ತಾಲೂಕು ಸಾರ್ವಜನಿಕ ಆಸ್ಪತ್ರೆಗೆ ವಿವಿಧ ಹಳ್ಳಿಗಳು, ಪಟ್ಟಣಗಳಿಂದ ಸಾವಿರಾರು ರೋಗಿಗಳು ಬರುತ್ತಾರೆ. ಈಗಾಗಲೇ ಜನರು ಕರೊನಾ ವೈರಸ್ನಿಂದ ತತ್ತರಿಸಿ ಹೋಗಿದ್ದಾರೆ. ಆಸ್ಪತ್ರೆಗೆ ಹೋದರೆ ನಾನಾ ಪರೀಕ್ಷೆಗಳನ್ನು ಮಾಡುತ್ತಿರುವುದು ಒಂದೆಡೆ. ಇನ್ನೊಂದೆಡೆ ಜನೌಷಧ ಕೇಂದ್ರ ಸ್ಥಗಿತದಿಂದ ಬಡವರು ಹೆಚ್ಚು ಹಣ ತೆತ್ತು ಔಷಧ ಖರೀದಿಸುವಂತಾಗಿದೆ. ಜನೌಷಧ ಕೇಂದ್ರ ಸ್ಥಗಿತವಾಗಿದ್ದರ ಕುರಿತು ವಿಜಯವಾಣಿ ಜೂ. 15ರಂದು ಸುದ್ದಿ ಪ್ರಕಟಿಸಿತ್ತು. ಅದನ್ನು ಓದಿದ ಕೇಂದ್ರ ಮಾಜಿ ಸಚಿವ ದಿ. ಅನಂತ ಕುಮಾರ ಅವರ ಪತ್ನಿ ತೇಜಸ್ವಿನಿ ಅವರು ಧಾರವಾಡ ಡಿಎಚ್ಒ ಅವರಿಗೆ ದೂರವಾಣಿ ಕರೆ ಮಾಡಿ ಜನೌಷಧ ಕೇಂದ್ರ ತೆರೆಯುವಂತೆ ವಿನಂತಿಸಿದ್ದರು. ಆಗ ಎಚ್ಚೆತ್ತ ಅಧಿಕಾರಿಗಳು ಕೇವಲ 15 ದಿನಗಳು ಕೇಂದ್ರದ ಬಾಗಿಲು ತೆರೆದರು. ಆನಂತರ ಬಾಗಿಲು ಮುಚ್ಚಿದ್ದು, ಇನ್ನೂವರೆಗೆ ಆರಂಭವಾಗಿಲ್ಲ.
