1952ನೇ ಸಾಲಿನಲ್ಲಿ ಅಭಿವೃದ್ಧಿ ಕಂಡಿದ್ದ 3.30 ಎಕರೆ ವಿಸ್ತೀರ್ಣದ ತಲಕಟ್ಟಿನಕೆರೆ ಹೂಳು ತುಂಬಿಕೊಂಡಿತ್ತು. ಮಳೆಗಾಲದಲ್ಲಿ ಕೆೆಲತಿಂಗಳು ಮಾತ್ರ ನೀರು ಶೇಖರಣೆಗೊಂಡು ಬತ್ತಿ ಹೋಗುವ ದುಸ್ಥಿತಿ ತಲುಪಿತ್ತು. ಗ್ರಾಮದ ಮುಖ್ಯರಸ್ತೆಯ ಪಕ್ಕದಲ್ಲಿಯೇ ಇರುವ ಒಣ ಕೆರೆಯಲ್ಲಿ ನೀರು ಸಂಗ್ರಹ ಮಾಡುವ ಆಲೋಚನೆಯಿಂದ ಗ್ರಾಮಸ್ಥರು ಮತ್ತು ಗ್ರಾಮಾಭಿವೃದ್ಧಿ ಯೋಜನೆ ಅಧಿಕಾರಿಗಳು ಸಮಾಲೋಚನೆ ಮತ್ತು ಸಹಕಾರದಿಂದ ಕೆರೆ ಸಮಗ್ರ ಅಭಿವೃದ್ಧಿಗೊಂಡಿದೆ.
ಧರ್ಮಸ್ಥಳ ಗ್ರಾಮಾಭಿವೃದ್ಧಿ ಯೋಜನೆಯಿಂದ 3.75 ಲಕ್ಷ ರೂ. ಅನುದಾನ ಹಾಗೂ ಗ್ರಾಮಸ್ಥರ 2 ಲಕ್ಷ ರೂ. ಸೇರಿದಂತೆ ಒಟ್ಟು 5.75 ಲಕ್ಷ ರೂ. ವೆಚ್ಚದಲ್ಲಿ ಅಭಿವೃದ್ಧಿಗೊಳಿಸಲಾಗಿದೆ. ಕೆರೆಯಲ್ಲಿ ತುಂಬಿದ್ದ 9,800 ಘನ ಮೀಟರ್ನಷ್ಟು ಹೂಳು ಹೊರ ತೆಗೆದು ಆಳಗೊಳಿಸಲಾಗಿದೆ. ಇದರಿಂದ ಒಂದು ಕೋಟಿ ಲೀಟರ್ ನೀರು ಸಂಗ್ರಹವಾಗುವ ಸಾಮರ್ಥ್ಯವನ್ನು ಪಡೆದುಕೊಂಡಿದೆ. ಕೆರೆಯ ಸುತ್ತ ಐದುನೂರು ಮೀಟರ್ ಉದ್ದದ ಏರಿ ನಿರ್ಮಾಣ ಮಾಡಲಾಗಿದೆ. ಕೆರೆಯ ಮಧ್ಯದಲ್ಲಿ ಸದಾಕಾಲ ನೀರು ಉಳಿಯುವಂತೆ ಹಾಗೂ ಜಾನುವಾರುಗಳ ಆಸರೆ ನೀಗಿಸಿಕೊಳ್ಳಲು ತೊಟ್ಟಿ ನಿರ್ಮಾಣ ಮಾಡಲಾಗಿದೆ. ಶಿಥಿಲಾವಸ್ಥೆಯಲ್ಲಿದ್ದ ಕೆರೆಗೆ ಹೊಸ ಕಾಯಕಲ್ಪ ನೀಡಿದ್ದು, ಸುಂದರವಾಗಿ ರೂಪುಗೊಂಡಿದೆ.
ಹೂಳು ತೆಗೆದಿರುವ ಕಾರಣ ಈ ಬಾರಿ ಹೆಚ್ಚು ನೀರು ಸಂಗ್ರಹವಾಗಿ ಸುಮಾರು 65 ಎಕರೆ ಕೆರೆ ಅಚ್ಚುಕಟ್ಟುದಾರರಿಗೆ ಅನುಕೂಲವಾಗಲಿದೆ. ಅಂತರ್ಜಲ ವೃದ್ಧಿಗೊಂಡು ಅಕ್ಕಪಕ್ಕದ ಗ್ರಾಮಗಳಲ್ಲಿರುವ ಕೊಳವೆಬಾವಿಗಳು ಪುನುರುಜ್ಜೀವನಗೊಳ್ಳಲಿವೆ. ಜನ-ಜಾನುವಾರುಗಳಿಗೆ ಸದಾಕಾಲ ನೀರು ಲಭಿಸಿ ಸುತ್ತಮುತ್ತಲಿನ ಪರಿಸರ ಸದಾ ಹಚ್ಚಹಸಿರಾಗಿರುವಂತೆ ಕಂಗೊಳಿಸಲು ಪೂರಕವಾಗಲಿ ಎಂಬುದು ಯೋಜನೆಯ ಉದ್ದೇಶವಾಗಿದೆ ಎಂದು ಯೋಜನಾ ಅಧಿಕಾರಿಗಳು ತಿಳಿಸಿದ್ದಾರೆ.
