ಬಸ್​ ನಿಲ್ದಾಣದಲ್ಲಿ ಸೌಲಭ್ಯ ಮರೀಚಿಕೆ

ಕಿಶೋರ್​ ಕುಮಾರ್​ ವಿ.ಎಂ. ವಿಜಯಪುರ

ಎಲ್ಲೆಂದರಲ್ಲಿ ಗುಟ್ಖಾ, ಎಲೆ, ಅಡಕೆ ಅಗೆದು ಉಗಿಯಲಾಗುತ್ತದೆ, ಕಸದ ರಾಶಿಯಿಂದ ಅಸಹ್ಯಕರ ವಾತಾವರಣ, ಮುರಿದ ಕುರ್ಚಿಗಳು, ಅನಧಿಕೃತ ಜಾಹೀರಾತು ಫಲಕಗಳು ವಿಜಯಪುರ ಬಸ್​ ನಿಲ್ದಾಣದ ಅಂದವನ್ನೇ ಕೆಡಿಸಿವೆ.

ಹೌದು..! ಮೂಲಸೌಕರ್ಯಗಳಿಲ್ಲದೆ ವಿಜಯಪುರ ಬಸ್​ ನಿಲ್ದಾಣ ಸೊರಗಿದ್ದು, ನಿಲ್ದಾಣದಲ್ಲಿ ಸ್ವಚ್ಛತೆ ಮರೀಚಿಕೆಯಾಗಿದೆ.

ಬಸ್​ ನಿಲ್ದಾಣದಲ್ಲಿ ಕುಡಿಯುವ ನೀರಿಲ್ಲ. ಶೌಚಗೃಹದ ನಿರ್ವಹಣೆ ದೂರದ ಮಾತನಾಗಿದೆ. ನಿಲ್ದಾಣದ ನೆಲಹಾಸಿಗೆ ಕಿತ್ತಿರುವುದು ಪ್ರಯಾಣಿಕರಿಗೆ ಕಿರಿಕಿರಿ ಮಾಡುತ್ತಿದೆ. ರಾತ್ರಿ ವೇಳೆ ಸೂಕ್ತ ಬೆಳಕಿನ ವ್ಯವಸ್ಥೆ ಇಲ್ಲದಿರುವುದು ಕುಡುಕರ ತಾಣವಾಗಿ ಮಾರ್ಪಡುತ್ತಿದೆ. ಬಸ್​ ನಿಲ್ದಾಣದ ಅವ್ಯವಸ್ಥೆಯಿಂದ ಪ್ರಯಾಣಿಕರು ಗಂಟೆ ಗಂಟಲೇ ಬಸ್ಸಿಗಾಗಿ ನಿಂತುಕೊಂಡೇ ಕಾಯಬೇಕಿದೆ. ಇಲ್ಲಿಯೇ ರಸ್ತೆ ವಿಸ್ತರಣೆ ಕಾಮಗಾರಿ ಆರಂಭದಿಂದ ಧೂಳು ಹೆಚ್ಚಾಗಿರುವುದರಿಂದ ಅಂಗಡಿ ಮಳಿಗೆಗಳಲ್ಲಿರುವವರು ಹಾಗೂ ಪ್ರಯಾಣಿಕರ ಆರೋಗ್ಯದ ಮೇಲೆ ದುಷ್ಪರಿಣಾಮ ಬೀಳುತ್ತಿದೆ. ಸಾರಿಗೆ ಬಸ್​ಗಳು ಹಾಗೂ ಖಾಸಗಿ ಬಸ್​ ಒಂದೇ ನಿಲ್ದಾಣಕ್ಕೆ ಬಂದು ಸೇರುವುದರಿಂದ ಚಾಲಕರ ನಡುವೆ ಪೈಪೋಟಿ ಏರ್ಪಟ್ಟಿದೆ. ಎಲ್ಲೆಂದರಲ್ಲಿ ಬೈಕ್​, ಕಾರುಗಳನ್ನು ನಿಲ್ಲಿಸುವುದರಿಂದ ಬಸ್​ಗಳ ಸಂಚಾರಕ್ಕೆ, ಪ್ರಯಾಣಿಕರಿಗೆ ತೊಂದರೆ ಉಂಟಾಗಿದೆ.

ನಿಲ್ದಾಣದಲ್ಲೇ ರೇಷ್ಮೆ ವ್ಯಾಪಾರ : ಪ್ರತಿನಿತ್ಯವೂ ಪಟ್ಟಣಕ್ಕೆ ಬೆಂಗಳೂರು, ಕೋಲಾರ, ಚಿಕ್ಕಬಳ್ಳಾಪುರ, ಶಿಡ್ಲಟ್ಟ, ತುಮಕೂರು, ತಿರುಪತಿ, ಬೆಂಗಳೂರು ಗ್ರಾಮಾಂತರ ಜಿಲ್ಲೆಯ ಹೊಸಕೋಟೆ, ದೇವನಹಳ್ಳಿ ದೊಡ್ಡಬಳ್ಳಾಪುರ ಸೇರಿ ಅನೇಕ ಕಡೆಗಳಿಗೆ ಈ ನಿಲ್ದಾಣದ ಮೂಲಕವೇ ಬಸ್​ ಸಂಚರಿಸುತ್ತವೆ. ಇಲ್ಲಿ ಪಕ್ಕದಲೇ ರೇಷ್ಮೆ ಮಾರುಕಟ್ಟೆ ಇದ್ದರೂ, ಕೆಲವರು ಬಸ್​ ನಿಲ್ದಾಣದಲ್ಲೇ ರೇಷ್ಮೆ ವ್ಯಾಪಾರ ಮಾಡುವುದರಿಂದ ಬಸ್​ ನಿಲ್ದಾಣವೋ ಅಥವಾ ರೇಷ್ಮೆ ಮಾರುಕಟ್ಟೆಯೋ ಎಂಬುದೇ ಗೊತ್ತಾಗುವುದಿಲ್ಲ. ಇಲ್ಲಿನ ಬಸ್​ ನಿಲ್ದಾಣದಿಂದ ದಿನನಿತ್ಯ ನೂರಾರು ವಿದ್ಯಾರ್ಥಿಗಳು, ಉದ್ಯೋಗಿಗಳು, ಸಾರ್ವಜನಿಕರು ಬಸ್​ ಸಂಚಾರ ಅವಲಂಬಿಸಿದ್ದಾರೆ. ಕಾಂಗ್ರೆಸ್​ ಸರ್ಕಾರ "ಶಕ್ತಿ' ಯೋಜನೆಯಡಿ ನೀಡಿರುವ ಮಹಿಳೆಯರಿಗೆ ಉಚಿತ ಬಸ್​ ಸೌಲಭ್ಯದಿಂದ ಮಹಿಳಾ ಪ್ರಯಾಣಿಕರ ಸಂಖ್ಯೆ ಏರಿಕೆಯಾಗಿದೆ. ಆದರೆ ಬಸ್​ ನಿಲ್ದಾಣದಲ್ಲಿ ಮೂಲಸೌಲಭ್ಯಗಳ ಕೊರತೆಯಿಂದ ಪ್ರಯಾಣಿಕರು ನಲುಗಿದ್ದಾರೆ.

ಡಿಪೋ ಆರಂಭಕ್ಕೆ ಇನ್ನೆಷ್ಟು ವರ್ಷ? : ಕಳೆದ 20 ವರ್ಷಗಳ ಹಿಂದೆ ಚೆಲುವರಾಯಸ್ವಾಮಿ ಅವರು ಸಾರಿಗೆ ಸಚಿವರಾಗಿದ್ದ ಅವಧಿಯಲ್ಲಿ ವಿಜಯಪುರದಲ್ಲಿ ಬಸ್​ ಡಿಪೋ ಮಂಜೂರು ಮಾಡಿದ್ದರು. ಅದಾದ ದಶಕದ ಬಳಿಕ ನಿವೇಶನ ದೊರೆಯಿತು. ನಂತರ ನಾಲ್ಕಾರು ವರ್ಷಗಳ ಬಳಿಕ ಡಿಪೋಗೆ 4 ಎಕರೆ ನಿವೇಶನ ಸಿಕ್ಕಿದ್ದು, ನಿವೇಶನಕ್ಕೆ ಕಾಂಪೌಂಡ್​ ನಿರ್ಮಿಸಿ ಹಾಗೇ ಬಿಡಲಾಗಿದೆ. ಡಿಪೋ ಮಂಜೂರಿಗೆ 10 ವರ್ಷ, ನಿವೇಶನ ಗುರುತಿಸಲು 4 ವರ್ಷ ಬೇಕಾದರೆ ಇನ್ನು ಡಿಪೋ ನಿರ್ಮಾಣಕ್ಕೆ ಇನ್ನೆಷ್ಟು ವರ್ಷಗಳ ಕಾಲ ಕಾಯಬೇಕೋ? ಎಂದು ಜನ ಅಧಿಕಾರಿಗಳ ವಿರುದ್ಧ ಆಕ್ರೋಶ ವ್ಯಕ್ತಪಡಿಸುತ್ತಿದ್ದಾರೆ.

ಹೋಟೆಲ್​ ಇಲ್ಲದೆ ಪರದಾಟ : ಕರೊನಾ ವೇಳೆ ಬಸ್​ ನಿಲ್ದಾಣದಲ್ಲಿನ ಹೋಟೆಲ್​ ಮುಚ್ಚಲಾಗಿದ್ದು, ಆದರೆ, ಮತ್ತೆ ಆರಂಭಗೊಳ್ಳದ ಪರಿಣಾಮ ಪ್ರಯಾಣಿಕರು ಹಾಗೂ ಕೆಎಸ್​ಆರ್​ಟಿಸಿ, ಬಿಎಂಟಿಸಿ ಬಸ್​ ಚಾಲಕರು, ನಿರ್ವಾಹಕರು ಊಟ, ತಿಂಡಿ, ಕಾಫಿಗಾಗಿ ದೂರದ ಹೋಟೆಲ್​ಗಳಿಗೆ ಹೋಗಬೇಕು. ಉಪಾಹಾರ, ಊಟ ಮುಗಿಸಿಕೊಂಡು ಬರುವುದು ತಡವಾಗುವುದರಿಂದ ಬಸ್​ಗಳ ಸಮಯ ನಿರ್ವಹಣೆಯಲ್ಲಿಯೂ ಅಡೆತಡೆ ಉಂಟಾಗುತ್ತಿದೆ.