ಶರಣು ಮಹಾಗಾಂವ ಸೇಡಂ
ಬಿಬ್ಬಳ್ಳಿ- ಕಾಚೂರ ಮಧ್ಯದ ಕಾಗಿಣಾ ನದಿ ನಡುಗಡ್ಡೆಯಲ್ಲಿ ಸಿಲುಕಿದ್ದ 8 ಯುವಕರನ್ನು ಜೀವದ ಹಂಗು ತೊರೆದು ರಕ್ಷಿಸಿದ ಮೀನುಗಾರ ಶರಣು ಹಣಮಂತ ಸಾಹಸಕ್ಕೆ ಎಲ್ಲೆಡೆ ಮೆಚ್ಚುಗೆ ವ್ಯಕ್ತವಾಗಿದೆ. ಇನ್ನು ಕೆಲವರಿಂದ ಸಾಹಸಿ ಮೀನುಗಾರನಿಗೆ ಶೌರ್ಯ ಹಾಗೂ ರಾಜ್ಯೋತ್ಸವ ಪ್ರಶಸ್ತಿ ನೀಡಬೇಕೆಂಬ ಕೂಗು ಕೇಳಿಬರುತ್ತಿದೆ.
ಜೇವರ್ಗಿ ತಾಲೂಕಿನ ಹಿಪ್ಪರಗಿ (ಮಂದೇವಾಲ) ಗ್ರಾಮದ ಶರಣು ಮೀನುಗಾರಿಕೆಯನ್ನೇ ನಂಬಿ ತಂದೆ ಜತೆ 20 ವರ್ಷದ ಹಿಂದೆ ಸೇಡಂಗೆ ವಲಸೆ ಬಂದಿದ್ದಾನೆ. ಚಿಂಚೋಳಿ ರಸ್ತೆಯ ಕೈಗಾರಿಕಾ ಪ್ರದೇಶದ ಗುಡಿಸಲಿನಲ್ಲಿ ತಾಯಿ, ಪತ್ನಿ, ಮೂವರು ಮಕ್ಕಳೊಂದಿಗೆ ಜೀವನ ಸಾಗಿಸುತ್ತಿದ್ದಾನೆ. 4 ವರ್ಷದ ಹಿಂದೆ ತಂದೆ ತೀರಿಕೊಂಡಿದ್ದು, ಕುಟುಂಬದ ಜವಾಬ್ದಾರಿ ಶರಣು ಹೆಗಲಿಗೇರಿದೆ. ತಂದೆ ಕಸುಬನ್ನೇ ಮುಂದುವರಿಸಿ ಜೀವನದ ಬಂಡಿ ಎಳೆಯುತ್ತಿದ್ದಾನೆ.
ತನ್ನ ಪ್ರಾಣವನ್ನು ಲೆಕ್ಕಿಸದೆ 8 ಯುವಕರನ್ನು ರಕ್ಷಣೆ ಮಾಡಿದ ಬಳಿಕ ಗ್ರಾಮಸ್ಥರು ಸತ್ಕರಿಸಲು ಬಂದಾಗ, ನನಗೊಂದು ಸೂರಿನ ವ್ಯವಸ್ಥೆ ಮಾಡಿ ಸಾಕು ಎಂದು ಹೇಳಿದ್ದ ಶರಣು, ಇದೊಂದು ದೊಡ್ಡ ಸಹಾಯ ಮಾಡಿ ಎಂದು ಮನವಿ ಮಾಡಿಕೊಂಡಿದ್ದಾನೆ.
ಮೈದುಂಬಿ ಹರಿಯುತ್ತಿದ್ದ ನದಿಯಲ್ಲಿ ಪ್ರಾಣದ ಹಂಗು ತೊರೆದು ಈಜಾಡಿ 8 ಜನರ ಪ್ರಾಣ ರಕ್ಷಿಸಿದ ಸಾಹಸಿಗನಿಗೆ ಸರ್ಕಾರ ಅಥವಾ ಸ್ಥಳೀಯ ಆಡಳಿತ ಸೂಕ್ತ ಸೂರು ಸೇರಿ ಅಗತ್ಯ ಸೌಕರ್ಯ ಕಲ್ಪಿಸಿಕೊಡಬೇಕು ಎಂಬ ಕೂಗು ಹೆಚ್ಚಾಗಿದೆ.
