ಆನೇಕಲ್: ಆನೇಕಲ್ ಗಡಿಭಾಗ ಡೆಂಕಣಿಕೋಟೆ ಸಮೀಪದ ಬೇವನತ್ತ ಶಿವ ನಂಜುಂಡೇಶ್ವರ ಬೆಟ್ಟಕ್ಕೆ ಸಹಸ್ರಾರು ಭಕ್ತರು ಆಗಮಿಸಿ ದೇವರ ದರ್ಶನ ಪಡೆದರು. ದ್ವಾಪರ ಯುಗದಲ್ಲಿ ಪಾಂಡವರು ಈ ದೇವಾಲಯ ನಿರ್ಮಾಣ ಮಾಡಿದ್ದು ಎಂಬ ಐತಿಹ್ಯವಿದ್ದು, ದೇವಾಲಯ ಇದೇ ಕಾರಣ್ಕಕ್ಕೆ ಮಹತ್ವ ಪಡೆದುಕೊಂಡಿದೆ. ಪರ್ವತ ಏರಲು ಇಂದಿಗೂ ಯಾವುದೇ ಮೆಟ್ಟಿಲುಗಳನ್ನು ನಿರ್ಮಿಸಿಲ್ಲ, ಆದರೂ ಆನೇಕಲ್, ಕೋಲಾರ, ತಮಿಳುನಾಡು, ಸೇರಿ ರಾಜ್ಯದ ಮೂಲೆ-ಮೂಲೆಗಳಿಂದ ಭಕ್ತರು ಇಲ್ಲಿಗೆ ಧಾವಿಸುತ್ತಾರೆ. ಶಿವ ನಂಜುಂಡೇಶ್ವರ ಬೆಟ್ಟಕ್ಕೆ ಹೋಗುವುದರಿಂದ ಕಾಯಿಲೆ ದೂರವಾಗುತ್ತವೆ ಎನ್ನುವ ನಂಬಿಕೆಯಿದೆ. ಈ ಭಾವನೆಯಿಂದ ಭಕ್ತರು ಎತ್ತರದ ಕಲ್ಲಿನ ಬೆಟ್ಟ ಏರಿ 2 ಕಿ.ಮೀ ಮೇಲೆ ಇರುವ ದೇವರ ದರ್ಶನ ಪಡೆದು ಪುನೀತರಾಗುತ್ತಾರೆ. ಶಿವರಾತ್ರಿ ಅಂಗವಾಗಿ ಹೊಸೂರು ಡೆಂಕಣಿಕೋಟೆ ಆನೇಕಲ್ ಭಾಗದಿಂದಲೂ ಸಾಕಷ್ಟು ಸಂಖ್ಯೆಯಲ್ಲಿ ಆಗಮಿಸುವ ಭಕ್ತಾದಿಗಳಿಗೆ ಅನ್ನದಾಸೋಹ ಆಯೋಜಿಸಲಾಗಿತ್ತು. ಅಲ್ಲಲ್ಲಿ ಅರವಟ್ಟಿಗೆ ನಿರ್ಮಾಣ ಮಾಡಿ ಮಜ್ಜಿಗೆ, ಪಾನಕ, ಕೋಸಂಬರಿ ವಿತರಿಸಲಾಯಿತು.
