ಕಳೆಗಟ್ಟಿದ ನಾಗರ ಪಂಚಮಿ ಸಡಗರ

ಮಲ್ಲು ಕಳಸಾಪುರ ಲಕ್ಷ್ಮೇಶ್ವರ

ನಾಡಿನ ದೊಡ್ಡ ಹಬ್ಬ ನಾಗರ ಪಂಚಮಿ ಸಮೀಪಿಸಿದೆ. ಮನೆ ಮನಗಳಲ್ಲಿ ಸಡಗರ ಸಂಭ್ರಮ ಇಮ್ಮಡಿಸಿದೆ. ಪಟ್ಟಣದ ಮಾರುಕಟ್ಟೆಯಲ್ಲಿ ಖರೀದಿಯ ಅಬ್ಬರ ಜೋರಾಗಿದೆ.

ಕರೊನಾ ಕಾಟದಿಂದಾಗಿ ಕಳೆದ ವರ್ಷ ಹಬ್ಬದ ಸಡಗರ ಅಷ್ಟಾಗಿ ಇರಲಿಲ್ಲ. ಆದರೆ, ಈ ವರ್ಷ ಪರಿಸ್ಥಿತಿ ಸ್ವಲ್ಪ ಸುಧಾರಿಸಿದ್ದರಿಂದ ಸೋಂಕಿನ ಸೆಳೆತದ ಭಯವಿಲ್ಲದೆ ಜನರು ಅಗತ್ಯ ವಸ್ತುಗಳನ್ನು ಖರೀದಿಸುತ್ತಿದ್ದಾರೆ. ಬಟ್ಟೆ ಅಂಗಡಿಗಳು, ಕಿರಾಣಿ, ಅಲಂಕಾರಿಕ ವಸ್ತುಗಳು, ಹೂ ಹಣ್ಣಿನ ಅಂಗಡಿಗಳಲ್ಲಿ ಭರ್ಜರಿ ವ್ಯಾಪಾರ ನಡೆಯುತ್ತಿದೆ.

ಅಗತ್ಯ ವಸ್ತುಗಳ ಬೆಲೆಯಲ್ಲಿ ಏರಿಕೆಯಾಗಿದ್ದರೂ ಸಂಪ್ರದಾಯ ಆಚರಣೆಗಾಗಿ ಜನರು ಕಷ್ಟದ ನಡುವೆಯೂ ಖರೀದಿಯಲ್ಲಿ ತೊಡಗಿರುವ ದೃಶ್ಯ ಸಾಮಾನ್ಯವಾಗಿದೆ. ಈ ವರ್ಷ ಉತ್ತಮ ಮುಂಗಾರಿನಿಂದಾಗಿ ಕೃಷಿ ಕೂಲಿಕಾರರು ಕೈತುಂಬ ಕೆಲಸದಿಂದ ಬಂದ ಹಣದಲ್ಲಿ ಸ್ವಲ್ಪ ಸಂಗ್ರಹಿಸಿಟ್ಟುಕೊಂಡಿದ್ದಾರೆ. ಆದರೆ, ಕೆಲವು ರೈತರು ತಾವು ನಂಬಿದ ಹೆಸರು ಬೆಳೆ ಕೈಕೊಟ್ಟಿದ್ದರಿಂದ ಮತ್ತೆ ಸಾಲಕ್ಕೆ ಕೈಯೊಡ್ಡುವ ಪರಿಸ್ಥಿತಿಯಿದೆ.

ನಾಗರ ಅಮಾವಾಸ್ಯೆಯಿಂದಲೇ ಶ್ರಾವಣ ಮಾಸದ ಹಬ್ಬಗಳು ಆರಂಭಗೊಂಡಿದೆ. ಇಂದು ರೊಟ್ಟಿ ಪಂಚಮಿ, ಗುರುವಾರ ಹಾಲೆರೆಯುವ ಹಬ್ಬ, ಶುಕ್ರವಾರ ವರಮಹಾಲಕ್ಷ್ಮೀ ಪೂಜೆ, ಶನಿವಾರ ಕೆರೆಕಟ್ಟಂಬಲಿ, ಭಾನುವಾರ ನೂಲು ಹುಣ್ಣಿಮೆ, ಮುಂದಿನ ಬುಧವಾರ ಸಂಕಷ್ಟ ಚತುರ್ಥಿ ಹೀಗೆ ಗಣೇಶ ಚತುರ್ಥಿವರೆಗೆ ಹಬ್ಬಗಳ ಸಂಭ್ರಮ ನಡೆಯಲಿದೆ. ಕರೊನಾ ಭೀತಿಯಿಂದ ಯಾವ ಸಂರ್ಭದಲ್ಲಾದರೂ ಲಾಕ್​ಡೌನ್ ಘೊಷಣೆಯಾಗಬಹುದು ಎನ್ನುವ ಭಯದಿಂದ ಕೆಲವರು ಈಗಲೇ ಅಗತ್ಯ ವಸ್ತುಗಳ ಖರೀದಿಗೆ ಮುಂದಾಗಿದ್ದಾರೆ.

ಬೆಲೆ ಏರಿಕೆ ಬಿಸಿ: ಇಂಧನ, ಆಹಾರ ಪದಾರ್ಥ, ತರಕಾರಿ ಸೇರಿದಂತೆ ಜೀವನಾವಶ್ಯಕ ವಸ್ತುಗಳ ಬೆಲೆ ಗಗನಕ್ಕೇರಿದೆ. ಪಂಚಮಿ ಹಬ್ಬದ ಅಗತ್ಯ ದಿನಸಿ ವಸ್ತುಗಳಾದ ಕಡಲೆ ಬೇಳೆ ಪ್ರತಿ ಕೆಜಿಗೆ 80 ರೂಪಾಯಿ, ಬೆಲ್ಲ 35-40 ರೂಪಾಯಿ, ಕೊಬ್ಬರಿ 210 ರೂಪಾಯಿ, ಮಡಕಿ 96 ರೂಪಾಯಿ, ಗೋಧಿ ಹಿಟ್ಟು 35-55 ರೂಪಾಯಿ, ಅಡುಗೆ ಎಣ್ಣೆ-150-170 ರೂಪಾಯಿ, ಸಕ್ಕರೆ-36 ರೂಪಾಯಿ, ಪುಟಾಣಿ-78 ರೂಪಾಯಿ, ಡಾಣಿ-ಗುಳಗಿ-150 ರೂಪಾಯಿ ಇದೆ. ಅದಕ್ಕೆ ತಕ್ಕಂತೆ ಹಣ್ಣು, ಹೂ, ಕಾಯಿ, ವೀಳ್ಯದೆಲೆ, ಅಡಕೆ ಮತ್ತಿತರ ವಸ್ತುಗಳ ದರವೂ ಹೆಚ್ಚಳವಾಗಿದೆ. ಪಟ್ಟಣದಲ್ಲಿ ಕಿರಾಣಿ, ಬಟ್ಟೆ, ಆಭರಣ, ಅಲಂಕಾರಿಕ ವಸ್ತುಗಳ ಖರೀದಿಗೆ ಜನರು ಮುಗಿಬಿದ್ದಿದ್ದಾರೆ.