ಕಾರವಾರ ಕೆನರಾ ಬ್ಯಾಂಕ್ ಕಾಲನಿಯ 26 ವರ್ಷದ ಅಭಿಷೇಕ ಮಗರ್ ಹಡಗಿನಲ್ಲಿ ಸಿಲುಕಿರುವ ವ್ಯಕ್ತಿ. ಎನ್ಡಬ್ಲ್ಯುಕೆಎಸ್ಆರ್ಟಿಸಿ ಕಾರವಾರ ಘಟಕದಲ್ಲಿ ತಂತ್ರಜ್ಞರಾಗಿರುವ ಅವರ ತಂದೆ ಬಾಲಕೃಷ್ಣ ಮಗರ್, ಮಗನನ್ನು ರಕ್ಷಿಸುವಂತೆ ಜಿಲ್ಲಾಧಿಕಾರಿಗೆ ಮನವಿ ಮಾಡಿದ್ದಾರೆ. ಗೋವಾದಲ್ಲಿ ಹೋಟೆಲ್ ಮ್ಯಾನೇಜ್ವೆುಂಟ್ ಕೋರ್ಸ್ ಮಾಡಿಕೊಂಡಿದ್ದ ಅಭಿಷೇಕ, ಬಮುಡಾ ಮೂಲದ ಪ್ರಿನ್ಸಸ್ ಕ್ರೂಸ್ಲೈನ್ ಲಿಮಿಟೆಡ್ನಲ್ಲಿ ಕೆಲಸಕ್ಕೆ ಸೇರಿಕೊಂಡಿದ್ದ. ಮೊದಲ ಅವಧಿಗೆ 9 ತಿಂಗಳ ಒಪ್ಪಂದದ ಮೇಲೆ ತೆರಳಿ ಸುರಕ್ಷಿತವಾಗಿ ವಾಪಸಾಗಿದ್ದ. ಎರಡನೇ ಅವಧಿಗಾಗಿ ಕಳೆದ ಮೂರು ತಿಂಗಳ ಹಿಂದೆ ತೆರಳಿದ್ದ. ಚೀನಾದ ಹಾಂಕಾಂಗ್ನಿಂದ ಜಪಾನ್ನ ಟೋಕಿಯೊಗೆ ತೆರಳುವ ಡೈಮಂಡ್ ಪ್ರಿನ್ಸಸ್ ಎಂಬ ಹಡಗಿನಲ್ಲಿ ಆತ ಕಾರ್ಯನಿರ್ವಹಿಸುತ್ತಿದ್ದ. ಹಡಗು ಇನ್ನೇನು ಹಾಂಕಾಂಗ್ ತಲುಪಬೇಕು ಎನ್ನುವ ಹೊತ್ತಿಗೆ ಜಪಾನ್ ಆಡಳಿತ ಅದನ್ನು ತಡೆದಿದೆ. ಸಮುದ್ರ ನಡುವೆಯೇ ಎಲ್ಲರ ವೈದ್ಯಕೀಯ ಪರೀಕ್ಷೆ ನಡೆಸುತ್ತಿದೆ. 14 ದಿನಗಳವರೆಗೆ ಜನರು ಜಪಾನ್ ಒಳಗೆ ಇಳಿಯಲು ಅವಕಾಶ ನೀಡುವುದಿಲ್ಲ ಎಂದು ತಿಳಿಸಿದೆ. ಹಡಗಿನಲ್ಲಿ ಮೊದಲ ಬಾರಿ ಪರೀಕ್ಷಿಸಿದಾಗ 10 ಜನರಲ್ಲಿ ಕರೊನಾ ಸೋಂಕು ಕಂಡು ಬಂದಿತ್ತು. ಶುಕ್ರವಾರ ಪರೀಕ್ಷಿಸಿದಾಗ ಅದು 60 ಜನರಲ್ಲಿ ಕಂಡು ಬಂದಿದೆ.
