ಆತಂಕ ಸೃಷ್ಟಿಸಿದ ರಕ್ತದ ಕಲೆ

ಹಿರೇಕೆರೂರ: ರಟ್ಟಿಹಳ್ಳಿ ತಾಲೂಕಿನ ಹಿರೇಯಡಚಿ ಗ್ರಾಮದ ಸರ್ಕಾರಿ ಹಿರಿಯ ಪ್ರಾಥಮಿಕ ಶಾಲೆ ಆವರಣದಲ್ಲಿ ರಕ್ತ ಕಲೆ ಬಿದ್ದಿರುವುದನ್ನು ಶುಕ್ರವಾರ ಬೆಳಗ್ಗೆ ನೋಡಿದ ವಿದ್ಯಾರ್ಥಿಗಳು ಬೆಚ್ಚಿಬಿದ್ದಿದ್ದಾರೆ.

ಘಟನಾ ಸ್ಥಳಕ್ಕೆ ಹಿರೇಕೆರೂರ ಠಾಣೆಯ ಪಿಎಸ್​ಐ ನೀಲಪ್ಪ ನರಲಾರ, ಪ್ರಭಾರಿಬಿಇಒ ಎನ್. ಸುರೇಶಕುಮಾರ ಭೇಟಿ ನೀಡಿ, ಗ್ರಾಮಸ್ಥರು, ಪೊಲೀಸ್ ಸಿಬ್ಬಂದಿಯೊಂದಿಗೆ ಆವರಣದ ಸುತ್ತಲೂ ಪರಿಶೀಲನೆ ನಡೆಸಿದರು. ಪ್ರತಿಕ್ರಿಯಿಸಿದ ಸ್ಥಳದಲ್ಲಿದ್ದ ಗ್ರಾಮಸ್ಥರು ಇದು ಯಾವುದೋ ಪ್ರಾಣಿಯ ರಕ್ತದ ಕಲೆಯಾಗಿದೆ ಎಂದರು. ಕಲೆ ನೋಡಿದಾಗಿನಿಂದ ಕೆಲಕಾಲ ಆತಂಕದ ವಾತಾವರಣ ಸೃಷ್ಟಿಯಾಗಿತ್ತು.

ಈ ಕುರಿತು ಬಿಇಒ ಎನ್. ಸುರೇಶಕುಮಾರ ಮಾತನಾಡಿ, ಈಗಾಗಲೇ ಪಿಎಸ್​ಐ ಮತ್ತು ಪೊಲೀಸ್ ಸಿಬ್ಬಂದಿ ಪರಿಶೀಲನೆ ನಡೆಸಿದ್ದಾರೆ. ಹಾವೇರಿಯಿಂದ ಶ್ವಾನದಳ ತರಲು ರ್ಚಚಿಸಲಾಗಿದ್ದು, ತಜ್ಞರನ್ನು ಕರೆಸಿ ರಕ್ತದ ಮಾದರಿ ಸಂಗ್ರಹಿಸಿ ಲ್ಯಾಬ್​ಗೆ ಕಳುಹಿಸಲಾಗುವುದು ಎಂದು ಪಿಎಸ್​ಐ ತಿಳಿಸಿದ್ದಾರೆ ಎಂದರು. ಸ್ಥಳದಲ್ಲೇ ಪೊಲೀಸರು ಬೀಡು ಬಿಟ್ಟಿದ್ದು, ಈ ಬಗ್ಗೆ ತನಿಖೆ ಆರಂಭಿಸಿದ್ದಾರೆ ಎಂದು ‘ವಿಜಯವಾಣಿ’ಗೆ ಪ್ರತಿಕ್ರಿಯಿಸಿದರು. ನಂತರ ಎಂದಿನಂತೆ ಶಾಲೆಗೆ ಆಗಮಿಸಿದ್ದ ಮಕ್ಕಳಿಗೆ ಧೈರ್ಯ ತುಂಬಿ ತರಗತಿ ಆರಂಭಿಸಿದರು.