ಕೃಷಿ ಹೊಂಡಕ್ಕೆ ತಾಯಿ-ಮಗ ಬಲಿ: ಮಗನನ್ನು ರಕ್ಷಿಸಲು ಹೋದ ತಾಯಿಯೂ ಬದುಕಲಿಲ್ಲ...

ಸಿರಗುಪ್ಪ(ಬಳ್ಳಾರಿ): ಇತ್ತೀಚೆಗೆ ಕೃಷಿ ಹೊಂಡಗಳಿಗೆ ಬಲಿಯಾಗುತ್ತಿರುವವರ ಸಂಖ್ಯೆ ಹೆಚ್ಚುತ್ತಲೇ ಇದೆ. ಆತ್ಮಹತ್ಯೆ, ನೀರಾಟ, ಕಾಲುಜಾರಿ, ನೀರು ಕುಡಿಯಲು ಹೋಗಿ... ಹೀಗೆ ಒಂದಲ್ಲ ಒಂದು ಕಾರಣಕ್ಕೆ ಕೃಷಿ ಹೊಂಡಕ್ಕೆ ಬಿದ್ದು ಮಕ್ಕಳು ಮತ್ತು ಪೋಷಕರು ಸಾವಿಗೀಡಾಗುವ ಪ್ರಕರಣಗಳು ಹೆಚ್ಚಾಗಿ ವರದಿಯಾಗುತ್ತಿವೆ. ನಿನ್ನೆ(ಬುಧವಾರ) ಬಳ್ಳಾರಿ ಜಿಲ್ಲೆಯಲ್ಲೂ ತಾಯಿ-ಮಗ ಕೃಷಿಹೊಂಡಕ್ಕೆ ಬಿದ್ದು ದುರಂತ ಅಂತ್ಯ ಕಂಡಿದ್ದಾರೆ.

ಸಿರಗುಪ್ಪ ತಾಲೂಕಿನ ಮುದೇನೂರು ಗ್ರಾಮದ ವೀರೇಶ್ ಎಂಬುವರ ಪತ್ನಿ ಪವಿತ್ರಾ ವೀರೇಶ (28) ಮತ್ತು ಮಗ ಕಾರ್ತಿಕ ವೀರೇಶ (8) ಮೃತರು. ವೀರೇಶ ಎರಡು ಎಕರೆ ಜಮೀನಿನಲ್ಲಿ ಹತ್ತಿ ಬಿತ್ತನೆ ಮಾಡಿದ್ದು, ಬೆಳೆಗಾಗಿ ಕೃಷಿ ಹೊಂಡವನ್ನೂ ನಿರ್ಮಿಸಿಕೊಂಡಿದ್ದಾರೆ. ಎಂದಿನಂತೆ ವೀರೇಶನ ಹೆಂಡತಿ ಪವಿತ್ರಾ ಮತ್ತು ಮಗ ಕಾರ್ತಿಕ ಬುಧವಾರ ಹೊಲಕ್ಕೆ ಹೋಗಿದ್ದರು.

ಕೃಷಿ ಹೊಂಡದಲ್ಲಿ ನೀರು ಕುಡಿಯಲು ಹೋದ ಕಾರ್ತಿಕ ಆಕಸ್ಮಿಕವಾಗಿ ಕಾಲುಜಾರಿ ಬಿದ್ದಿದ್ದಾನೆ. ಆತನನ್ನು ರಕ್ಷಿಸಲು ಹೋದ ತಾಯಿ ಪವಿತ್ರಾ ಕೂಡ ನೀರಲ್ಲಿ ಬಿದ್ದಿದ್ದಾರೆ. ಈಜು ಬಾರದ ಕಾರಣ ಇಬ್ಬರೂ ಮುಳುಗಿ ಮೃತಪಟ್ಟಿದ್ದಾರೆ. ಪಿಎಸ್​ಐ ರಂಗಯ್ಯ, ಸಹಾಯಕ ಕೃಷಿ ನಿರ್ದೇಶಕ ಜಮೀರ್​ ಅಹ್ಮದ್​, ಕಂದಾಯ ಅಧಿಕಾರಿ ಶೇಕ್ಷಾವಲಿ ಸ್ಥಳಕ್ಕೆ ತೆರಳಿ ಪರಿಶೀಲನೆ ನಡೆಸಿದ್ದಾರೆ. ಪಟ್ಟಣ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.

https://www.vijayavani.net/farm-pits-may-become-dangerous/

https://www.vijayavani.net/a-koppala-gangavati-anegondi-daba-fire-accident/