ನೀರಿಗಾಗಿ ಬರುವ ಜನರು 5 ರೂ. ನಾಣ್ಯ ತಂದಿರುತ್ತಾರೆ. ಆದರೆ ಅದು ಹಳೆಯದಾಗಿರುತ್ತದೆ. ಘಟಕದ ಬಾಕ್ಸ್ ಗೆ ಮಾತ್ರ ಹೊಸ ನಾಣ್ಯವನ್ನೇ ಹಾಕಬೇಕು. ಇದರಿಂದಾಗಿ ನಿತ್ಯ ಸಾಕಷ್ಟು ಜನರು ಕಾಯಿನ್ಗಾಗಿ ಪರದಾಡುತ್ತಿದ್ದಾರೆ. ಹತ್ತಿರದ ಅಂಗಡಿಗಳಿಗೆ ಎಡತಾಕಿ ಬೇರೆ ನಾಣ್ಯ ಪಡೆದು ನೀರು ಪಡೆಯುವಂತಾಗಿದೆ. ಸಮಸ್ಯೆಯಿಂದ ಪಾರಾಗಬೇಕೆಂದರೆ ಹಳೆಯ ನಾಣ್ಯಗಳನ್ನು ಪಡೆಯುವಂತಾಗಬೇಕು ಎಂಬ ಸಲಹೆ ನಾಗರಿಕರಿಂದ ಕೇಳಿಬಂದಿದೆ. ಚನ್ನಮ್ಮನ ಕಿತ್ತೂರು ಪಟ್ಟಣದಲ್ಲಿ ಪಟ್ಟಣ ಪಂಚಾಯಿತಿಯಿಂದ 4 ಹಾಗೂ ಖಾಸಗಿ ಸಂಸ್ಥೆಗಳಿಂದ ಹತ್ತಾರು ಘಟಕಗಳು ಕಾರ್ಯ ನಿರ್ವಹಿಸುತ್ತಿವೆ. ಎಲ್ಲ ಕಡೆಯೂ ಇದೇ ಸಮಸ್ಯೆ ಕಾಡುತ್ತಿದೆ. ಘಟಕಗಳಲ್ಲಿ ಎರಡು ಇಂಚು ಅಗಲ ಹಾಗೂ 1 ಸೆಂ.ಮೀ. ಗಾತ್ರದ ಹಿತ್ತಾಳೆ ಬಣ್ಣದ ನಾಣ್ಯವನ್ನು ಮಾತ್ರ ಹಾಕಬೇಕಿರುವುದರಿಂದ ಜನರಿಗೆ ಸಮಸ್ಯೆಯಾಗಿದೆ.
