8 ವರ್ಷವಾದರೂ ಸಿಗದ ರೇಷನ್ ಕಾರ್ಡ್

ತೆಲಸಂಗ: ರೇಷನ್ ಕಾರ್ಡ್‌ಗೆ ಅರ್ಜಿ ಸಲ್ಲಿಸಿದರೆ ಸಾಮಾನ್ಯವಾಗಿ ತಿಂಗಳು ಅಥವಾ ಹದಿನೈದು ದಿನದ ಒಳಗೆ ಕಾರ್ಡ್ ಕೈ ಸೇರುತ್ತದೆ. ಆದರೆ, ಇಲ್ಲೊಬ್ಬರು 8 ವರ್ಷದಿಂದ ಅನೇಕ ಬಾರಿ ಅರ್ಜಿ ಸಲ್ಲಿಸಿದ್ದರೂ ಕಾರ್ಡ್ ಬಂದಿಲ್ಲ.
ಅಥಣಿ ತಾಲೂಕಿನ ತೆಲಸಂಗ ಗ್ರಾಮದ ನಿವಾಸಿ ಅಶೋಕ ಕಟವಾಣಿ ಎಂಬುವರು ಪಡಿತರ ಸೌಲಭ್ಯಕ್ಕಾಗಿ 2012ರಿಂದ ಅರ್ಜಿ ಸಲ್ಲಿಸಿಕೊಂಡು ಬರುತ್ತಿದ್ದಾರೆ. ಆದರೆ, ಪ್ರತಿಬಾರಿ ಅರ್ಜಿ ಸಲ್ಲಿಸಿದಾಗಲೂ ಅನವಶ್ಯಕ ನೆಪ ಹೇಳಿ ಅಧಿಕಾರಿಗಳು ತಮ್ಮ ಅರ್ಜಿಯನ್ನು ವಜಾಗೊಳಿಸುತ್ತಿದ್ದಾರೆ ಎಂದು ಲಾನುಭವಿ ಅಶೋಕ ಕಟವಾಣಿ ಆರೋಪಿಸಿದ್ದಾರೆ.

‘ನಾನು ಗ್ರಾಮದಲ್ಲಿ ಮೂರು ಎಕರೆ ಜಮೀನು ಹೊಂದಿದ್ದೇನೆ. ಫುಟ್‌ಪಾತ್ ಮೇಲೆ ಅಂಗಡಿ ಇಟ್ಟುಕೊಂಡು ಜೀವನ ನಡೆಸುತ್ತೇನೆ. ಲಾಕ್‌ಡೌನ್‌ನಿಂದಾಗಿ ಅಂಗಡಿ ಬಂದ್ ಆಗಿದೆ. ಕಾರ್ಡ್ ಇದ್ದಿದ್ದರೆ ಸರ್ಕಾರದಿಂದ ಪಡಿತರವಾದರೂ ಸಿಗುತ್ತಿತ್ತು. ಸದ್ಯ ಆ ಸೌಲಭ್ಯವೂ ಸಿಗುತ್ತಿಲ್ಲ. ಜೀವನ ನಡೆಸುವುದು ಕಷ್ಟವಾಗಿದೆ’ ಎನ್ನುತ್ತಾರೆ ಅಶೋಕ ಕಟವಾಣಿ.