ಗ್ರಾಮದ ಅರಣ್ಯ ಪ್ರದೇಶಕ್ಕೆ ಕಾಡಾನೆಗಳು ನಾಲ್ಕೈದು ದಿನಗಳ ಹಿಂದೆಯೇ ಆಗಮಿಸಿವೆ ಎನ್ನಲಾಗಿದೆ. ಅರಣ್ಯಕ್ಕೆ ಹೊಂದಿಕೊಂಡಿರುವ ರೈತ ಪ್ರತಾಪ ತಳವಾರ ಎಂಬುವವರ ಹೊಲಕ್ಕೆ ಭಾನುವಾರ ರಾತ್ರಿ ಕಾಡಾನೆಗಳು ನುಗ್ಗಿರುವ ಮಾಹಿತಿ ಸಿಕ್ಕಿತ್ತು. ಅರಣ್ಯ ಇಲಾಖೆಗೆ ಮಾಹಿತಿ ನೀಡಿದ ರೈತರು, ಕಾಡಾನೆಗಳನ್ನು ಅರಣ್ಯ ಇಲಾಖೆ ಸಿಬ್ಬಂದಿ ನೇತೃತ್ವದಲ್ಲಿ ಕಾಡಿಗೆ ಓಡಿಸಲಾಗಿತ್ತು. ಆದರೆ ಬೆಳಗಿನಜಾವ ಮತ್ತೆ ಇದೇ ಹೊಲಕ್ಕೆ ದಾಳಿ ಮಾಡಿರುವ ಕಾಡಾನೆಗಳು ಗೋವಿನಜೋಳ ತಿಂದು, ತುಳಿದು, ಬಹಳಷ್ಟು ಅಡಕೆ ಗಿಡಗಳನ್ನು ನೆಲಕ್ಕುರುಳಿಸಿವೆ. ಅಲ್ಲದೆ, ಪೈಪುಗಳನ್ನೂ ನಾಶಪಡಿಸಿವೆ. ಸತತ ಮಳೆಯಿಂದಾಗಿ ಮಳೆಗಾಲದಲ್ಲಿ ಕೈಕೊಟ್ಟಿದ್ದ ಗೋವಿನಜೋಳದಿಂದ ಹಾನಿಗೊಳಗಾಗಿದ್ದೆವು. ಬೇಸಿಗೆ ಸಮಯದಲ್ಲಾದರೂ ಫಸಲು ಬೆಳೆಯೋಣವೆಂದರೆ ಕಾಡುಪ್ರಾಣಿಗಳ ಕಾಟ ತಪ್ಪುತ್ತಿಲ್ಲ. ಕಳೆದ ವರ್ಷವೂ ಇದೇ ಸಮಯದಲ್ಲಿ ಕಾಡಾನೆಗಳು ದಾಳಿ ಮಾಡಿ ಪೈರು ನಾಶಪಡಿಸಿದ್ದವು. ಪ್ರತಿವರ್ಷ ಇದೇ ಆದರೆ ರೈತರು ಇದಕ್ಕಾಗಿ ಮಾಡಿರುವ ಸಾಲವನ್ನು ತೀರಿಸುವುದಾದರೂ ಹೇಗೆ?. ಅರಣ್ಯ ಇಲಾಖೆ ಶಾಶ್ವತ ಪರಿಹಾರ ಕಂಡುಕೊಳ್ಳಬೇಕು ಎನ್ನುತ್ತಾರೆ ಪ್ರತಾಪ್ ತಳವಾರ.
