ್ಮಾಣ ಮಾಡಲಾಗಿದೆ. ಮಳೆ ನೀರು ಸರಾಗವಾಗಿ ಹರಿದು ಹೋಗಲು ಕಾಲುವೆ ನಿರ್ಮಿಸಲಾಗಿದೆ.
