ಅಂದು ಬೆಳ್ತಂಗಡಿ ವಿಜಯವಾಣಿ ವರದಿಗಾರ ಮಳೆಯನ್ನು ಲೆಕ್ಕಿಸದೆ ಅಪಾಯ ಮರೆತು ಕೊರಗ ಕುಟುಂಬದ ಜತೆ ವಿಜಯವಾಣಿ ಇದೆ ಎಂದು ಅಪಾಯಕಾರಿಯಾಗಿ ಹರಿಯುತ್ತಿ ನೀರಿನಲ್ಲಿ ಹೋಗಿ ವರದಿ ಮಾಡಿದ್ದರು. ಫಲವಾಗಿ, ಇಲ್ಲಿನ ಕುಟುಂಬಗಳ ಸಂಕಷ್ಟದ ಬದುಕಿನ ವಿಚಾರವನ್ನು ಹೊರ ಜಗತ್ತಿಗೆ ಪರಿಚಯಿಸಿದ ಬೆನ್ನಲ್ಲಿಯೇ ಜಿಲ್ಲಾಧಿಕಾರಿ ಸೇರಿ ಹಲವರು ಆಧಿಕಾರಿಗಳ ದಂಡೇ ಕೊರಗ ಕಾಲನಿಗೆ ಭೇಟಿ ನೀಡಿತ್ತು. ಅವರ ಇತರ ಮೂಲ ಬೇಡಿಕೆಗಳು ಈಡೇರಿದ್ದರೂ ಸೇತುವೆ ಹಾಗೂ ರಸ್ತೆಯ ಕನಸು ಮಾತ್ರ ಈಡೇರಿರಲಿಲ್ಲ. ಇಲ್ಲಿ ವಾಸಿಸುತ್ತಿರುವ ಐದು ಕುಟುಂಬಗಳ ಜನರು ತಮ್ಮ ಮನೆಗಳಿಂದ ಹೊರ ಬರಬೇಕಾದರೆ ನದಿಗೆ ಅಡ್ಡಲಾಗಿ ಮರ ಕಡಿದು ಹಾಕಿ ನಿರ್ಮಿಸಲಾಗಿದ್ದ ಸೇತುವೆಯ ಮೂಲಕವೇ ಬರಬೇಕಾಗಿತ್ತು. ಮಳೆ ಜೋರಾಗಿ ಬಂದರೆ ಅದನ್ನು ದಾಟುವುದು ಅಸಾಧ್ಯವಾಗುತ್ತಿತ್ತು. ಆದ್ದರಿಂದ ಇಲ್ಲಿನ ಮಕ್ಕಳು ಶಾಲೆಗೆ ಹೋಗುವುದಂತೂ ಮಳೆಗಾಲದಲ್ಲಿ ಸಾಧ್ಯವಿರಲಿಲ್ಲ.
