8 ಸಿರಿಧಾನ್ಯಗಳಿಂದ 201 ಆಹಾರ ಪದಾರ್ಥ

ಬೆಳಗಾವಿ: ಕೆಎಲ್​ಇ ಗ್ರಾಜುವೇಟ್​ ಸ್ಕೂಲ್​ ಆಫ್​ ಹೋಟೆಲ್​ ಮಾನೇಜ್​ಮೆಂಟ್​ ಆ್ಯಂಡ್​ ಕ್ಯಾಟರಿಂಗ್​ ಟೆಕ್ನಾಲಜಿ ವಿದ್ಯಾರ್ಥಿಗಳು ಒಂದೇ ದಿನದಲ್ಲಿ 8 ಸಿರಿಧಾನ್ಯಗಳಿಂದ 201 ಆಹಾರ ಪದಾರ್ಥ ತಯಾರಿಸಿ, ಚೆನ್ನೆನ ಕಲಾಂ ವರ್ಲ್ಡ್​ ರೆಕಾರ್ಡ್​ಗೆ ಭಾಜನವಾಗಿದೆ.

ಸಿರಿಧಾನ್ಯಗಳಾದ ನವಣಿ, ಬರಗು, ರಾಗಿ, ಸಾವೆ, ಜೋಳ, ಸಜ್ಜೆ, ಹಾರಕೆ ಅಕ್ಕಿ ಮತ್ತು ಊದಲು ಧಾನ್ಯದಿಂದ ಇಷ್ಟೊಂದು ಆಹಾರ ಪದಾರ್ಥಗಳನ್ನು ಸಿದ್ಧಪಡಿಸಿ, ಪ್ರಶಸ್ತಿ ಗಿಟ್ಟಿಸಿಕೊಂಡಿದೆ. ಕಾಲೇಜಿನ 60ಕ್ಕಿಂತ ಹೆಚ್ಚು ವಿದ್ಯಾರ್ಥಿಗಳು ತಾವು ತಯಾರಿಸಿದ ಸೂಪ್​, ಸಿಹಿ ತಿಂಡಿ, ಕಾರದ ತಿನಿಸು, ಸಲಾಡ್​, ಅಂಬಲಿ ಇತ್ಯಾದಿ ಆಹಾರ ಪದಾರ್ಥಗಳನ್ನು ತಯಾರಿಸಿ, ಜೆಎನ್​ಎಂಸಿ ಜಿರಗೆ ಸಭಾಂಗಣದಲ್ಲಿ ಶನಿವಾರ ಪ್ರದರ್ಶನಕ್ಕಿಟ್ಟಿದ್ದರು.

ಚೆನ್ನೆನ ಕಲಾಂ ವರ್ಲ್ಡ್​ ರೆಕಾರ್ಡ್​ ಸಂಸ್ಥೆಯಿಂದ ಮುಖ್ಯ ನಿರ್ಣಾಯಕರಾಗಿ ಆಗಮಿಸಿದ್ದ ಡಾ. ಐಗಿರಿ ಲೋಕೇಶ್​ (ಸಿಇಒ), ಡಾ. ಆರ್​.ಹರೀಶ ಅವರು, ವಿದ್ಯಾರ್ಥಿಗಳ ಸಾಧನೆಗೆ ಮೆಚ್ಚುಗೆ ವ್ಯಕ್ತಪಡಿಸಿದರು. ಸ್ಥಳದಲ್ಲೇ ಸಂಸ್ಥೆಯಿಂದ ಅಧಿಕೃತವಾಗಿ ಅವಾರ್ಡ್​ ೂಷಿಸಿದರು.

ಪ್ರಶಸ್ತಿ ಪ್ರದಾನ ಕಾರ್ಯಕ್ರಮದಲ್ಲಿ ಭಾಗವಹಿಸಿದ್ದ ಕೆಎಲ್​ಇ ವಿಶ್ವವಿದ್ಯಾಲಯದ ಕುಲಸಚಿವ ಡಾ. ವಿ.ಎ. ಕೋಠಿವಾಲೆ ಮಾತನಾಡಿ, ಕೆಎಲ್​ಇ ಆಸ್ಪತ್ರೆಗಳು ಜನರ ಆರೋಗ್ಯದ ಕಾಳಜಿ ವಹಿಸುತ್ತಿವೆ. ಜನರ ಸದೃಢ ಆರೋಗ್ಯದ ದೃಷ್ಟಿಯಿಂದ ಹೋಟೆಲ್​ ಮ್ಯಾನೇಜ್​ಮೆಂಟ್​ ಕೋರ್ಸ್​ಗಳನ್ನು ಆರಂಭಿಸಿ, ಆಹಾರದ ಜಾಗೃತಿ ಮೂಡಿಸಲಾಗುತ್ತಿದೆ. ಸಿರಿಧಾನ್ಯ ಸೇವನೆಯಿಂದ ಹೃದಯ ರೋಗ, ಥೈರಾಡ್​ ಸೇರಿ ಇತರ ರೋಗಗಗಳು ಬರುವುದಿಲ್ಲ.

ಜತೆಗೆ ಮನುಷ್ಯನ ಒತ್ತಡ ನಿವಾರಣೆ ಮಾಡುತ್ತವೆ ಎಂದು ತಿಳಿಸಿದರು. ಪ್ರಾಚಾರ್ಯ ನಂದಕುಮಾರ್​, ಕೆಎಲ್​ಇ ವಿಶ್ವವಿದ್ಯಾಲಯದ ಡೆಪ್ಯೂಟಿ ರಿಜಿಸ್ಟ್ರಾರ್​ ಡಾ.ಎಂ.ಎಸ್​.ಗಣಾಚಾರಿ ಉಪಸ್ಥಿತರಿದ್ದರು. ಪ್ರದರ್ಶನದಲ್ಲಿ ತರಹೇವಾರಿ ತಿನಿಸು, ಫಾಸ್ಟ್​ಫುಡ್​, ಬೇಕರಿ ಪದಾರ್ಥಗಳೂ ಇದ್ದವು.