ನದಿಯಲ್ಲಿ ಕೊಚ್ಚಿಹೋದ ವ್ಯಕ್ತಿ

ಕೈಲಾಂಚ: ಹೋಬಳಿಯ ಹುಲಿಕೆರೆ ಗ್ರಾಮದ ಬಳಿ ಮಂಗಳವಾರ ಬೆಳಗ್ಗೆ ಅರ್ಕಾವತಿ ನದಿ ದಾಟುತ್ತಿದ್ದ ಸಬ್ಬಕೆರೆ ಗ್ರಾಮದ ಅಬ್ದುಲ್ ವಾಜಿದ್ (43) ಕೊಚ್ಚಿಹೋಗಿದ್ದಾರೆ.

ಹುಲಿಕೆರೆ ಗ್ರಾಮದ ಮಸ್ರೂರ್ ಅಲಿಖಾನ್ ಎಂಬುವವರ ಮನೆಗೆ ಕೂಲಿ ಕೆಲಸಕ್ಕೆ ಹೋಗಲು ವಾಜಿದ್ ಸೈಕಲ್​ನಲ್ಲಿ ತೆರಳಿದ್ದಾರೆ. ಕೋಟಹಳ್ಳಿ ಮೂಲಕ ಹೋಗುವಾಗ ನೀರಿನ ರಭಸಕ್ಕೆ ಕೊಚ್ಚಿ ಹೋಗಿದ್ದಾರೆ. ಅಕ್ಕಪಕ್ಕದಲ್ಲಿದ್ದವರು ವಾಜಿದ್ ರಕ್ಷಣೆಗೆ ಧಾವಿಸಿದರಾದರೂ ರಕ್ಷಿಸಲಾಗಲಿಲ್ಲ. ಅಗ್ನಿಶಾಮಕ ದಳ ಸಿಬ್ಬಂದಿ ಗಂಟೆಗೂ ಹೆಚ್ಚು ಕಾಲ ಶೋಧ ಕಾರ್ಯನಡೆಸಿ ಮೃತದೇಹವನ್ನು ಹೊರತಂದರು.

ಕೋಟಹಳ್ಳಿ-ಹುಲಿಕೆರೆ ಮಧ್ಯೆ ಅರ್ಕಾವತಿ ನದಿಗೆ ಸೇತುವೆ ನಿರ್ವಿುಸಿಕೊಡಬೇಕು, ಮೃತ ವ್ಯಕ್ತಿ ಕುಟುಂಬಕ್ಕೆ 10 ಲಕ್ಷ ರೂ. ಪರಿಹಾರ ನೀಡಬೇಕು ಎಂದು ಅಕ್ಕಪಕ್ಕದ ಗ್ರಾಮಗಳ ನೂರಾರು ಮಂದಿ ಕನಕಪುರ-ರಾಮನಗರ ರಸ್ತೆಯಲ್ಲಿ ಶವ ಇಟ್ಟು ಪ್ರತಿಭಟನೆ ನಡೆಸಿದರು.

ತಹಸೀಲ್ದಾರ್ ನರಸಿಂಹಮೂರ್ತಿ, ಉಪತಹಸೀಲ್ದಾರ್ ವಿಲಿಯಂ, ರಾಜಸ್ವ ನಿರೀಕ್ಷಕ ಸ್ವಾಮಿ, ಸರ್ಕಲ್ ಇನ್​ಸ್ಪೆಕ್ಟರ್ ಸುರೇಶ್, ಗ್ರಾ.ಠಾಣೆ ಸಬ್​ಇನ್​ಸ್ಪೆಕ್ಟರ್ ಗಂಗಾಧರ್, ಲೋಕೋಪಯೋಗಿ ಇಲಾಖೆ ಇಇ ವಿಜಯಗೋಪಾಲ್ ಮತ್ತಿತರರು ಇದ್ದರು.

ಗ್ರಾಮಸ್ಥರಾದ ವೆಂಕಟೇಶ್, ಶಂಕರ್, ಶ್ರೀನಿವಾಸಮೂರ್ತಿ, ನಾಗರಾಜು, ನಾಗೇಶ್, ವೆಂಕಟೇಶ್​ವುೂರ್ತಿ, ಹೊನ್ನದಾಸೇಗೌಡ, ಕಿರಣ್, ದೇವರಾಜು, ರಾಮಚಂದ್ರು, ರುದ್ರಣ್ಣ, ನರಸಿಂಹಮೂರ್ತಿ, ಚಿಕ್ಕಮರಿಯಪ್ಪ, ವೆಂಕಟಾಚಲಪ್ಪ, ಲಿಂಗರಾಜು ಪ್ರತಿಭಟನೆಯ ನೇತೃತ್ವ ವಹಿಸಿದ್ದರು.

19ನೇ ಬಲಿ

ಸ್ಥಳೀಯರು ಮಾಹಿತಿ ನೀಡುವಂತೆ ಹುಲಿಕೆರೆ ಬಳಿ ವಾಜಿದ್ ಸಾವು 19ನೆಯದು. ಕಳೆದ ವರ್ಷ ಹುಲಿಕೆರೆ ಗ್ರಾಮದ ವೃದ್ಧರೊಬ್ಬರು ಸೇರಿ ಮೂವರು, 2 ವರ್ಷಗಳ ಹಿಂದೆ ಮೂವರು ನದಿ ಪಾಲಾಗಿದ್ದಾರೆ.

ಜಿಲ್ಲಾಧಿಕಾರಿ ಭೇಟಿ

ಜಿಲ್ಲಾಧಿಕಾರಿ ಎಂ.ಎಸ್. ಅರ್ಚನಾ ಪ್ರತಿಭಟನಾ ಸ್ಥಳಕ್ಕೆ ಭೇಟಿ ನೀಡಿ ಪ್ರತಿಭಟನಾಕಾರರ ಮನವೊಲಿಸಿದ ನಂತರ ರಸ್ತೆಗೆ ಅಡ್ಡವಾಗಿ ನಿಲ್ಲಿಸಿದ್ದ ವಾಹನಗಳು, ಮರದ ದಿಮ್ಮಿಗಳನ್ನು ಪೊಲೀಸರು ತೆರವುಗೊಳಿಸಿ, ಮೃತದೇಹವನ್ನು ರಾಮನಗರ ಜಿಲ್ಲಾಸ್ಪತ್ರೆಗೆ ಸಾಗಿಸಿದರು.