ಬೆಂಗ್ಳೂರಲ್ಲಿ ಧಾರಾಕಾರ ಮಳೆ: ಇಬ್ಬರ ಸಾವು, ರಾಜಕಾಲುವೆಯಲ್ಲಿ ಕೊಚ್ಚಿಹೋದ ಯುವಕನಿಗಾಗಿ ಹುಡುಕಾಟ

ಬೆಂಗಳೂರು: ರಾಜ್ಯ ರಾಜಧಾನಿ ಬೆಂಗಳೂರಲ್ಲಿ ಶುಕ್ರವಾರ ತಡರಾತ್ರಿ ಸುರಿದ ಧಾರಾಕಾರ ಮಳೆಗೆ ಇಬ್ಬರು ಬಲಿಯಾಗಿದ್ದಾರೆ. ಚಲಿಸುತ್ತಿದ್ದ ಕಾರು ಕೆರೆಯಲ್ಲಿ ಮುಳುಗಿ ಯುವಕನೊಬ್ಬ ದುರಂತ ಅಂತ್ಯಕಂಡರೆ, ಗೋಡೆಕುಸಿದು ವೃದ್ಧೆಯೊಬ್ಬರು ಮೃತಪಟ್ಟಿದ್ದಾರೆ. 24 ವರ್ಷದ ಯುವಕ ರಾಜಕಾಲುವೆಯಲ್ಲಿ ಕೊಚ್ಚಿ ಹೋಗಿದ್ದು, ಈತನ ಪತ್ತೆಗಾಗಿ ಹುಡುಕಾಟ ಮುಂದುವರಿದೆ.

ದೇವಸಂದ್ರ ವಾರ್ಡ್​ನಲ್ಲಿ ವಾಸವಿದ್ದ ಕಾವೇರಿನಗರದ ಮುನಿಯಮ್ಮ(60) ಗೋಡೆ ಕುಸಿದು ಸಾವನ್ನಪ್ಪಿದ್ದಾರೆ. ಗಾಯತ್ರಿ ಬಡವಾಣೆಯಲ್ಲಿ ಯುವಕ ಮಿಥುನ್​ ವಾಸವಿದ್ದ ಕಟ್ಟಡದ ಬಳಿ ಕಾಂಪೌಂಡ್ ಬಿದ್ದಿದೆ. ಮಳೆನೀರಿನ ರಭಸಕ್ಕೆ ಯುವಕನ ದ್ವಿಚಕ್ರ ವಾಹನ ಕೊಚ್ಚಿಕೊಂಡು ಹೋಗಲು ಆರಂಭವಾಗಿದೆ. ಈ ವೇಳೆ ಯುವಕ ಬೈಕ್​ ಅನ್ನು ಎಳೆದುಕೊಳ್ಳಲು ಹೋಗಿ ಆತನೂ ನೀರಲ್ಲಿ ಕೊಚ್ಚಿಹೋಗಿ ರಾಜಕಾಲುವೆ ನೀರಲ್ಲಿ ಮರೆಯಾಗಿದ್ದಾನೆ. ಅಗ್ನಿಶಾಮಕ ಸಿಬ್ಬಂದಿ ಮತ್ತು ಎನ್​ಡಿಆರ್​ಎಫ್​ ಸಿಬ್ಬಂದಿ ಯುವಕನಿಗಾಗಿ ಹುಡಕಾಟ ನಡೆಸುತ್ತಿದ್ದಾರೆ.

ಮಹದೇವಪುರ ಪೊಲೀಸ್ ಠಾಣಾ ವ್ಯಾಪ್ತಿಯಲ್ಲಿ ದೇವಸಂದ್ರ ವಾರ್ಡ್​ನ ಮುನಿಯಮ್ಮ ವಾಸವಿದ್ದ ಮನೆಯ ಗೋಡೆ ಮಧ್ಯರಾತ್ರಿ ಎರಡು ಗಂಟೆ ಸುಮಾರಿಗೆ ಕುಸಿದು ಬಿದ್ದಿದೆ. ಮುನಿಯಮ್ಮ ಮೃತಪಟ್ಟಿದ್ದು, ಮತ್ತಿಬ್ಬರು ಗಾಯಗೊಂಡಿದ್ದಾರೆ.

ರಾತ್ರಿಯಿಡೀ ಸುರಿದ ಮಳೆಯಿಂದಾಗಿ ಬೆಂಗಳೂರು ಪೂರ್ವ ವಿಭಾಗದಲ್ಲಿ ರಸ್ತೆಗಳು ಕೆರೆಯಂತಾಗಿದ್ದು, ಚಲಿಸುತ್ತಿದ್ದ ಕಾರು ಕೆರೆಗೆ ಇಳಿದು ಯುವಕ ಮೃತಪಟ್ಟ ಘಟನೆ ಮಾಗಡಿ ರಸ್ತೆ ತಾವರೆಕೆರೆಯ ಸೀಗೆಹಳ್ಳಿ ಗೇಟ್ ಬಳಿ ಸಂಭವಿಸಿದೆ. ದೀಪಕ್ ಮೃತ ದುರ್ದೈವಿ.

https://www.vijayavani.net/a-sandalwood-actress-swatis-face-damage-doctor-mistek-actress-suffering/

https://www.vijayavani.net/a-tirthahalli-police-constable-sudha-life-is-tragic-end-kujadosha-isssue/