ಪೊಲೀಸ್ ಕಾನ್​ಸ್ಟೇಬಲ್ ಹುದ್ದೆಗಳ ನೇಮಕಾತಿ ಪರೀಕ್ಷೆಯಲ್ಲಿ 5 ಲಕ್ಷ ರೂ.ಗೆ ನಕಲಿ ಪರೀಕ್ಷಾರ್ಥಿ ಬಿಕರಿ?

ಕೇಶವಮೂರ್ತಿ ವಿ.ಬಿ. ಹುಬ್ಬಳ್ಳಿ

ಪೊಲೀಸ್ ಕಾನ್​ಸ್ಟೇಬಲ್ ಹುದ್ದೆಗಳ ನೇಮಕಾತಿಗಾಗಿ ಭಾನುವಾರ ನಡೆದ ಪರೀಕ್ಷೆಯಲ್ಲಿ ವಿವಿಧೆಡೆ ನಕಲಿ ಅಭ್ಯರ್ಥಿಗಳ ಬಂಧನದ ಬೆನ್ನಲ್ಲೇ ರಾಜ್ಯಾದ್ಯಂತ ನಕಲಿ ಅಭ್ಯರ್ಥಿಗಳ ದೊಡ್ಡ ಜಾಲ ಸಕ್ರಿಯವಾಗಿರುವ ಅಂಶ ಹೊರ ಬಿದ್ದಿದೆ. 5 ಲಕ್ಷ ರೂ. ಕೊಟ್ಟರೆ ಕಾನ್​ಸ್ಟೇಬಲ್ ಪರೀಕ್ಷೆ ಪಾಸ್ ಮಾಡಿಕೊಡುವುದಾಗಿ ಡೀಲ್ ಮಾಡಿಕೊಂಡಿರುವ ಆತಂಕಕಾರಿ ಮಾಹಿತಿ ಪೊಲೀಸ್ ಇಲಾಖೆ ಬೆಚ್ಚಿ ಬೀಳುವಂತೆ ಮಾಡಿದೆ.

ಹುಬ್ಬಳ್ಳಿಯಲ್ಲಿ ನಕಲಿ ಅಭ್ಯರ್ಥಿಯಾಗಿ ಪರೀಕ್ಷೆ ಬರೆಯಲು ಹೋಗಿ ಸಿಕ್ಕಿ ಬಿದ್ದ ಬೆಳಗಾವಿ ಜಿಲ್ಲೆ ರಾಯಭಾಗ ತಾಲೂಕಿನ ಅಂಕಲಗಿ ಪೊಲೀಸ್ ಠಾಣೆಯ ಅಸಲಿ ಕಾನ್​ಸ್ಟೇಬಲ್ ಅಡಿವೆಪ್ಪ ಯರಗುದ್ರಿ ಪರೀಕ್ಷೆ ಪಾಸ್ ಮಾಡಿ ಕೊಡಲು ಅಸಲಿ ಅಭ್ಯರ್ಥಿ ಲಕ್ಕಪ್ಪ ಬೆಟಗೇರಿಯಿಂದ 5 ಲಕ್ಷ ರೂ.ಗೆ ಒಪ್ಪಂದ ಮಾಡಿಕೊಂಡಿದ್ದ. ಮುಂಗಡವಾಗಿ 1 ಲಕ್ಷ ರೂ. ಪಡೆದಿದ್ದ. ಬೆಳಗಾವಿಯಲ್ಲಿ ಸಿಕ್ಕಿಬಿದ್ದಿರುವ ಮತ್ತೊಬ್ಬ ನಕಲಿ ಅಭ್ಯರ್ಥಿ ಭೀಮಶಿ ಹುಲ್ಲೋಳಿ ಎಂಬಾತ ಈ ಡೀಲ್​ನ ನೇತೃತ್ವ ವಹಿಸಿದ್ದ. ಬೆಳಗಾವಿಯಲ್ಲಿ ಕೋಚಿಂಗ್ ಸೆಂಟರ್ ಒಂದರಲ್ಲಿ ಶಿಕ್ಷಕನಾಗಿರುವ ಭೀಮಶಿ ಅಡಿವೆಪ್ಪ ಮತ್ತು ಲಕ್ಕಪ್ಪ ನಡುವೆ ಹಣದ ವ್ಯವಹಾರ ಕುದುರಿಸಿದ್ದ. ಅಡಿವೆಪ್ಪ ಈ ಹಿಂದೆ ಶಿವಮೊಗ್ಗ ಹಾಗೂ ಮಂಗಳೂರಿನಲ್ಲಿ ನಡೆದ ಪರೀಕ್ಷೆಯಲ್ಲೂ ನಕಲಿ ಅಭ್ಯರ್ಥಿಯಾಗಿ ಯಶಸ್ವಿಯಾಗಿ ಪರೀಕ್ಷೆ ಬರೆದಿದ್ದ ಎಂದು ಮೂಲಗಳು ತಿಳಿಸಿವೆ.

ಅಸಲಿ ಅಭ್ಯರ್ಥಿ ಬಂಧನ: ಭಾನುವಾರ ನಕಲಿ ಅಭ್ಯರ್ಥಿ ಅಡಿವೆಪ್ಪನನ್ನು ಬಂಧಿಸಿದ್ದ ಗೋಕುಲ ರೋಡ್ ಠಾಣೆ ಪೊಲೀಸರು ಸೋಮವಾರ ಅಸಲಿ ಅಭ್ಯರ್ಥಿ ಲಕ್ಕಪ್ಪ ಬೆಟಗೇರಿಯನ್ನು ಬೆಳಗಾವಿ ಜಿಲ್ಲೆ ರಾಯಭಾಗದಲ್ಲಿ ಬಂಧಿಸಿದ್ದಾರೆ. ಇಬ್ಬರನ್ನೂ ನ್ಯಾಯಾಂಗ ಬಂಧನಕ್ಕೆ ಒಪ್ಪಿಸಲಾಗಿದೆ.

ಸಿಐಡಿ ತನಿಖೆಯಾಗಲಿ: ವರ್ಷಗಟ್ಟಲೆ ನಿರಂತರವಾಗಿ ಅಧ್ಯಯನ ಮಾಡಿ ಪರೀಕ್ಷೆಗೆ ಹಾಜರಾಗುವ ಪ್ರಾಮಾಣಿಕ ಅಭ್ಯರ್ಥಿಗಳಿಗೆ ನಕಲಿ ಅಭ್ಯರ್ಥಿಗಳಿಂದ ವಂಚನೆಯಾಗುತ್ತಿದೆ. ಜಾಲ ದೊಡ್ಡದಿರುವುದರಿಂದ ಸರ್ಕಾರ ಸಿಐಡಿ ತನಿಖೆ ನಡೆಸಿ ತಪ್ಪಿತಸ್ಥರಿಗೆ ಶಿಕ್ಷೆ ವಿಧಿಸಬೇಕು ಎಂದು ಹೆಸರು ಹೇಳಲಿಚ್ಛಿಸದ ಕೆಲವು ಅಭ್ಯರ್ಥಿಗಳು ಪತ್ರಿಕೆ ಜತೆ ಮಾತನಾಡುತ್ತ ಮನವಿ ಮಾಡಿದರು.