ಪಡುಬಿದ್ರಿ ಪಡುಬಿದ್ರಿಯ ಎಲ್ಲೂರು ಗ್ರಾಮದ ಮಾಣಿಯೂರಿನಲ್ಲಿ ಗುರುವಾರ ರಾತ್ರಿ ಮನೆಯಂಗಳಕ್ಕೆ ಬಂದ ಚಿರತೆ, ಸಾಕುನಾಯಿಯನ್ನು ಹೊತ್ತೊಯ್ದಿದೆ. ಮಾಣಿಯೂರಿನ ಮುರಳಿ ಶೆಟ್ಟಿ ಎಂಬುವರ ಮನೆ ನಾಯಿ ಜೋರಾಗಿ ಬೊಗಳಿದ್ದು, ಮನೆಮಂದಿ ಹೊರಬಂದು ನೋಡಿದಾಗ ಯಾರೂ ಇರಲಿಲ್ಲ. ಮತ್ತೊಮ್ಮೆ ನಾಯಿ ಬೊಗಳಲಾರಂಭಿಸಿದ್ದು, ಏಕಾಏಕಿ ನಿಲ್ಲಿಸಿತು. ಸಿಸಿಟಿವಿ ಪರಿಶೀಲಿಸಿದಾಗ, ಅಂಗಳಕ್ಕೆ ಬಂದ ಚಿರತೆ ನಾಯಿಯನ್ನು ಹೊತ್ತೊಯ್ಯುವ ದೃಶ್ಯ ಕಂಡುಬಂತು. ವಾರದ ಹಿಂದೆ, ಶಿರ್ವ ಪರಿಸರದಲ್ಲಿ ಚಿರತೆ ಕಾಣಿಸಿಕೊಂಡಿದ್ದು, 10 ದಿನಗಳ ಹಿಂದೆ ಮುದರಂಗಡಿ ಗ್ರಾಮದ ಸಾಂತೂರಿನಲ್ಲಿ ಮನೆ ಬಾವಿಗೆ ಬಿದ್ದ ಚಿರತೆಯನ್ನು ಅರಣ್ಯ ಇಲಾಖೆ ರಕ್ಷಿಸಿ ಕಾಡಿಗೆ ಬಿಟ್ಟಿತ್ತು. ಸುತ್ತಮುತ್ತಲ ಗ್ರಾಮದವರು ಆತಂಕಗೊಂಡಿದ್ದಾರೆ.
