ಶೌಚಗೃಹಕ್ಕೆ ಹೋಗಿ ಬರುವೆ ಎಂದೇಳಿ ಬಸ್​ ನಿಲ್ದಾಣದಲ್ಲಿ ಯುವಕನಿಗೆ ಮಗು ಕೊಟ್ಟು ಹೋದ ಅಪರಿಚಿತೆ ಹೀಗಾ ಮಾಡೋದು?

ಮೈಸೂರು: ಅಪರಿಚಿತ ಮಹಿಳೆಯೊಬ್ಬರು 9 ತಿಂಗಳ ಹೆಣ್ಣು ಮಗುವನ್ನು ಬಸ್​ ನಿಲ್ದಾಣದಲ್ಲಿ ಯುವಕನಿಗೆ ನೀಡಿ ನಾಪತ್ತೆಯಾಗಿರುವ ಅಮಾನವೀಯ ಪ್ರಕರಣ ರಾಯಚೂರಿನಲ್ಲಿ ನಡೆದಿದ್ದು, ಮೈಸೂರಿನಲ್ಲಿ ಬೆಳಕಿಗೆ ಬಂದಿದೆ.

ಮೈಸೂರು ಜಿಲ್ಲೆ ಎಚ್​.ಡಿ.ಕೋಟೆಯ ನಿವಾಸಿ ರಘು ಎಂಬುವರು ಕೆಲಸದ ನಿಮಿತ್ತ ರಾಯಚೂರಿಗೆ ತೆರಳಿದ್ದರು. ರಾಯಚೂರಿನಿಂದ ಮೈಸೂರಿಗೆ ಹಿಂದಿರುಗಲು ಭಾನುವಾರ ಮಧ್ಯಾಹ್ನ ಬಸ್​ ನಿಲ್ದಾಣದಲ್ಲಿದ್ದರು. ಈ ವೇಳೆ ಮಹಿಳೆಯೊಬ್ಬಳು ರಘು ಬಳಿ ಬಂದು ಶೌಚಗೃಹಕ್ಕೆ ಹೋಗಿ ಬರುವೆ. 5 ನಿಮಿಷ ಮಗುವನ್ನು ಕೂರಿಸಿಕೊಳ್ಳಿ ವಾಪಸ್​ ಬರುವೆ ಎಂದೇಳಿ ಮಗುವನ್ನು ಕೊಟ್ಟು ಹೋಗಿದ್ದಾಳೆ. ಆದರೆ, ಸುಮಾರು ಹೊತ್ತಾದರೂ ಆ ಮಹಿಳೆ ಹಿಂದಿರುಗದ ಕಾರಣ ರಘು ಇಡೀ ಬಸ್​ ನಿಲ್ದಾಣದಲ್ಲಿ ಹುಡುಕಾಡಿದ್ದಾರೆ.

ಬಳಿಕ ಬಸ್​ ಹೊರಡಲು ಸಿದ್ಧವಾಗಿದ್ದರಿಂದ ಮಗುವನ್ನು ತಮ್ಮ ಜತೆಯೇ ಮೈಸೂರಿಗೆ ಕರೆತಂದಿದ್ದಾರೆ. ಮೈಸೂರಿನಲ್ಲಿ ಸೋಮವಾರ ಬೆಳಗ್ಗೆ ಬಸ್​ ಇಳಿಯುತ್ತಿದ್ದಂತೆ ನೇರ ಲಷ್ಕರ್​ ಪೊಲೀಸ್​ ಠಾಣೆಗೆ ಹೋಗಿ ಮಗುವನ್ನು ಒಪ್ಪಿಸಿದ್ದಾರೆ. ಈ ಹಿನ್ನೆಲೆಯಲ್ಲಿ ಲಷ್ಕರ್​ ಪೊಲೀಸರು ಮಗುವನ್ನು ರಕ್ಷಿಸಿ, ಆರೈಕೆ ಮಾಡಿ ಮಾನವೀಯತೆ ಮೆರೆದಿದ್ದಾರೆ. ನಂತರ ಮಗುವನ್ನು ಸರ್ಕಾರಿ ಬಾಲ ಮಂದಿರಕ್ಕೆ ಒಪ್ಪಿಸಿದ್ದಾರೆ.

https://www.vijayavani.net/a-chamarajanagara-kollegala-sri-seegamaramma-temple-jatre/

https://www.vijayavani.net/a-aamir-khans-daughter-ira-khan-cuts-her-birthday-cake-in-a-bikini-as-she-enjoys-some-pool-time-with-family/