ಗೃಹಜ್ಯೋತಿ ಹೆಸರಲ್ಲಿ ಕಣ್ಣಾಮುಚ್ಚಾಲೆ!

ಮುಳಬಾಗಿಲು: ಎರಡು ವರ್ಷಗಳ ಹಿಂದೆ ಕಾಂಗ್ರೆಸ್​ ಚುನಾವಣೆಗೂ ಮುನ್ನ ಬಿಡುಗಡೆ ಮಾಡಿದ್ದ ಪ್ರಣಾಳಿಕೆಯಂತೆ ಪ್ರಚಾರ ಸಭೆಯಲ್ಲಿ ಸಿಎಂ ಸಿದ್ದರಾಮಯ್ಯ ಗೃಹಜ್ಯೋತಿಯಡಿ 200 ಯೂನಿಟ್​ ವಿದ್ಯುತ್​ ಎಲ್ಲರಿಗೂ ಫ್ರೀ, ನನಗೂ ಫ್ರೀ ನಿನಗೂ ಫ್ರೀ, ಕಾಕಾ ಪಾಟೀಲ್​ಗೂ ಫ್ರೀ, ಮಹದೇವಪ್ಪನಿಗೂ ಫ್ರೀ ಎಂದು ಹೇಳಿರುವುದು ಸತ್ಯ. ಆದರೆ ಸಣ್ಣ ಪ್ರಮಾಣದ ವಿದ್ಯುತ್​ ಬಳಸುವ ಗ್ರಾಹಕರ ಜೇಬಿಗೆ ಈಗ ಕತ್ತರಿ ಹಾಕಲಾಗುತ್ತಿದ್ದು, ಬೆಸ್ಕಾಂ ಮೂಲಕ ಕೊಟ್ಟು, ಕಿತ್ತುಕೊಳ್ಳು ಚಾಳಿ ಶುರುಮಾಡಿದೆ ಎಂದು ಗ್ರಾಹಕರು ಆಕ್ರೋಶ ವ್ಯಕ್ತಪಡಿಸಿದ್ದಾರೆ.

ರಾಜ್ಯ ಕಾಂಗ್ರೆಸ್​ ಸರ್ಕಾರ ಜನರಿಗೆ ನೀಡಿರುವ ಗೃಹ ಜ್ಯೋತಿಯು ಮೂಗಿಗೆ ತುಪ್ಪ ಸವರಿದಂತಾಗಿದೆ. ಉಚಿತ ಬಿಲ್​ ಬಗ್ಗೆ ಬೆಸ್ಕಾಂ ಕಚೇರಿಗೆ ಹೋಗಿ ಪ್ರಶ್ನೆ ಮಾಡಿದರೆ ನಿಮಗೆ ಇಷ್ಟು ಯೂನಿಟ್​ ಮಾತ್ರ ಉಚಿತ, ಉಳಿದ ಹೆಚ್ಚುವರಿ ಯುನಿಟಿಗೆ ಬಿಲ್​ ಖಚಿತ, ಪಾವತಿ ಮಾಡದಿದ್ದರೆ ಸಂಪರ್ಕ ಕಡಿತ ಎಂಬ ಮಾಹಿತಿಗೆ ಗ್ರಾಹಕರು ಕಂಗಾಲಾಗಿದ್ದಾರೆ.

ಬಹುತೇಕರಿಗೆ ಉಚಿತ ವಿದ್ಯುತ್​ ಎಂಬದು ಮರೀಚಿಕೆಯಾಗಿದೆ, ಹಿಂದೆ ಬಳಸುತ್ತಿದ್ದ ವಿದ್ಯುತ್​ ಪ್ರಮಾಣದಂತೆ ಈಗಲೂ ಬಳಕೆ ಮಾಡುತ್ತಿದ್ದು, 200 ಯೂನಿಟ್​ ಕಳೆದರೂ ಕಡಿಮೆ ಬಿಲ್​ ಬರಬೇಕಿತ್ತು. ಆದರೆ, ಫ್ರೀ ಯೂನಿಟ್​ ಕಳೆದೂ ಮೊದಲಿಗಿಂತಲೂ ಹೆಚ್ಚು ಬಿಲ್​ ಬರುತ್ತಿರುವುದು ಜನರ ಆಕ್ರೋಶಕ್ಕೆ ಕಾರಣವಾಗಿದೆ. ಬೇಸಿಗೆಯಲ್ಲಿ ಫ್ಯಾನ್​, ವಾಟರ್​ ಫಿಲ್ಟರ್​ ಮತ್ತಿತರ ಬಳಕೆಯಿಂದ ಪ್ರತಿ ತಿಂಗಳು ಉದಾಹರಣೆಗೆ ಆರ್​ಆರ್​. ಸಂಖ್ಯೆ ಎಂ.ಬಿ 23578ಗೆ ಫೆಬ್ರವತಿಯಲ್ಲಿ 79 ಯುನಿಟ್​ ಬಿಲ್​ ಬಂದಿದ್ದು, ಇದರಲ್ಲಿ ಉಚಿತ ವಿದ್ಯುತ್ತಿಗೆ 53 ಯೂನಿಟ್​ ಮಾತ್ರ ಅರ್ಹವಾಗಿದ್ದು, 26 ಯೂನಿಟ್​ಗೆ ಹಣ ಪಾವತಿ ಮಾಡಬೇಕಾಗಿದೆ. ಈ ಹಣ ರೂ.175.27 ಪೈಸೆ ಪಾವತಿಸಬೇಕಿದೆ

ಜತೆಗೆ ಮುಂದಿನ ತಿಂಗಳಿಂದ ಯೂನಿಟ್​ಗೆ 0.36 ಪೈಸೆ ಹೆಚ್ಚಿಸಲು ಇಲಾಖೆ ಸಿದ್ಧತೆ ನಡೆಸಿದ್ದು, ಏಪ್ರಿಲ್​ ಬಿಲ್​ ಗೃಹಜ್ಯೋತಿ ಗ್ರಾಹಕರ ಕೈ ಸುಡುವುದು ಖಚಿತವಾಗಿದೆ. ಗೃಹಜ್ಯೋತಿ ವಿದ್ಯುತ್​ ಬಳಸುವ ಬಹುತೇಕ ಗ್ರಾಹಕರಿಗೆ 200 ಯೂನಿಟ್​ ಬೇಡ, 100 ಯೂನಿಟ್​ ಉಚಿತ ನೀಡಿದರೂ ಕಡಿಮೆ, ವಿದ್ಯುತ್​ ಬಳಸುವ ಶೇ.-80 ಗ್ರಾಹಕರಿಗೆ ಅನುಕೂಲ ಆಗುತ್ತದೆ ಎಂಬುದು ಸರ್ಕಾರಕ್ಕೂ ತಿಳಿದಿದ್ದರೂ ಒಂದು ಕೈಯಲ್ಲಿ ಉಚಿತ ವಿದ್ಯುತ್​ ಕೊಟ್ಟು ಮತ್ತೊಂದು ಕೈಯಲ್ಲಿ ಪರೋಕ್ಷವಾಗಿ ತೆಗೆದುಕೊಳ್ಳುವ ಕಳ್ಳಾಟ ನಡೆಯುತ್ತಿದೆ. ಗ್ರಾಹಕನಿಗೆ ಅರ್ಧ ಉಚಿತ, ಅರ್ಧಕ್ಕೆ ಬಿಲ್ಲು ಎಂದು ಹೇಳಿದರೂ ವಿದ್ಯುತ್​ ದರ ಏರಿಕೆಯಿಂದ ಕಾಂಗ್ರೆಸ್​ ಸರ್ಕಾರ ಬರುವುದಕ್ಕಿಂತ ಮುಂಚೆ ಕಟ್ಟುತ್ತಿದ್ದ ಬಿಲ್​ಗಿಂತಲೂ ಈಗ ಹೆಚ್ಚಿನ ಬಿಲ್ಲು ಕಟ್ಟುವ ದುಸ್ಥಿತಿ ಬಂದೊದಗಿದೆ ಎಂದು ನಾಗರಿಕರು ಆಕ್ರೋಶ ವ್ಯಕ್ತಪಡಿಸಿದ್ದಾರೆ.

ಪ್ರತಿ ಗ್ರಾಹಕ ಗೃಹ ಜ್ಯೋತಿಗೆ ಅರ್ಜಿ ಸಲ್ಲಿಸುವ ಹಿಂದಿನ ವರ್ಷ ಸರಾಸರಿ ವಿದ್ಯುತ್​ ಬಳಕೆಯಂತೆ ಉಚಿತ ವಿದ್ಯುತ್​ ಯೂನಿಟ್​ ನಿಗದಿ ಮಾಡಲಾಗಿರುತ್ತದೆ. ಅದಕ್ಕಿಂತ ಹೆಚ್ಚಿನ ವಿದ್ಯುತ್​ ಬಳಕೆ ಮಾಡಿದ ಯುನಿಟ್​ಗೆ ಬಿಲ್​ ಪಾವತಿ ಮಾಡಬೇಕು.

- ವಿ.ಎಂ. ರಮೇಶ್​, ಎಇಇ, ಬೆಸ್ಕಾಂ ಮುಳಬಾಗಿಲು

ಸರ್ಕಾರ ಜನರಿಗೆ ಟೋಪಿ ಹಾಕಿ ಚುನಾವಣೆಯಲ್ಲಿ ಗೆದ್ದ ನಂತರ 200 ಯೂನಿಟ್​ ಉಚಿತ ನೀಡುವುದರಲ್ಲಿ ಕನಿಷ್ಠ 100 ಯುನಿಟ್​ ಸಹ ಬಹುತೇಕ ಗ್ರಾಹಕರಿಗೆ ಉಚಿತವಾಗಿ ಸಿಗುತ್ತಿಲ್ಲ. ಬೆಸ್ಕಾಂನಲ್ಲಿ ನಡೆಯುವ ಬಿಲ್ಲಿಂಗ್​ ವ್ಯವಸ್ಥೆ ಜನಸಾಮಾನ್ಯರಿಗೆ ಅರ್ಥ ಆಗದಿರುವ ಮತ್ತು ಬೆಸ್ಕಾಂಗೆ ಭೇಟಿ ನೀಡಿ ಕೇಳಿದಾಗ ನಿಮಗೆ ಇಷ್ಟು ಯೂನಿಟ್​ ಮಾತ್ರ ಉಚಿತ ಉಳಿದಿದ್ದಕ್ಕೆ ಪಾವತಿ ಮಾಡಬೇಕೆಂಬ ಉತ್ತರದಿಂದ ಜನಪ್ರಶ್ನೆ ಮಾಡುತ್ತಿಲ್ಲ. ಈ ಬಗ್ಗೆ ಸರ್ಕಾರವನ್ನು ಕೇಳುವರೇ ಇಲ್ಲವಾಗಿದೆ.

- ಕೆ. ಅಮರೇಶ್​, ಮಾಜಿ ಅಧ್ಯಕ್ಷ, ಬಿ.ಜೆ.ಪಿ. ನಗರ ಘಟಕದ, ಮುಳಬಾಗಿಲು